LPG ಸಿಲಿಂಡರ್‌ ಮನೆ ಡೆಲಿವರಿಗೆ ಗ್ರಾಹಕರು ಶುಲ್ಕ ಕೊಡಬೇಕಿಲ್ಲ, ಎಷ್ಟೇ ಮಹಡಿ ಇದ್ದರೂ ಫ್ರೀ ಡೆಲಿವರಿ!

ಹೊಸದಿಲ್ಲಿ: ಅಡುಗೆ ಅನಿಲದ ಸಿಲಿಂಡರನ್ನು ಮನೆಗೆ ಸರಬರಾಜು ಮಾಡುವ ವ್ಯಕ್ತಿಗೆ ಗ್ರಾಹಕರು ಡೆಲಿವರಿ ಶುಲ್ಕ ನೀಡುವ ಅಗತ್ಯವಿಲ್ಲ ಎಂದು ಹಿಂದೂಸ್ಥಾನ್‌ ಪೆಟ್ರೋಲಿಯಂ ಕಾರ್ಪೊ-ರೇಷನ್‌ ಲಿಮಿಟೆಡ್‌(ಎಚ್‌ಪಿಸಿಎಲ್‌) ಹೇಳಿದೆ. ಇದು ಈ ಕಂಪನಿ ಮಾತ್ರವಲ್ಲ, ಇತರೆ ಎಲ್ಲ ಕಂಪನಿಗಳ ಗ್ರಾಹಕರಿಗೂ ಅನ್ವಯವಾಗುತ್ತದೆ.

ಹೈದರಾಬಾದ್‌ನ ಗ್ರಾಹಕರೊಬ್ಬರು ಮಾಹಿತಿ ಹಕ್ಕಿನಡಿ ಕೇಳಿದ ಪ್ರಶ್ನೆಗೆ ಉತ್ತರಿಸಿರುವ ಎಚ್‌ಪಿಸಿಎಲ್‌, ''ಗ್ರಾಹಕರ ಮನೆಗೆ ಗ್ಯಾಸ್‌ ಸಿಲಿಂಡರ್‌ ತಲುಪಿಸುವುದು ವಿತರಕರ ಜವಾಬ್ದಾರಿ. ಗ್ರಾಹಕರ ಮನೆಯು ಯಾವುದೇ ಮಹಡಿಯಲ್ಲಿದ್ದರೂ ಸರಬರಾಜು ಶುಲ್ಕವನ್ನು ಕೇಳುವಂತಿಲ್ಲ. ಬಿಲ್‌ನಲ್ಲಿ ನಮೂದಾಗಿರುವುದಕ್ಕಿಂತಲೂ ಹೆಚ್ಚಿನ ಮೊತ್ತವನ್ನು ಯಾರೂ ಕೇಳುವಂತಿಲ್ಲ,'' ಎಂದು ಹೇಳಿದೆ.

''ಸಿಲಿಂಡರ್‌ ತಂದು ಕೊಡುವ ವ್ಯಕ್ತಿಯು ಬಿಲ್‌ಗಿಂತಲೂ ಹೆಚ್ಚಿನ ಹಣ ಕೇಳಿದರೆ, ಗ್ರಾಹಕರು ನಿರಾಕರಿಸಬೇಕು,'' ಎಂದು ಎಚ್‌ಪಿಸಿಎಲ್‌ ಹೇಳಿದೆ. ಕೆಲವೆಡೆ ಸಿಲಿಂಡರ್‌ ಮನೆ ಡೆಲಿವರಿಗೆ ವಿತರಕರು ಹಣ ಪಡೆಯುತ್ತಾರೆ ಎನ್ನುವ ಆರೋಪವಿದೆ. ಇದೀಗ ಈ ಆರೋಪಕ್ಕೆ ಸ್ಪಷ್ಟನೆ ಸಿಕ್ಕಿದಂತೆ ಆಗಿದೆ.

ಮಿಸ್‌ ಕಾಲ್‌ ಕೊಟ್ಟು ನಿಮ್ಮ ಎಲ್‌ಪಿಜಿ ಸಿಲಿಂಡರ್‌ ಬುಕ್‌ ಮಾಡಿ!