ದೀಪಾವಳಿಗೆ ಮೆಗಾ ಬಂಡವಾಳ ಹಿಂತೆಗೆತಕ್ಕೆ ಕೇಂದ್ರ ಸಜ್ಜು

ಹೊಸದಿಲ್ಲಿ: ಬೆಂಗಳೂರಿನ ಬೆಮೆಲ್‌ ಸೇರಿದಂತೆ ಹಲವಾರು ಸಾರ್ವಜನಿಕ ವಲಯದ ಕಂಪನಿಗಳಿಂದ ತನ್ನ ಬಂಡವಾಳವನ್ನು ಹಿಂತೆಗೆದುಕೊಳ್ಳಲು ಕೇಂದ್ರ ಸರಕಾರ ಸಿದ್ಧತೆ ನಡೆಸಿದೆ. ಕಾರ್ಯದರ್ಶಿಗಳ ಮಟ್ಟದ ಸಮಿತಿಯು ಸೋಮವಾರ ಭಾರತ್‌ ಪೆಟ್ರೋಲಿಯಂ ಕಾರ್ಪ್ (ಬಿಪಿಸಿಎಲ್‌), ಬೆಮೆಲ್‌, ಕಂಟೈನರ್‌ ಕಾರ್ಪೊರೇಷನ್‌ ಆಫ್‌ ಇಂಡಿಯಾ, ಶಿಪ್ಪಿಂಗ್‌ ಕಾರ್ಪೊರೇಷನ್‌ ಆಫ್‌ ಇಂಡಿಯಾದಿಂದ ಷೇರುಗಳ ವಿಕ್ರಯಕ್ಕೆ ಅನುಮತಿ ನೀಡಿದೆ.

ಇದೇ ವೇಳೆ ಟಿಎಚ್‌ಡಿಸಿ ಇಂಡಿಯಾ, ನೀಪ್ಕೊ ಎಂಬ ಎರಡು ವಿದ್ಯುತ್‌ ವಲಯದ ಕಂಪನಿಗಳನ್ನು ಸಾರ್ವಜನಿಕ ವಲಯದ ಎನ್‌ಟಿಪಿಸಿ ಖರೀದಿಸಲಿದೆ.

ಏರ್‌ ಇಂಡಿಯಾದ ಷೇರು ಮಾರಾಟ ಕುರಿತ ಪೇಪರ್‌ ವರ್ಕ್ ಶೀಘ್ರ ಅಂತಿಮವಾಗಲಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ. ಏರ್‌ ಇಂಡಿಯಾದ ಸುಮಾರು 30,000 ಕೋಟಿ ರೂ. ಸಾಲವನ್ನು ಸರಕಾರ ತಾನೇ ತಲೆ ಮೇಲೆ ಹೊತ್ತುಕೊಳ್ಳಲಿದೆ. ಪ್ರಸಕ್ತ ಸಾಲಿನಲ್ಲಿ ಬಂಡವಾಳ ಹಿಂತೆಗೆತದ ಮೂಲಕ 1.05 ಲಕ್ಷ ಕೋಟಿ ರೂ. ಸಂಗ್ರಹಿಸುವ ಗುರಿಯನ್ನು ಸರಕಾರ ಹೊಂದಿದೆ.

ಬಿಪಿಸಿಎಲ್‌ನ ಸದ್ಯದ ಮಾರುಕಟ್ಟೆ ಮೌಲ್ಯ 55,000 ಕೋಟಿ ರೂಪಾಯಿಗಳಾಗಿದೆ. ಬೆಮೆಲ್‌ನಲ್ಲಿಸರಕಾರ ಶೇ. 54ರಷ್ಟು ಷೇರುಗಳನ್ನು ಹೊಂದಿದ್ದು, 2,100 ಕೋಟಿ ರೂ. ಮೌಲ್ಯವಿದೆ. ಕಂಟೈನರ್‌ ಕಾರ್ಪೊರೇಷನ್‌ ಆಫ್‌ ಇಂಡಿಯಾದಲ್ಲಿ ಶೇ. 54.8 ಷೇರುಗಳನ್ನು ಹೊಂದಿದ್ದು 20,000 ಕೋಟಿ ರೂ. ಮೌಲ್ಯ ಇದೆ. ಎಸ್‌ಸಿಐನಲ್ಲಿ ಶೇ. 73.75 ಷೇರುಗಳನ್ನು ಹೊಂದಿದ್ದು, 1,300 ಕೋಟಿ ರೂ. ಮೌಲ್ಯವಿದೆ.