ಹೊಸದಿಲ್ಲಿ ಕೇಂದ್ರ ಸರಕಾರ ಮಂಡಿ ಶಸ್ತ್ರ ಚಿಕಿತ್ಸೆಯ ಸಲಕರಣೆಗಳಿಗೆ ಮತ್ತು ಶಸ್ತ್ರ ಚಿಕಿತ್ಸೆಗೆ ದರದ ಮಿತಿಯನ್ನು ವಿಧಿಸಿದ ನಂತರ, ಇತರ ಔಷಧ ಮತ್ತು ವೈದ್ಯಕೀಯ ಸಲಕರಣೆಗಳ ಮೇಲೆಯೂ ಗರಿಷ್ಠ ದರ ಮಿತಿಯನ್ನು ವಿಧಿಸಬೇಕು ಎಂದು ರಾಷ್ಟ್ರೀಯ ವೈದ್ಯ ಮಂಡಳಿ ಒತ್ತಾಯಿಸಿದೆ.
ಅಲೈಯನ್ಸ್ ಆಫ್ ಡಾಕ್ಟರ್ಸ್ ಫಾರ್ ಎಥಿಕಲ್ ಹೆಲ್ತ್ಕೇರ್ (ಎಡಿಇಎಚ್) ನಾನಾ ವಿಧದ ಶಸತ್ರ ಚಿಕಿತ್ಸೆ ಮತ್ತು ವೈದ್ಯಕೀಯ ಸಲಕರಣೆಗಳ ವೆಚ್ಚಗಳ ಬಗ್ಗೆ ರಾಷ್ಟ್ರೀಯ ಔಷಧ ದರ ಪ್ರಾಧಿಕಾರಕ್ಕೆ (ಎನ್ಪಿಪಿಎ) ವಿವರವಾದ ವರದಿ ಸಲ್ಲಿಸಿದೆ.
ಹೃದಯ ಚಿಕಿತ್ಸೆಗೆ ಸಂಬಂಧಿಸಿದ ವೆಚ್ಚ ಇಳಿಕೆಯ ನಂತರ ಸರಕಾರ ಮಂಡಿ ಶಸ್ತ್ರ ಚಿಕಿತ್ಸೆಯ ವೆಚ್ಚಕ್ಕೂ ಮಿತಿ ವಿಧಿಸಿದೆ. ಈಗಿನ ವೆಚ್ಚದಲ್ಲಿ ಶೇ.70ಕ್ಕೂ ಹೆಚ್ಚು ಕಡಿತಗೊಳಿಸಲಾಗಿದೆ. ಮಂಡಿ ಶಸ್ತ್ರ ಚಿಕಿತ್ಸೆ ವೆಚ್ಚವು ಈಗ 54,000 ರೂ.ಗಳಿಂದ 1.14 ಲಕ್ಷ ರೂ. ತನಕ ಇಳಿದಿದೆ.
ಇದೀಗ ಇತರ ಔಷಧ, ಆಪರೇಷನ್, ವೈದ್ಯಕೀಯ ಸಲಕರಣೆಗಳ ವೆಚ್ಚಗಳನ್ನೂ ತಗ್ಗಿಸಲುವ ಸಮಯ ಬಂದಿದೆ ಎಂದು ಎಡಿಇಎಚ್ ಹೇಳಿದೆ.
ವೈದ್ಯಕೀಯ ದರಗಳ ಬಗ್ಗೆ ಪರಾಮರ್ಶೆ ನಡೆಸಲು ಸರಕಾರ ಉನ್ನತ ಮಟ್ಟದ ಸಮಿತಿಯೊಂದನ್ನು ರಚಿಸಿತ್ತು. ಅದು ಔಷಧಗಳ ದರದಲ್ಲಿ ಗಣನೀಯ ಇಳಿಕೆಗೆ ಶಿಫಾರಸು ಮಾಡಿತ್ತು. ಆದರೆ ಅದರ ವರದಿಯನ್ನು ಸರಕಾರ ಬಹಿರಂಗಪಡಿಸಬೇಕು ಎಂದು ಎಡಿಇಎಚ್ ಒತ್ತಾಯಿಸಿದೆ.