GeM ನೋಂದಣಿಗೆ ಉತ್ಪನ್ನದ ಮೂಲ ದೇಶದ ಮಾಹಿತಿ ಕಡ್ಡಾಯ; ಮೇಕ್‌ ಇನ್‌ ಇಂಡಿಯಾ ಉತ್ತೇಜನಕ್ಕೆ ಕೇಂದ್ರದ ಕ್ರಮ

ಹೊಸದಿಲ್ಲಿ: ಪ್ರಮುಖ ಬೆಳವಣಿಗೆಯಲ್ಲಿ ಕೇಂದ್ರ ಸರಕಾರ ಮೇಕ್‌ ಇನ್‌ ಇಂಡಿಯಾ ಹಾಗೂ ಆತ್ಮ ನಿರ್ಭರ ಭಾರತ ಯೋಜನೆಯನ್ನು ಉತ್ತೇಜಿಸಲು ಸರಕಾರಿ ಇ-ಮಾರುಕಟ್ಟೆ (GeM-Government e-Marketplace)ಯಲ್ಲಿ ಮಾರಲು ಬಯಸುವ ಉತ್ಪನ್ನಗಳ ನೋಂದಣಿಗೆ ಉತ್ಪನ್ನದ ಮೂಲ ದೇಶದ ಮಾಹಿತಿಯನ್ನು ನಮೂದಿಸುವುದನ್ನು ಕಡ್ಡಾಯಗೊಳಿಸಿದೆ.

ಜಿಇಎಂನಲ್ಲಿ ಎಲ್ಲ ಹೊಸ ಉತ್ಪನ್ನಗಳನ್ನು ನೋಂದಾಯಿಸುವಾಗ ಮಾರಾಟಗಾರರು ಉತ್ಪನ್ನಗಳ ಮೂಲ ದೇಶವನ್ನು (Country of Origin) ನಮೂದಿಸುವುದನ್ನು ಕಡ್ಡಾಯಗೊಳಿಸಿ ವಾಣಿಜ್ಯ ಹಾಗೂ ಕೈಗಾರಿಕಾ ಸಚಿವಾಲಯ ಆದೇಶ ಹೊರಡಿಸಿದೆ. ಇದರ ಜೊತೆ ಜಿಇಎಂನಲ್ಲಿ ಉತ್ಪನ್ನಗಳನ್ನು ನೋಂದಾಯಿಸುವಾಗ ಸ್ಥಳೀಯ ಉತ್ಪನ್ನದ ಶೇಕಡಾವಾರು ಪ್ರಮಾಣವನ್ನು ನಮೂದಿಸುವ ಅವಕಾಶವನ್ನು ಕೂಡ ಕೇಂದ್ರ ಸರಕಾರ ನೀಡಿದೆ.

ಕೇಂದ್ರ ತಂದಿರುವ ಹೊಸ ವೈಶಿಷ್ಟ್ಯದೊಂದಿಗೆ, ಈಗ ಎಲ್ಲಾ ವಸ್ತುಗಳ ಉತ್ಪನ್ನದ ಮೂಲ ದೇಶ ಮತ್ತು ಸ್ಥಳೀಯ ಉತ್ಪನ್ನಗಳ ಶೇಕಡಾವಾರು ಅಂಶ ಗ್ರಾಹಕರಿಗೆ ಸ್ಪಷ್ಟವಾಗಿ ಗೊತ್ತಾಗಲಿದೆ. ಈಗಾಗಲೇ ಜಿಇಎಂನಲ್ಲಿ ತಮ್ಮ ಉತ್ಪನ್ನಗಳನ್ನು ಅಪ್‌ಲೋಡ್ ಮಾಡಿದ ಮಾರಾಟಗಾರರಿಗೆ ದೇಶದ ಮೂಲವನ್ನು ನವೀಕರಿಸಲು ನಿಯಮಿತವಾಗಿ ಸೂಚನೆ ನೀಡಲಾಗುತ್ತದೆ. ಆಗಲೂ ಮಾಹಿತಿ ನೀಡಿಲ್ಲ ಎಂದರೆ ಜಿಇಎಂ ವೇದಿಕೆಯಿಂದ ಉತ್ಪನ್ನಗಳನ್ನು ತೆಗೆದುಹಾಕಲಾಗುವುದು ಎಂದು ಸಚಿವಾಲಯ ತನ್ನ ಹೇಳಿಕೆಯಲ್ಲಿ ತಿಳಿಸಿದೆ.

Foxconn: ಮೇಕ್‌ ಇನ್ ಇಂಡಿಯಾಗೆ ಮತ್ತಷ್ಟು ಸಾಥ್ ನೀಡಲಿದೆ ತೈವಾನ್ ಕಂಪನಿ

ಇನ್ನು, ಮೇಕ್‌ ಇನ್‌ ಇಂಡಿಯಾ ಫಿಲ್ಟರ್‌ನ್ನು ಕೂಡ ಜಿಇಎಂ ವೇದಿಕೆಯಲ್ಲಿ ಸಕ್ರಿಯಗೊಳಿಸಲಾಗಿದೆ. ಇದರಿಂದ ಕನಿಷ್ಠ ಶೇ.50ರಷ್ಟು ಸ್ಥಳೀಯ ಮಾನದಂಡಗಳನ್ನು ಪೂರೈಸುವ ಉತ್ಪನ್ನಗಳನ್ನು ಮಾತ್ರ ಖರೀದಿಸುವ ಆಯ್ಕೆಯನ್ನು ಖರೀದಿದಾರರಿಗೆ ನೀಡುವ ವೈಶಿಷ್ಟ್ಯವನ್ನು ಸಚಿವಾಲಯ ಪರಿಚಯಿಸಿದೆ.

ನಮ್ಮ ಮೆಟ್ರೊದ ಚೀನಾ ಅವಲಂಬನೆಗೆ ಆಕ್ಷೇಪ: ಸಾಮಾಜಿಕ ಜಾಲತಾಣಗಳಲ್ಲಿ ಜನರ ಪ್ರಶ್ನೆ!

ಜಿಇಎಂ ಪ್ರಾರಂಭವಾದಾಗಿನಿಂದಲೂ ನಿರಂತರವಾಗಿ ಮೇಕ್ ಇನ್ ಇಂಡಿಯಾ ಉಪಕ್ರಮದ ಉತ್ತೇಜನಕ್ಕಾಗಿ ಕೆಲಸ ಮಾಡಲಾಗುತ್ತದೆ. ಮೇಕ್ ಇನ್ ಇಂಡಿಯಾ ಮತ್ತು ಸರಕಾರದ ಎಂಎಸ್‌ಇ ಖರೀದಿ ಆದ್ಯತೆಯ ನೀತಿಗಳನ್ನು ನಿಜವಾದ ರೀತಿಯಲ್ಲಿ ಜಾರಿಗೆ ತರಲು ಜಿಇಎಂ ಅನುಕೂಲ ಮಾಡಿಕೊಟ್ಟಿದೆ ಎಂದು ಸಚಿವಾಲಯ ತಿಳಿಸಿದೆ.