ಚಂಡೀಗಢ, ಈಗ ಸೀಮೆ ಎಣ್ಣೆ ಮುಕ್ತ ಮೊದಲ ನಗರ

ಹೊಸದಿಲ್ಲಿ: ಬೆಳಕು ಮತ್ತು ಅಡುಗೆ ಸಲುವಾಗಿ ಸೀಮೆಎಣ್ಣೆಯನ್ನು ಆಧರಿಸಿದ್ದ ಚಂಡೀಗಢ ನಗರದ ಕುಟುಂಬಗಳನ್ನು ಎಲ್‌ಪಿಜಿಯತ್ತ ಕೊಂಡೊಯ್ದಿದ್ದು, ಇದು ಮೊದಲ ಸೀಮೆಎಣ್ಣೆ ಮುಕ್ತ ನಗರವಾಗಿ ರೂಪುಗೊಂಡಿದೆ.

‘‘ಸಂಪೂರ್ಣವಾಗಿ ಸೀಮೆಎಣ್ಣೆ ಬಳಕೆಯನ್ನು ಇಲ್ಲಿ ನಿಲ್ಲಿಸಲಾಗಿದೆ. ಬೆಳಕು ಮತ್ತು ಅಡುಗೆಗೆ ಸಬ್ಸಿಡಿದರದಲ್ಲಿ ಈವರೆಗೆ ವಿತರಿಸುತ್ತಿದ್ದ ಸೀಮೆಎಣ್ಣೆಯನ್ನು ಈ ಏಪ್ರಿಲ್‌ನಿಂದ ಸರಕಾರ ಸ್ಥಗಿತಗೊಳಿಸಿದ್ದು, ಎಲ್ಲರಿಗೂ ಎಲ್‌ಪಿಜಿ ಸೌಲಭ್ಯ ಒದಗಿಸಲಾಗಿದೆ. ಮತ್ತೆ ಸೀಮೆಎಣ್ಣೆ ವಿತರಿಸುವ ಪ್ರಮೇಯವೇ ಇಲ್ಲ,’’ ಎಂದು ಪೆಟ್ರೋಲಿಯಂ ಸಚಿವಾಲಯದ ಪ್ರಕಟಣೆ ತಿಳಿಸಿದೆ.

ಚಂಡೀಗಢವನ್ನು ಸೀಮೆಎಣ್ಣೆ ಮುಕ್ತ ನಗರವಾಗಿ ಪರಿವರ್ತಿಸುವ ನಿಟ್ಟಿನಲ್ಲಿ ಪೆಟ್ರೋಲಿಯಂ ಸಚಿವಾಲಯವು ನಗರದ ಆಡಳಿತ ವ್ಯವಸ್ಥೆಯೊಂದಿಗೆ ಕಳೆದ ಕೆಲವು ತಿಂಗಳಿಂದ ಸತತವಾಗಿ ಕೆಲಸ ಮಾಡಿದೆ.

‘‘ಸರಕಾರಿ ಒಡೆತನದ ಎಲ್‌ಪಿಜಿ ರಿಟೇಲರ್‌ಗಳು ನಗರದ ವಿವಿಧೆಡೆ ಕ್ಯಾಂಪ್‌ಗಳನ್ನು ಮಾಡಿ ಎಲ್ಲರಿಗೂ ಎಲ್‌ಪಿಜಿ ಸಂಪರ್ಕ ಕಲ್ಪಿಸುವಲ್ಲಿ ಶ್ರಮಿಸಿದ್ದಾರೆ. ಠೇವಣಿ ಇಲ್ಲದೇ ಬಿಬಿಎಲ್‌(ಬಡತನ ರೇಖೆಗಿಂತ ಕೆಳಗಿನ ವರ್ಗ) ಕುಟುಂಬಗಳಿಗೆ ಎಲ್‌ಪಿಜಿ ಸಂಪರ್ಕ ನೀಡಲಾಗಿದೆ. ಎಪಿಎಲ್‌(ಬಡತನ ರೇಖೆಗಿಂತ ಮೇಲಿರುವ ವರ್ಗ) ಕುಟುಂಬಗಳಿಗೆ ಎಲ್‌ಪಿಜಿ ಸಲುವಾಗಿ ಬಡ್ಡಿರಹಿತ ಸಾಲ ಸೌಲಭ್ಯವನ್ನೂ ಕಲ್ಪಿಸಲಾಗಿತ್ತು,’’ ಎಂದು ಪ್ರಕಟಣೆಯಲ್ಲಿ ಹೇಳಲಾಗಿದೆ.

ಚಂಡೀಗಢದಲ್ಲಿ ನಡೆದ ಎಲ್‌ಪಿಜಿ ಆಂದೋಲನದಲ್ಲಿ ಬಿಬಿಎಲ್‌ ಕುಟುಂಬಗಳಿಗೆ 1574 ಸೇರಿದಂತೆ ಒಟ್ಟು 15,249 ನೂತನ ಎಲ್‌ಪಿಜಿ ಸಂಪರ್ಕಗಳನ್ನು ನೀಡಲಾಗಿದೆ.