ಕೊರೊನಾ ಎಫೆಕ್ಟ್‌, ಶೇ. 40 ಸಾರಿಗೆ, ಪ್ರವಾಸೋದ್ಯಮ ಕಂಪನಿಗಳಿಗೆ ಸಂಪೂರ್ಣ ಬಂದ್‌

ಮುಂಬಯಿ: ದೇಶೀಯ ವಿಮಾನ ಸೇವೆ ಎರಡು ತಿಂಗಳ ಬಳಿಕ ಆರಂಭವಾಗಿದೆ. ಆದಾಗ್ಯೂ, ಟ್ರಾವೆಲ್‌ ಮತ್ತು ಟೂರಿಸಂ ವಲಯದಲ್ಲಿ ಕಾರ್ಯನಿರ್ವಹಿಸುತ್ತಿರುವ ದೇಶದ ಶೇ.40ರಷ್ಟು ಕಂಪನಿಗಳು ಮುಂದಿನ 3 ರಿಂದ 6 ತಿಂಗಳಲ್ಲಿ ಸಂಪೂರ್ಣ ಸ್ಥಗಿತಗೊಳ್ಳುವ ಅಪಾಯವನ್ನು ಎದುರಿಸುತ್ತಿವೆ.

ಇದರಲ್ಲಿ ಶೇ. 36ರಷ್ಟು ಕಂಪನಿಗಳು ತಾತ್ಕಾಲಿಕವಾಗಿ ಸೇವೆ ಸ್ಥಗಿತಗೊಳಿಸಬಹುದು ಎಂದು ಬಾಟ್‌ ಟ್ರಾವೆಲ್‌ ಸೆಂಟಿಮೆಂಟ್‌ ಟ್ರ್ಯಾಕರ್‌ ವರದಿಯಲ್ಲಿ ಹೇಳಲಾಗಿದೆ. ವರದಿ ಪ್ರಕಾರ, ಶೇ. 81 ರಷ್ಟು ಟ್ರಾವೆಲ್‌ ಮತ್ತು ಟೂರಿಸಂ ಕಂಪನಿಗಳು ಶೇ. 100ರಷ್ಟು ಆದಾಯವನ್ನು ನಷ್ಟ ಮಾಡಿಕೊಂಡಿವೆ. ಶೇ. 15ರಷ್ಟು ಕಂಪನಿಗಳ ಆದಾಯ ಶೇ. 75ರ ತನಕ ಕುಸಿದಿದೆ.

‘‘ಪ್ರವಾಸೋದ್ಯಮ ಮತ್ತು ಸಾರಿಗೆ ವಲಯಕ್ಕೆ ಕೋವಿಡ್‌ನಿಂದ ದೊಡ್ಡ ಹೊಡೆತ ಬಿದ್ದಿದೆ. ಶೇ.38.6ರಷ್ಟು ಟ್ರಾವೆಲ್‌ ಕಂಪನಿಗಳು ಉದ್ಯೋಗ ಕಡಿತಕ್ಕೆ ಮುಂದಾಗಿವೆ. ಈ ವಲಯದಲ್ಲಿನ ಸಾವಿರಾರು ಕಂಪನಿಗಳ ಉಳಿವಿಗೆ ಸರಕಾರವು ನೆರವು ನೀಡಬೇಕು,’’ ಎಂದು ಭಾರತೀಯ ಟ್ರಾವೆಲ್‌ ಏಜೆಂಟ್‌ಗಳ ಸಂಘಟನೆಯ ಅಧ್ಯಕ್ಷ ಜ್ಯೋತಿ ಮಾಯಾಳ್‌ ಒತ್ತಾಯಿಸಿದ್ದಾರೆ.