ಕಾಳಧನದ ಅಂದಾಜು: ಮಾಹಿತಿ ಇಲ್ಲ ಎಂದ ಕೇಂದ್ರ ಸರಕಾರ

ಹೊಸದಿಲ್ಲಿ: ಸ್ವಿಜರ್ಲೆಂಡ್‌ನಿಂದ ದೊರೆತಿರುವ ಕಾಳಧನ ಪ್ರಕರಣಗಳ ಮಾಹಿತಿಯನ್ನು ಬಹಿರಂಗ ಪಡಿಸಲು ಸಾಧ್ಯವಿಲ್ಲ ಎಂದು ಕೇಂದ್ರ ಸರಕಾರ ಹೇಳಿದೆ. ಅಲ್ಲದೇ, ''ದೇಶದ ಒಳಗೆ ಮತ್ತು ಹೊರಗೆ ಚಲಾವಣೆಯಲ್ಲಿರುವ ಕಾಳಧನದ ಮೊತ್ತ ಎಷ್ಟೆಂಬ ಅಂದಾಜು ತನ್ನ ಬಳಿ ಇಲ್ಲ,'' ಎಂದು ಹಣಕಾಸು ಸಚಿವಾಲಯ ಹೇಳಿದೆ.

ಮಾಹಿತಿ ಹಕ್ಕು ಕಾಯ್ದೆ(ಆರ್‌ಟಿಐ) ಅಡಿಯಲ್ಲಿ ಕೇಳಲಾದ ಪ್ರಶ್ನೆಯೊಂದಕ್ಕೆ ಉತ್ತರಿಸಿರುವ ಹಣಕಾಸು ಸಚಿವಾಲಯವು, ''ಗೌಪ್ಯತೆ ಕಾಯ್ದುಕೊಳ್ಳುವ ನಿಟ್ಟಿನಲ್ಲಿ ಮಾಹಿತಿ ನೀಡಲಾಗದು,'' ಎಂದಿದೆ. ಭಾರತ ಮತ್ತು ಸ್ಜಿಜರ್ಲೆಂಡ್‌ಗಳು ತನಿಖೆ ಆಧಾರದ ಮೇಲೆ ಕಾಳಧನ ಪ್ರಕರಣಗಳ ಮಾಹಿತಿಯನ್ನು ಪರಸ್ಪರ ವಿನಿಮಯ ಮಾಡಿಕೊಳ್ಳುತ್ತವೆ. ಉಭಯ ದೇಶಗಳ ಮಧ್ಯೆ 2016ರಲ್ಲಿ ಈ ಕುರಿತಾಗಿ ದ್ವಿಪಕ್ಷೀಯ ಒಪ್ಪಂದವೂ ಆಗಿದೆ. ''ಸ್ವಿಜರ್ಲೆಂಡ್‌ನಿಂದ ದೊರೆತ ಕಪ್ಪು ಹಣ ಪ್ರಕರಣಗಳ ಮಾಹಿತಿ, ವ್ಯಕ್ತಿ ಅಥವಾ ಸಂಸ್ಥೆಯ ಹೆಸರು ಹಾಗೂ ಪ್ರಕರಣಗಳ ಸಂಬಂಧ ಸರಕಾರ ತೆಗೆದುಕೊಂಡ ಕ್ರಮ ಏನು?'' ಎಂಬುದಾಗಿ ಆರ್‌ಟಿಐ ಅರ್ಜಿದಾರರು ಪ್ರಶ್ನೆ ಕೇಳಿದ್ದರು.