ಬೆಂಗಳೂರು: ಕೊರೊನಾ ವೈರಸ್‌ ಮಹಾಮಾರಿಯ ಕಾರಣಕ್ಕೆ ಉದ್ಯಮಗಳಿಗೆ ಭಾರಿ ಹೊಡೆತ ಬೀಳುತ್ತಿದ್ದು, ಆಪ್‌ ಆಧಾರಿತ ಟಾಕ್ಸಿ ಸೇವೆ ನೀಡುವ ಓಲಾ ತನ್ನ 1,400 ಸಿಬ್ಬಂದಿಗಳನ್ನು ಕೆಲಸದಿಂದ ತಗೆದು ಹಾಕಲು ನಿರ್ಧರಿಸಿದೆ.

ಕೊರೊನಾದಿಂದ ಓಲಾದ ಆದಾಯಕ್ಕೆ ಹೊಡೆತ ಬಿದ್ದಿದೆ ಎಂಬುದಾಗಿ ತನ್ನ ಸಿಬ್ಬಂದಿಗಳಿಗೆ ಕಳುಹಿಸಿದ ಸಂದೇಶದಲ್ಲಿ ಕಂಪನಿಯ ಸಹ ಸಂಸ್ಥಾಪಕ ಮತ್ತು ಸಿಇಒ ಭವಿಷ್‌ ಅಗರ್‌ವಾಲ್‌ ಹೇಳಿದ್ದಾರೆ. ದೇಶದಲ್ಲಿ ಲಾಕ್‌ಡೌನ್‌ 4.0 ಜಾರಿಯಾಗಿರುವ ಬೆನ್ನಲ್ಲೇ ಸಿಬ್ಬಂದಿಗಳನ್ನು ಕೆಲಸದಿಂದ ತೆಗೆದು ಹಾಕುವ ನಿರ್ಧಾರವನ್ನು ಓಲಾ ಹೊರಹಾಕಿದೆ.

ಕಳೆದ ಎರಡು ತಿಂಗಳಲ್ಲಿ ಓಲಾದ ಆದಾಯ ಶೇ. 95ರಷ್ಟು ಕುಸಿತವಾಗಿದೆ. "ದುರದೃಷ್ಟವಶಾತ್, ಕೋವಿಡ್‌ ಬಿಕ್ಕಟ್ಟು ನಮ್ಮ ಸುತ್ತಲೂ ಹಿಂದೆಂದೂ ಕಂಡರಿಯದ ಆರ್ಥಿಕ ಮತ್ತು ಸಾಮಾಜಿಕ ವಿನಾಶಕ್ಕೆ ಕಾರಣವಾಗಿದೆ. ಶೀಘ್ರದಲ್ಲಿ ಜಗತ್ತು ಯಾವುದೇ ಕಾರಣಕ್ಕೂ ಕೊರೊನಾ ಪೂರ್ವ ಕಾಲಕ್ಕೆ ಮರಳುವುದಿಲ್ಲ,” ಎಂಬುದಾಗಿ ಭವಿಷ್‌ ಅಗರ್‌ವಾಲ್‌ ತಿಳಿಸಿದ್ದಾರೆ.

ಈ ತಿಂಗಳು ಮತ್ತೆ 3 ಸಾವಿರ ಜಾಬ್‌ ಕಟ್‌ ಎಂದ ಉಬರ್‌!

ಮಾರ್ಚ್‌ 25 ರಿಂದ ದೇಶದಲ್ಲೆಡೆ ಲಾಕ್‌ಡೌನ್‌ ಜಾರಿಯಾಗುತ್ತಿದ್ದಂತೆ ಟ್ಯಾಕ್ಸಿ ಸೇವೆ ನೀಡುವ ಸಂಸ್ಥೆಗಳಿಗೆ ಭಾರಿ ಹೊಡೆತ ಬಿದ್ದಿತ್ತು. ಕರ್ನಾಟಕದಲ್ಲಿ ಲಾಕ್‌ಡೌನ್‌ ನಿಯಮಗಳನ್ನು ಸಡಿಲಗೊಳಿಸಿದ್ದರಿಂದ ಮಂಗಳವಾರದಿಂದ ಬೆಂಗಳೂರು, ಮಂಗಳೂರು, ಹುಬ್ಬಳ್ಳಿ ಧಾರವಾಡ ಮತ್ತು ಮೈಸೂರಿನಲ್ಲಿ ಓಲಾ ತನ್ನ ಸೇವೆ ಆರಂಭಿಸಿದೆ. ಆದರೆ ಹಿಂದಿನಂತೆ ಜನರು ಓಡಾಡುತ್ತಿಲ್ಲ ಮತ್ತು ಕ್ಯಾಬ್‌ಗಳನ್ನೂ ಬಳಸುತ್ತಿಲ್ಲ. ಜೊತೆಗೆ ಒಂದು ಕ್ಯಾಬ್‌ನಲ್ಲಿ ಇಬ್ಬರು ಮಾತ್ರ ಪ್ರಯಾಣಿಸಬಹುದು ಎಂಬ ಷರತ್ತುಗಳನ್ನೂ ರಾಜ್ಯ ಸರಕಾರ ಹೇರಿದೆ.