ಚೀನಾದ ಆರ್ಥಿಕ ಬೆಳವಣಿಗೆ ಶೇ.6.8

ಬೀಜಿಂಗ್‌: ಮೊದಲ ತ್ರೈಮಾಸಿಕದಲ್ಲಿ ಚೀನಾದ ಆರ್ಥಿಕ ಬೆಳವಣಿಗೆಯು ಶೇ.6.8ಕ್ಕೆ ವೃದ್ಧಿಸಿದೆ. ಹಣಕಾಸಿನ ತೊಡಕುಗಳು, ಮಾಲೀನ್ಯದ ಸಮಸ್ಯೆಗಳು, ಅಮೆರಿಕದೊಂದಿಗಿನ ವಾಣಿಜ್ಯ ತಿಕ್ಕಾಟ ಸೇರಿದಂತೆ ನಾನಾ ಸಮಸ್ಯೆಗಳನ್ನು ಮೀರಿ, ಚೀನಾ ಆರ್ಥಿಕತೆಯು ನಿರೀಕ್ಷೆಗಿಂತಲೂ ಹೆಚ್ಚಿನದಾಗಿ ಚೇತರಿಕೆ ಕಂಡಿದೆ.

ವಿಶ್ವದ ನಂ.2 ಆರ್ಥಿಕತೆಯ ಚೀನಾ ದೇಶವು ಮೊದಲ ತ್ರೈಮಾಸಿಕದಲ್ಲಿ ಶೇ.6.7ರ ಆರ್ಥಿಕ ಬೆಳವಣಿಗೆ ಸಾಧಿಸಬಹುದು ಎಂದು ವಿತ್ತ ವಿಶ್ಲೇಷಕರು ಅಂದಾಜು ಮಾಡಿದ್ದರು. ಅದನ್ನು ಮೀರಿ ಬೆಳವಣಿಗೆ ದಾಖಲಾಗಿದೆ. ''ದೇಶದ ಆರ್ಥಿಕತೆಯು ಸ್ಥಿರತೆ ಕಾಯ್ದುಕೊಳ್ಳಲಿದೆ. ತ್ವರಿತವಾಗಿ ಚೇತರಿಕೆ ಕಾಣುತ್ತಿದೆ. ಮೊದಲ ತ್ರೈಮಾಸಿಕವು ಆಶಾದಾಯಕವಾಗಿ ಆರಂಭಗೊಂಡಿದೆ,'' ಎಂದು ರಾಷ್ಟ್ರೀಯ ಅಂಕಿಅಂಶಗಳ ಸಂಸ್ಥೆಯ ವಕ್ತಾರ ಕ್ಸಿಂಗ್‌ ಜಿಯಾಂಗ್‌ ಹೇಳಿದ್ದಾರೆ.

ಅಮೆರಿಕ ಮತ್ತು ಚೀನಾ ನಡುವಿನ ವಾಣಿಜ್ಯ ತಿಕ್ಕಾಟಗಳು ಇತ್ತೀಚಿನ ದಿನಗಳಲ್ಲಿ ಇನ್ನಷ್ಟು ತೀವ್ರಗೊಳ್ಳುತ್ತಿವೆ. ನೂರಾರು ಸರಕುಗಳಿಗೆ ಪರಸ್ಪರ ಆಮದು ಸುಂಕಗಳನ್ನು ಹೆಚ್ಚಿಸುತ್ತಿದ್ದು, ಎಚ್ಚರಿಕೆ ಸಂದೇಶಗಳು ರವಾನೆಯಾಗಿವೆ. ಈ ಎಲ್ಲದರ ಪ್ರಭಾವವು ಮುಂದಿನ ತ್ರೈಮಾಸಿಕದಲ್ಲಿ ಸ್ಪಷ್ಟವಾಗಲಿದೆ.