ಕಾರು ಮಾರಾಟ ಚೇತರಿಕೆ

ಬೆಂಗಳೂರು: ಕೊನೆಗೂ ಆಟೊಮೊಬೈಲ್‌ ವಲಯ ದಲ್ಲಿಕಾರುಗಳ ಮಾರಾಟ ದಲ್ಲಿಚೇತರಿಕೆಯ ಲಕ್ಷಣ ಕಾಣಿಸಿದೆ! ಕಳೆದ ವರ್ಷ ಸೆಪ್ಟೆಂಬರ್‌ ಹಾಗೂ ಈ ವರ್ಷ ಸೆಪ್ಟೆಂಬರ್‌ ನಡುವೆ ಹೋಲಿಸಿದರೆ ಆಟೊಮೊಬೈಲ್‌ ವ್ಯಾಪಾರ ಕಡಿಮೆಯಾಗಿದ್ದರೂ, ಈ ವರ್ಷ ಆಗಸ್ಟ್‌ಗೆ ಹೋಲಿಸಿದರೆ ಸೆಪ್ಟೆಂಬರ್‌ನಲ್ಲಿಏರಿಕೆಯಾಗಿರು ವುದು ಗಮನಾರ್ಹ!

ಪ್ರಮುಖ ಆಟೊಮೊಬೈಲ್‌ ಕಂಪನಿಗಳ ಅಂಕಿ ಅಂಶಗಳು ಈ ಚೇತರಿಕೆಯನ್ನು ಬಿಂಬಿಸಿವೆ. ಹೀಗಾಗಿ ಆಟೊ ಮೊಬೈಲ್‌ ಕಂಪನಿಗಳಿಗೆ ಇದು ತುಸು ನಿರಾಳ ಮೂಡಿಸಿದೆ. ಭಾರಿ ಡಿಸ್ಕೌಂಟ್‌ ಮತ್ತು ಇತರ ಅನುಕೂಲಗಳನ್ನು ಗ್ರಾಹಕರಿಗೆ ಕಂಪನಿಗಳು ಘೋಷಿಸಿರುವುದು ಮಾರುಕಟ್ಟೆಯ ಮೇಲೆ ಸಕಾರಾತ್ಮಕ ಪ್ರಭಾವ ಬೀರಿದೆ ಎಂದು ಉದ್ಯಮ ವಲಯದ ತಜ್ಞರು ಅಭಿಪ್ರಾಯ ಪಟ್ಟಿದ್ದಾರೆ. ಉದಾಹರಣೆಗೆ ಮಾರುಕಟ್ಟೆ ದಿಗ್ಗಜ ಮಾರುತಿ ಸುಜುಕಿ ಇಂಡಿಯಾ ಕಂಪನಿಯು ಕಳೆದ ಆಗಸ್ಟ್‌ನಲ್ಲಿ1,06,413 ಕಾರುಗಳನ್ನು ಮಾರಾಟ ಮಾಡಿದ್ದರೆ, ಸೆಪ್ಟೆಂಬರ್‌ನಲ್ಲಿ1,22,640 ಕಾರುಗಳನ್ನು ಮಾರಾಟ ಮಾಡಿದೆ. ವಾರ್ಷಿಕ ಆಧಾರದಲ್ಲಿ, ಅಂದರೆ ಈ ವರ್ಷ ಸೆಪ್ಟೆಂಬರ್‌ಗೂ, ಕಳೆದ ವರ್ಷ ಸೆಪ್ಟೆಂಬರ್‌ಗೆ ಹೋಲಿಸಿದರೆ ಶೇ.24.4ರಷ್ಟು ವಹಿವಾಟು ಇಳಿದಿದ್ದರೆ, ಈ ವರ್ಷ ಆಗಸ್ಟ್‌-ಸೆಪ್ಟೆಂಬರ್‌ ಅವಧಿಯಲ್ಲಿಶೇ.15.1 ವೃದ್ಧಿಸಿದೆ. ಇದರೊಂದಿಗೆ ಮಾರಾಟ ಸುಧಾರಣೆಯ ಲಕ್ಷಣ ಕಂಡು ಬಂದಿದೆ. ಮಾರುತಿ ಸುಜುಕಿ ಮಾತ್ರವಲ್ಲದೆ, ಮಹೀಂದ್ರಾ ಆ್ಯಂಡ್‌ ಮಹೀಂದ್ರಾ, ಅಶೋಕ್‌ ಲೇಲ್ಯಾಂಡ್‌, ಟಿವಿಎಸ್‌ ಮೋಟಾರ್‌, ಬಜಾಜ್‌ ಆಟೊ ಮುಂತಾದ ಕಂಪನಿಗಳ ಸೇಲ್ಸ್‌ ಆಗಸ್ಟ್‌-ಸೆಪ್ಟೆಂಬರ್‌ ನಡುವೆ ಚೇತರಿಸಿದೆ. ಹಬ್ಬದ ಸೀಸನ್‌ ದೀಪಾವಳಿಯ ತನಕ ಮುಂದುವರಿಯುವುದರಿಂದ ಮತ್ತಷ್ಟು ಗ್ರಾಹಕರು ಕಾರು , ದ್ವಿಚಕ್ರ ವಾಹನ ಇತ್ಯಾದಿಗಳನ್ನು ಖರೀದಿಸುವ ಸಾಧ್ಯತೆ ಇದೆ. ವಹಿವಾಟು ಕೂಡ ಸುಧಾರಿಸುವ ನಿರೀಕ್ಷೆ ಇದೆ ಎನ್ನುತ್ತಾರೆ ತಜ್ಞರು.