ಕೊರೊನಾ ಬಿಕ್ಕಟ್ಟಿನ ನಡುವೆಯೂ ಚೀನಾ ಜಿಡಿಪಿ ಶೇ. 4.9ಕ್ಕೆ ಏರಿಕೆ!

ಬೀಜಿಂಗ್: ಕೋವಿಡ್‌ ಬಿಕ್ಕಟ್ಟಿನಿಂದಾಗಿ ಮೊದಲ ತ್ರೈಮಾಸಿಕದಲ್ಲಿ ಪಾತಾಳಕ್ಕೆ ಕುಸಿದಿದ್ದ ಚೀನಾ ಆರ್ಥಿಕತೆ, ಮೂರನೇ ತ್ರೈಮಾಸಿಕದ ಹೊತ್ತಿಗೆ ಗಮನಾರ್ಹವಾಗಿ ಚೇತರಿಸಿಕೊಂಡಿದ್ದು ಜಿಡಿಪಿ ಶೇ. 4.9ಕ್ಕೆ ಏರಿಕೆಯಾಗಿದೆ.

ಮೊದಲ ತ್ರೈಮಾಸಿಕದಲ್ಲಿ ಜಿಡಿಪಿ ಶೇ. 6.8ರಷ್ಟು ಕುಸಿದಿತ್ತು. ಇದು ಕಳೆದ 44 ವರ್ಷಗಳಲ್ಲಿನ ಕನಿಷ್ಠ ಮಟ್ಟವಾಗಿತ್ತು. ಎರಡನೇ ತ್ರೈಮಾಸಿಕದಲ್ಲಿ ಜಿಡಿಪಿ ಶೇ. 3.2ಕ್ಕೆ ಏರಿತ್ತು. ಬೇಡಿಕೆ ವೃದ್ಧಿ ಮತ್ತು ಗ್ರಾಹಕರ ಅನುಭೋಗ ಹೆಚ್ಚಳಕ್ಕೆ ಸರಕಾರ ಕೈಗೊಂಡಿದ್ದ ಕ್ರಮಗಳು ಫಲ ನೀಡಿದ್ದು, ಜುಲೈ-ಸೆಪ್ಟೆಂಬರ್‌ನ ಮೂರನೇ ತ್ರೈಮಾಸಿಕದಲ್ಲಿ ಚೀನಾ ಜಿಡಿಪಿ ಇನ್ನಷ್ಟು ಪುಟಿದೆದ್ದಿದೆ.

ವಿಶ್ವದ ಎರಡನೇ ಬೃಹತ್‌ ಆರ್ಥಿಕತೆಯ ದೇಶವಾದ ಚೀನಾಕ್ಕೆ ವರ್ಷದ ಆರಂಭದಲ್ಲಿ ಕೋವಿಡ್‌ ತೀವ್ರ ಹೊಡೆತ ನೀಡಿತ್ತು. ಆದರೆ, ತ್ವರಿತವಾಗಿಯೇ ಆರ್ಥಿಕತೆ ಚೇತರಿಕೆ ಕಂಡಿದೆ ಎಂದು ರಾಷ್ಟ್ರೀಯ ಅಂಕಿ ಅಂಶಗಳ ಸಂಸ್ಥೆ(ಎನ್‌ಬಿಎಸ್‌) ಸೋಮವಾರ ಹೇಳಿದೆ.

2020ರಲ್ಲಿ ಭಾರತದ ಜಿಡಿಪಿ ಶೇ.10.3ರಷ್ಟು ಕುಸಿತ, 2021ರಲ್ಲಿ ಪುಟಿದೇಳಲಿದೆ ಆರ್ಥಿಕತೆ: ಐಎಂಎಫ್‌
ಅಪಾಯವೂ ಇದೆ!

ಮೂರನೇ ತ್ರೈಮಾಸಿಕದಲ್ಲಿ ಜಿಡಿಪಿ ವೃದ್ಧಿಯಾಗಿದ್ದರೂ, ಚೀನಾಗೆ ಅಪಾಯ ಇನ್ನೂ ದೂರವಾಗಿಲ್ಲ. "ಅಂತಾರಾಷ್ಟ್ರೀಯ ಪರಿಸರವು ಇನ್ನೂ ಸಂಕೀರ್ಣವಾಗಿದೆ ಮತ್ತು ತೀವ್ರವಾಗಿದೆ. ಕೊರೊನಾ ವೈರಸ್‌ ಮತ್ತೆ ಮರುಕಳಿಸದಂತೆ ತಡೆಯುವ ಹೆಚ್ಚಿನ ಒತ್ತಡವನ್ನು ಚೀನಾ ಎದುರಿಸುತ್ತಿದೆ,’’ ಎಂದು ಎನ್‌ಬಿಎಸ್‌ ಎಚ್ಚರಿಸಿದೆ.

ಐಎಂಎಫ್‌ ಇತ್ತೀಚೆಗೆ ಬಿಡುಗಡೆ ಮಾಡಿದ ವರದಿ ಪ್ರಕಾರ, ಚೀನಾ ಜಿಡಿಪಿ 2020ರಲ್ಲಿ 1.9% ವೃದ್ಧಿಯಾಗಲಿದೆ.

ಚೀನಾ ಮಾಡಿದ್ದೇನು?

• ಕೋವಿಡ್‌ ಬಿಕ್ಕಟ್ಟು ತಿಳಿಗೊಳಿಸಲು ವಿತ್ತೀಯ ವೆಚ್ಚದಲ್ಲಿ ಏರಿಕೆ.
• ತೆರಿಗೆ ರಿಯಾಯಿತಿಗಳು.
• ಬ್ಯಾಂಕ್‌ನ ಬಡ್ಡಿ ದರಗಳಲ್ಲಿ ಕಡಿತ.
• ಉದ್ಯೋಗ ಹೆಚ್ಚಳಕ್ಕೆ ಕ್ರಮ.