ಯುಎಸ್‌ಎಲ್‌ಗೂ ಮಲ್ಯಗೆ ಸಂಬಂಧ ಇಲ್ಲ

ಬೆಂಗಳೂರು: ಯುಎಸ್‌ಎಲ್‌(ಯುನೈಟೆಡ್‌ ಸ್ಪಿರಿಟ್ಸ್‌ ಲಿ.) ಕಂಪನಿ ಹಾಗೂ ವಿಜಯ್‌ ಮಲ್ಯಗೆ ಯಾವುದೇ ಸಂಬಂಧ ಇಲ್ಲ. ಹೀಗಾಗಿ ಮಲ್ಯರ ಸಾಲ ಮರುಪಾವತಿ ವಿಚಾರವಾಗಿ ಯುಎಸ್‌ಎಲ್‌ ಷೇರುಗಳ ಮಾರಾಟಕ್ಕೆ ಐಡಿಬಿಐ ಬ್ಯಾಂಕ್‌ ವಿಧಿಸಿರುವ ಷರತ್ತನ್ನು ರದ್ದುಗೊಳಿಸಬೇಕು ಎಂದು ಕೇಂದ್ರದ ಮಾಜಿ ಸಚಿವರೂ ಆದ ಹಿರಿಯ ವಕೀಲ ಪಿ.ಚಿದಂಬರಂ ಹೈಕೋರ್ಟ್‌ ಮುಂದೆ ವಾದಿಸಿದರು.

ಯುಎಸ್‌ಎಲ್‌ ಸಲ್ಲಿಸಿರುವ ಅರ್ಜಿ ವಿಚಾರಣೆ ನಡೆಸಿದ ನ್ಯಾ. ಎಚ್‌.ಟಿ.ನರೇಂದ್ರಪ್ರಸಾದ್‌ ಅವರಿದ್ದ ಏಕ ಸದಸ್ಯ ಪೀಠದ ಮುಂದೆ ಪಿ.ಚಿದಂಬರಂ ಅವರು ಎರಡು ಗಂಟೆಗೂ ಹೆಚ್ಚು ಕಾಲ ವಾದ ಮಂಡಿಸಿದರು. ''ಪ್ರಕರಣದಲ್ಲಿ ತನ್ನ ಅರ್ಜಿದಾರರ ತಪ್ಪಿಲ್ಲ. ವಿನಾಕಾರಣ ಬ್ಯಾಂಕ್‌ ಆಡಳಿತ ಮಂಡಳಿಯು ತನ್ನ ಕಕ್ಷಿದಾರನ ಷೇರುಗಳನ್ನು ಹಿಡಿದಿಟ್ಟುಕೊಂಡಿದ್ದು, ಅವುಗಳನ್ನು ಬೇಷರತ್‌ ಬಿಡುಗಡೆ ಮಾಡಲು ನಿರ್ದೇಶಿಸಬೇಕು,'' ಎಂದು ಮನವಿ ಮಾಡಿದರು.

''ಯುಎಸ್‌ಎಲ್‌ ತಾನು ಪಡೆದಿದ್ದ 625 ಕೋಟಿ ರೂ. ಸಾಲವನ್ನು 2013ರ ಜೂ.6ರಂದೇ ಮರು ಪಾವತಿ ಮಾಡಿದೆ. ಈ ಮೊತ್ತಕ್ಕೆ ಬಡ್ಡಿಯನ್ನೂ ಪಾವತಿಸಲಾಗಿದೆ. ವಿಜಯ್‌ ಮಲ್ಯ ಕಿಂಗ್‌ ಫಿಷರ್‌ ಏರ್‌ಲೈನ್ಸ್‌ಗೆ ಸಾಲ ಪಡೆದಿದ್ದು, ಅದಕ್ಕೂ ಯುಎಸ್‌ಎಲ್‌ಗೂ ತಾಳೆ ಹಾಕುವಂತಿಲ್ಲ.,'' ಎಂದು ಚಿದಂಬರಂ ವಾದಿಸಿದರು. ವಿಚಾರಣೆಯನ್ನು ಮಾ.21ಕ್ಕೆ ಮುಂದೂಡಲಾಯಿತು.