ಇಎಸ್‌ಐ ವಂತಿಗೆ ದರ ಕಡಿತ

ಹೊಸದಿಲ್ಲಿ: ನೌಕರರ ಆರೋಗ್ಯ ವಿಮಾ (ಇಎಸ್‌ಐ) ಯೋಜನೆಗೆ ಕಂಪನಿಯ ಮಾಲೀಕರು ಮತ್ತು ಉದ್ಯೋಗಿಗಳಿಂದ ಸಂದಾಯವಾಗುತ್ತಿದ್ದ ವಿಮೆ ವಂತಿಗೆ ಪಾಲಿನಲ್ಲಿ ಕಡಿತ ಮಾಡಿ ಕೇಂದ್ರ ಸರಕಾರ ಆದೇಶ ಹೊರಡಿಸಿದೆ.

ಸದ್ಯ ಶೇ.6.5ರಷ್ಟಿರುವ ಉದ್ಯೋಗಿ ಮತ್ತು ಮಾಲೀಕರ ವಿಮೆ ವಂತಿಗೆ ಪಾಲನ್ನು ಶೇ.4ಕ್ಕೆ ಇಳಿಕೆ ಮಾಡಲಾಗಿದೆ. ಇದರಿಂದ ಕಂಪನಿಗಳಿಗೆ ವಾರ್ಷಿಕ 5,000 ಕೋಟಿ ರೂ. ಉಳಿತಾಯವಾಗಲಿದೆ ಎಂದು ಅಂದಾಜಿಸಲಾಗಿದೆ.

ಸರಕಾರದ ಈ ಕ್ರಮದಿಂದ ಮಾಲೀಕರ ಆರೋಗ್ಯ ವಂತಿಗೆ ಪಾಲು ಶೇ.4.75ರಿಂದ 3.25ಕ್ಕೆ ಇಳಿಕೆಯಾದರೆ, ಉದ್ಯೋಗಿಗಳ ವಂತಿಗೆ ಪಾಲು ಶೇ.1.75ರಿಂದ 0.75ಕ್ಕೆ ಇಳಿಕೆಯಾಗಲಿದೆ. ಇಎಸ್‌ಐ ವಿಮೆ ಕಡಿತದ ಈ ಆದೇಶ ಜುಲೈ 1ರಿಂದ ಜಾರಿಗೆ ಬರಲಿದೆ. ಇದರಿಂದ ದೇಶದ 3.6 ಕೋಟಿ ಉದ್ಯೋಗಿಗಳಿಗೆ ಮತ್ತು 12.85 ಲಕ್ಷ ಮಾಲೀಕರಿಗೆ ಉಳಿತಾಯ ಅನುಕೂಲವಾಗಲಿದೆ ಎಂದು ಕೇಂದ್ರ ಕಾರ್ಮಿಕ ಸಚಿವಾಲಯ ಪ್ರಕಟಣೆ ತಿಳಿಸಿದೆ.

2018-19ರ ಸಾಲಿನಲ್ಲಿ ಉದ್ಯೋಗಿಗಳು ಮತ್ತು ಮಾಲೀಕರಿಂದ ಇಎಸ್‌ಐಗೆ ಸಂದಾಯವಾದ ಆರೋಗ್ಯ ವಿಮೆಯ ಒಟ್ಟು ಮೊತ್ತ 22,279 ಕೋಟಿ ರೂ.ಗಳು.