ವೇತನ ನಿಯಮದಲ್ಲಿ ಬದಲಾವಣೆ, ಏಪ್ರಿಲ್‌ನಿಂದ ಟೇಕ್‌ ಹೋಮ್‌ ಸಂಬಳ ಕಡಿತ ಸಾಧ್ಯತೆ

ಹೊಸದಿಲ್ಲಿ: ಹೊಸ ವೇತನ ನಿಯಮ ಜಾರಿಗೆ ಕೇಂದ್ರ ಸರಕಾರ ಮುಂದಾಗಿದ್ದು, ಕರಡು ನಿಯಮಗಳನ್ನು ಬಿಡುಗಡೆ ಮಾಡಿದೆ. ಇದರ ಪ್ರಕಾರ ಕಂಪನಿಗಳು ತಮ್ಮ ಸಿಬ್ಬಂದಿಗಳ ವೇತನದ ಸ್ವರೂಪದಲ್ಲಿ ಬದಲಾವಣೆ ಮಾಡಬೇಕಿದೆ. ಹೀಗಾದಲ್ಲಿ ಸಿಬ್ಬಂದಿಗಳ ಕೈಗೆ ಸಿಗುವ ವೇತನದ ಪ್ರಮಾಣ ಒಂದಿಷ್ಟು ಕಡಿಮೆಯಾಗುವ ಸಾಧ್ಯತೆ ಇದೆ.

ನೂತನ ಕಾಂಪನ್ಸೇಷನ್ ನಿಯಮಗಳು 2019ರ ವೇತನ ಸಂಹಿತೆಯ ಭಾಗವಾಗಿದ್ದು, ಮುಂದಿನ ಆರ್ಥಿಕ ವರ್ಷದಿಂದ ಅಂದರೆ ಏಪ್ರಿಲ್‌ನಿಂದ ಜಾರಿಗೆ ಬರುವ ಸಾಧ್ಯತೆ ಇದೆ.

ನಿಯಮದಲ್ಲಿ ಏನಿದೆ?

ಹೊಸ ನಿಯಮದ ಪ್ರಕಾರ ಕಂಪನಿಗಳು ನೀಡುವ ಭತ್ಯೆ ಪ್ರಮಾಣ ಒಟ್ಟು ವೇತನದ ಶೇ. 50ನ್ನು ಮೀರುವಂತಿಲ್ಲ. ಇದರ ಅರ್ಥ ಒಟ್ಟು ವೇತನದ ಶೇ.50 ಅಥವಾ ಅದಕ್ಕಿಂತ ಹೆಚ್ಚು ಮೂಲ ವೇತನ (ಬೇಸಿಕ್‌)ವೇ ಆಗಿರಬೇಕು.

ಹೆಚ್ಚಿನ ಖಾಸಗಿ ಕಂಪನಿಗಳು ಮೂಲ ವೇತನವನ್ನು ಒಟ್ಟು ವೇತನದ ಅರ್ಧಕ್ಕಿಂತಲೂ ಕಡಿಮೆ ಇಟ್ಟಿರುತ್ತವೆ. ಇದನ್ನು ಏರಿಕೆ ಮಾಡಬೇಕಾಗಿ ಬಂದಲ್ಲಿ, ಭವಿಷ್ಯ ನಿಧಿ (ಪಿಎಫ್‌) ಪ್ರಮಾಣವನ್ನೂ ಹೆಚ್ಚಿಸಬೇಕಾಗುತ್ತದೆ. ಇದರಿಂದ ಟೇಕ್‌ ಹೋಂ ಸಂಬಳ ಕಡಿಮೆಯಾಗಲಿದೆ. ಆದರೆ ಪಿಂಚಣಿ ನಿಧಿ ಹೆಚ್ಚಲಿದೆ.

ಹೊಸ ನಿಯಮ ಜಾರಿಗೆ ಬರುತ್ತಿದ್ದಂತೆ ಕಂಪನಿಗಳು ತಮ್ಮ ಸಿಬ್ಬಂದಿಗಳ ವೇತನವನ್ನು ಹೊಸ ನಿಯಮಕ್ಕೆ ತಕ್ಕಂತೆ ಪರಿಷ್ಕರಣೆ ಮಾಡಬೇಕಿದೆ. ಖಾಸಗಿ ರಂಗದ ಉದ್ಯೋಗಿಗಳ ಮೇಲೆ ಇದು ಪರಿಣಾಮ ಬೀರುವ ಎಲ್ಲಾ ಸಾಧ್ಯತೆ ಇದೆ. ಕಾರಣ ಖಾಸಗಿ ಕಂಪನಿಗಳ ಉದ್ಯೋಗಿಗಳಿಗೆ ಹೆಚ್ಚಿನ ಪ್ರಮಾಣದ ವೇತನವನ್ನು ಭತ್ಯೆ ರೂಪದಲ್ಲಿಯೇ ನೀಡುತ್ತವೆ.

ಆದರೆ ಈ ನಿಯಮಗಳಿಂದ ಹೆಚ್ಚಿನ ಸಾಮಾಜಿಕ ಭದ್ರತೆ ಸಿಗಲಿದೆ, ಜೊತೆಗೆ ನಿವೃತ್ತಿಯ ವೇಳೆ ಸಿಗುವ ಪ್ರಯೋಜನಗಳು ಹೆಚ್ಚಾಗಲಿವೆ ಎಂದು ತಜ್ಞರು ಹೇಳಿದ್ದಾರೆ. ಆದರೆ ತಿಂಗಳಂತ್ಯಕ್ಕೆ ಕೈಗೆ ಸಿಗುವ ಸಂಬಳದ ಪಾಲು ಮಾತ್ರ ಕಡಿಮೆಯಾಗಲಿದೆ.