LPG Cylinder: ಎಲ್‌ಪಿಜಿ ಸಿಲಿಂಡರ್‌ ಸೇವೆಗೆ ಕಾಮನ್‌ ಸರ್ವಿಸ್ ಸೆಂಟರ್‌

ಹೊಸದಿಲ್ಲಿ: ಗ್ರಾಮೀಣ ಪ್ರದೇಶಗಳಲ್ಲಿ ಎಲ್‌ಪಿಜಿ ಸಂಪರ್ಕ ವೃದ್ಧಿಸುವ ನಿಟ್ಟಿನಲ್ಲಿ ಇಂಧನ ಮಾರಾಟದ ಕಂಪನಿಗಳಾದ(ಒಎಂಸಿ) ಭಾರತ್‌ ಪೆಟ್ರೋಲಿಯಂ, ಇಂಡಿಯನ್‌ ಆಯಿಲ್‌ ಮತ್ತು ಹಿಂದೂಸ್ಥಾನ್‌ ಪೆಟ್ರೋಲಿಯಂ ಮಹತ್ವದ ತೀರ್ಮಾನ ಕೈಗೊಂಡಿವೆ.

ಎಲ್‌ಪಿಜಿ ಸಿಲಿಂಡರ್‌ ಬುಕ್‌ ಮಾಡಲು ಮತ್ತು ರೀಫಿಲಿಂಗ್‌ಗೆ ಒಂದೇ ಸೇವಾ ಕೇಂದ್ರಗಳನ್ನು ಬಳಸಲು ಇಂಧನ ಕಂಪನಿಗಳು ಒಪ್ಪಂದಕ್ಕೆ ಸಹಿ ಹಾಕಿವೆ. ದೇಶದಲ್ಲಿ ಮೂರು ಲಕ್ಷ ಕಾಮನ್‌ ಸರ್ವಿಸ್ ಸೆಂಟರ್‌(ಸಿಎಸ್‌ಸಿ) ಮೂಲಕ ಎಲ್‌ಪಿಜಿ ಸೇವೆಯನ್ನು ಗ್ರಾಹಕರಿಗೆ ತಲುಪಿಸುವುದು ಒಪ್ಪಂದದ ಸಾರ.

ಒಪ್ಪಂದದ ಪ್ರಕಾರ ಗ್ರಾಮ ಮಟ್ಟದ ಪ್ರತಿನಿಧಿಯು(ವಿಎಲ್‌ಇ), ಈ ಸೇವಾ ಕೇಂದ್ರ ನಿರ್ವಹಣೆ ಮಾಡಲಿದ್ದಾರೆ. ಹೊಸ ಎಲ್‌ಪಿಜಿ ಸಂಪರ್ಕಕ್ಕೆ 20 ರೂಪಾಯಿ, ರೀ-ಫಿಲ್ಲಿಂಗ್‌ಗೆ 2 ರೂ., ಸಿಎಸ್‌ಸಿ ವ್ಯಾಪ್ತಿಯಲ್ಲಿ ಸಿಲಿಂಡರ್‌ಗಳ ವಿತರಣೆಗೆ 10 ರೂ.ಗಳನ್ನು ಪಡೆಯಲಿದ್ದಾರೆ ಎಂದು ಇಂಧನ ಸಚಿವ ಧರ್ಮೇಂದ್ರ ಪ್ರಧಾನ್‌ ತಿಳಿಸಿದ್ದಾರೆ.

ದೇಶದಲ್ಲಿನ ಎಲ್‌ಪಿಜಿ ಸಂಪರ್ಕಗಳ ಸಂಖ್ಯೆ 25 ಕೋಟಿ ಮುಟ್ಟಿದೆ. ಉಜ್ವಲ ಖಾತೆಗಳು 5.75 ಕೋಟಿ ಇವೆ.