ವಿಡಿಯೊಕಾನ್‌ ಸಾಲ: ಚಂದಾ ಕೊಚ್ಚಾರ್‌ಗೆ ‘ಲಾಭ’?

ಹೊಸದಿಲ್ಲಿ : ವಿಡಿಯೊಕಾನ್‌ ಸಮೂಹಕ್ಕೆ ಐಸಿಐಸಿಐ ನೀಡಿರುವ ಸಾವಿರಾರು ಕೋಟಿ ರೂ. ಸಾಲದಿಂದ ಬ್ಯಾಂಕಿನ ಸಿಇಒ ಚಂದಾ ಕೊಚ್ಚಾರ್‌ ಭಾರಿ 'ಲಾಭ' ಪಡೆದಿದ್ದಾರೆ ಎಂದು ಇಂಡಿಯನ್‌ ಇನ್ವೆಸ್ಟರ್ಸ್‌ ಪ್ರೊಟೆಕ್ಷನ್‌ ಕೌನ್ಸಿಲ್‌ನ ಟ್ರಸ್ಟಿ ಅರವಿಂದ್‌ ಗುಪ್ತಾ ಆರೋಪಿಸಿದ್ದಾರೆ.

''ಚಂದಾ ಕೊಚ್ಚಾರ್‌ ಹಾಗೂ ಅವರ ಕುಟುಂಬವು ಈ ಸಾಲದಿಂದ ಅಕ್ರಮವಾಗಿ ಲಾಭ ಪಡೆದಿರುವುದು ಮೇಲ್ನೋಟಕ್ಕೆ ಗೊತ್ತಾಗುತ್ತಿದೆ. ಭಾರಿ ನಷ್ಟದಲ್ಲಿದ್ದ ಕಂಪನಿಗೆ ದೊಡ್ಡ ಮೊತ್ತದ ಸಾಲವನ್ನು ಬ್ಯಾಂಕ್‌ ಹೇಗೆ ಕೊಟ್ಟಿದೆ ಎಂಬುದರ ಬಗ್ಗೆ ಸರಕಾರ ತನಿಖೆ ಮಾಡಬೇಕು'' ಎಂದು ಗುಪ್ತಾ ಒತ್ತಾಯಿಸಿದ್ದಾರೆ.

ಚಂದಾ ಕೊಚ್ಚಾರ್‌ ಅವರ ಪರಿ ದೀಪಕ್‌ ಕೊಚ್ಚಾರ್‌ ಈ ಸಾಲದ ವ್ಯವಹಾರದಲ್ಲಿ ಪರೋಕ್ಷ ಲಾಭ ಗಳಿಸಿದ್ದಾರೆ ಎಂಬುದು ಗುಪ್ತಾ ಆರೋಪ. ವಿಡಿಯೊಕಾನ್‌ ಸಮೂಹದ ಮುಖ್ಯಸ್ಥ ವೇಣುಗೋಪಾಲ್‌ ಧೂತ್‌ ತಮ್ಮ ಸಮೂಹದಿಂದ ಸುಪ್ರೀಂ ಎನರ್ಜಿ ಎಂಬ ಇನ್ನೊಂದು ಕಂಪನಿಗೆ ಹಣ ವರ್ಗಾಯಿಸಿದ್ದರು. ಅದರಲ್ಲಿ ಅವರು 90 ಪರ್ಸೆಂಟ್‌ ಷೇರು ಹೊಂದಿದ್ದರು. ನಂತರ ಆ ಕಂಪನಿಯನ್ನು ದೀಪಕ್‌ ಕೊಚ್ಚಾರ್‌ ಅವರಿಗೆ ವರ್ಗಾಯಿಸಲಾಗಿದೆ ಎಂದು ಗುಪ್ತಾ ದೂರಿದ್ದಾರೆ.

ಐಸಿಐಸಿಐ ಬ್ಯಾಂಕ್‌ ವಿಡಿಯೊಕಾನ್‌ಗೆ ಕೆಲ ವರ್ಷಗಳ ಹಿಂದೆ 3,250 ಕೋಟಿ ರೂ. ಸಾಲ ನೀಡಿತ್ತು. ಆದರೆ ಸಾಲದ 80 ಪರ್ಸೆಂಟ್‌ ಮೊತ್ತವೂ ಮರು ಪಾವತಿಯಾಗಿಲ್ಲ. 2017ರಲ್ಲಿ ಈ ಸಾಲ ಸುಸ್ತಿಸಾಲ ಎಂದು ಘೋಷಣೆಯಾಗಿತ್ತು.