ಗಡಿ ಬಿಕ್ಕಟ್ಟಿನ ನಡುವೆಯೂ 3 ದಶಕದಲ್ಲೇ ಮೊದಲ ಬಾರಿಗೆ ಭಾರತದಿಂದ ಅಕ್ಕಿ ತರಿಸಿಕೊಂಡ ಚೀನಾ

ಮುಂಬಯಿ: ಕಳೆದ ಮೂರು ದಶಕದಲ್ಲೇ ಮೊದಲ ಬಾರಿಗೆ ಚೀನಾ ಭಾರತದಿಂದ ಅಕ್ಕಿ ಆಮದು ಮಾಡಿಕೊಳ್ಳಲು ಆರಂಭಿಸಿದೆ. ಅಕ್ಕಿ ಪೂರೈಕೆಯಲ್ಲಿ ವ್ಯತ್ಯಯವಾಗಿರುವುದರಿಂದ ಹಾಗೂ ಭಾರತ ರಿಯಾಯಿತಿ ದರದ ಆಫರ್‌ ನೀಡಿದ್ದರಿಂದ ಚೀನಾ ಅಕ್ಕಿ ಖರೀದಿಸಿದೆ ಎಂದು ಭಾರತದ ಅಧಿಕಾರಿಗಳು ಹೇಳಿದ್ದಾರೆ.

ವಿಶ್ವದಲ್ಲೇ ಭಾರತ ಅಕ್ಕಿಯ ಅತೀ ದೊಡ್ಡ ರಫ್ತುದಾರನಾಗಿದ್ದರೆ, ಚೀನಾ ಅತೀ ಹೆಚ್ಚು ಆಮದು ಮಾಡಿಕೊಳ್ಳುವ ದೇಶವಾಗಿದೆ. ಪ್ರತಿ ವರ್ಷ ಚೀನಾ 40 ಲಕ್ಷ ಟನ್‌ ಅಕ್ಕಿಯನ್ನು ವಿದೇಶಗಳಿಂದ ಆಮದು ಮಾಡಿಕೊಳ್ಳುತ್ತದೆ. ಆದರೆ ಗುಣಮಟ್ಟ ಕಡಿಮೆ ಎಂಬ ನೆಪ ಒಡ್ಡಿ ಭಾರತದಿಂದ ಆಮದು ಮಾಡಿಕೊಳ್ಳುತ್ತಿರಲಿಲ್ಲ.

ಆದರೆ ಲಡಾಖ್‌ ಗಡಿಯಲ್ಲಿ ಎರಡೂ ದೇಶಗಳ ನಡುವೆ ಗಡಿ ಬಿಕ್ಕಟ್ಟು ಉದ್ವಿಗ್ನವಾಗಿರುವಾಗಲೇ ಚೀನಾ ಭಾರತದಿಂದ ಅಕ್ಕಿ ಆಮದು ಮಾಡಿಕೊಳ್ಳಲು ಆರಂಭಿಸಿರುವುದು ಗಮನಾರ್ಹ.

ರಾಷ್ಟ್ರೀಯ ಭದ್ರತೆ ನೆಪ ಒಪ್ಪಲು ಸಾಧ್ಯವಿಲ್ಲ: ಆ್ಯಪ್ ಬ್ಯಾನ್ ಹೊಡೆತ ಸಹಿಸದಾದ ಚೀನಾ ರಾಯಭಾರ ಕಚೇರಿ!
“ಇದೇ ಮೊದಲ ಬಾರಿಗೆ ಚೀನಾ ಅಕ್ಕಿ ಖರೀದಿಸಿದೆ. ಬಹುಶಃ ಭಾರತದ ಬೆಳೆಯ ಗುಣಮಟ್ಟ ನೋಡಿ ಮುಂದಿನ ವರ್ಷ ಅಕ್ಕಿ ಖರೀದಿಯನ್ನು ಮತ್ತಷ್ಟು ಹೆಚ್ಚಿಸಬಹುದು," ಎಂದು ಅಕ್ಕಿ ರಫ್ತುದಾರರ ಸಂಘಟನೆಯ ಅಧ್ಯಕ್ಷ ಬಿ.ವಿ. ಕೃಷ್ಣ ರಾವ್‌ ಹೇಳಿದ್ದಾರೆ.

ಡಿಸೆಂಬರ್‌ - ಫೆಬ್ರವರಿ ನಡುವೆ 1 ಲಕ್ಷ ಟನ್‌ ರಫ್ತಿಗೆ ವ್ಯಾಪಾರಿಗಳು ಆರ್ಡರ್‌ ಪಡೆದುಕೊಂಡಿದ್ದಾರೆ. ಪ್ರತಿ ಟನ್‌ಗೆ 300 ಡಾಲರ್‌ (22,127 ರೂ. ) ದರ ಸಿಕ್ಕಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ಚೀನಾದ ಸಾಂಪ್ರದಾಯಿಕ ಪೂರೈಕೆದಾರರಾದ ಥೈಲ್ಯಾಂಡ್‌, ವಿಯೆಟ್ನಾಂ, ಮ್ಯಾನ್ಮಾರ್‌ ಮತ್ತು ಪಾಕಿಸ್ತಾನಗಳು ಹೆಚ್ಚುವರಿ ಅಕ್ಕಿ ಪೂರೈಕೆಯನ್ನು ಕಡಿತ ಮಾಡಿದ್ದು, ಭಾರತದ ದರಕ್ಕೆ ಹೋಲಿಸಿದರೆ ಪ್ರತಿ ಟನ್‌ಗೆ 30 ಡಾಲರ್‌ ಹೆಚ್ಚುವರಿ ದರ ಕೇಳುತ್ತಿವೆ ಎಂದು ಅಕ್ಕಿ ವ್ಯಾಪಾರದ ಅಧಿಕಾರಿಗಳು ಮಾಹಿತಿ ನಿಡಿದ್ದಾರೆ.