ರೈಲ್ವೆ ಸಿಗ್ನಲ್‌ಗಳು ಆಟೋಮೇಷನ್‌ಗೆ 78 ಸಾವಿರ ಕೋಟಿ ರೂ.

ಹೊಸದಿಲ್ಲಿ: ರೈಲ್ವೆ ಸಿಗ್ನಲ್‌ ವ್ಯವಸ್ಥೆಯನ್ನು ಸಂಪೂರ್ಣ ಆಟೋಮೇಷನ್‌ಗೊಳಿಸಲು 78 ಸಾವಿರ ಕೋಟಿ ರೂ.ಖರ್ಚಾಗಲಿದೆ. ಇದೂ ಸೇರಿದಂತೆ ರೈಲ್ವೆ ಸುರಕ್ಷತೆಯ ಯೋಜನೆಗಳು ಪ್ರಸಕ್ತ ಕೇಂದ್ರ ಬಜೆಟ್‌ನಲ್ಲಿ ಆದ್ಯತೆ ಪಡೆಯಲಿವೆ ಎಂದು ಮೂಲಗಳು ಹೇಳಿವೆ.

ಫೆ.1ರಂದು ಹಣಕಾಸು ಸಚಿವ ಅರುಣ್‌ ಜೇಟ್ಲಿ ಮಂಡಿಸುವ ಬಜೆಟ್‌ನಲ್ಲಿ ರೈಲ್ವೆ ಇಲಾಖೆಯು 65,000 ಕೋಟಿ ರೂ. ಬಜೆಟ್‌ ಅನುದಾನ(ಜಿಬಿಎಸ್‌) ಪಡೆಯುವ ನಿರೀಕ್ಷೆ ಇದೆ. ಇದು ಕಳೆದ ವರ್ಷಕ್ಕೆ ಹೋಲಿಸಿದರೆ 10,000 ಕೋಟಿ ರೂ. ಹೆಚ್ಚುವರಿಯಾಗಿದೆ. ಸರಕಾರದ ಬಜೆಟ್‌, ಆಂತರಿಕ ಸಂಪನ್ಮೂಲ ಕ್ರೋಡೀಕರಣಗಳ ಮೂಲಕ ಸುರಕ್ಷತಾ ವ್ಯವಸ್ಥೆಗಳನ್ನು ರೈಲ್ವೆ ಇಲಾಖೆ ರೂಪಿಸಲಿದೆ.

''ರೈಲ್ವೆ ಸಿಗ್ನಲ್‌ಗೆ ಸಂಬಂಧಿಸಿದ ಅತ್ಯಾಧುನಿಕ ಆಟೋಮೇಷನ್‌ ವ್ಯವಸ್ಥೆಯಿಂದ ಸುರಕ್ಷತೆ ಮತ್ತು ರೈಲಿನ ವೇಗ ಏರಿಕೆಯಾಗಲಿದೆ,'' ಎಂದು ರೈಲ್ವೆ ಸಚಿವಾಲಯದ ಹಿರಿಯ ಅಧಿಕಾರಿಯೊಬ್ಬರು ಹೇಳಿದ್ದಾರೆ. ಕಳೆದ ಸಲದಿಂದ ಕೇಂದ್ರ ಬಜೆಟ್‌ನಲ್ಲಿ ರೈಲ್ವೆ ಬಜೆಟ್‌ ವಿಲೀನವಾಗಲಿದ್ದು, ಈ ಸಲ ಹೆಚ್ಚಿನ ಅನುದಾನವನ್ನು ನಿರೀಕ್ಷಿಸಲಾಗಿದೆ.

ಕಳೆದ ಬಜೆಟ್‌ನಲ್ಲಿ ರೂಪಿಸಲಾಗಿದ್ದ 1 ಲಕ್ಷ ಕೋಟಿ ರೂ.ಗಳ ರೈಲು ಸುರಕ್ಷಾ ಕೋಶವು ಮುಂದುವರಿಯಲಿದೆ.