ಕಚ್ಚಾ ತೈಲ ದರ ಇಳಿಕೆಯಿಂದ ಆಮದು ವೆಚ್ಚ ಇಳಿಕೆ

ಹೊಸದಿಲ್ಲಿ: ಅಂತಾರಾಷ್ಟ್ರೀಯ ಕಚ್ಚಾ ತೈಲ ದರ ಇಳಿಕೆಯ ಪರಿಣಾಮ ಭಾರತದ ಆಮದು ವೆಚ್ಚ ಇಳಿಕೆಯಾಗಿ ಹಣದುಬ್ಬರ ಕೂಡ ತಗ್ಗುವ ನಿರೀಕ್ಷೆ ಇದೆ. ಬ್ರೆಂಟ್‌ ಕಚ್ಚಾ ತೈಲದ ಬೆಲೆ ಬ್ಯಾರೆಲ್‌ಗೆ 65 ಡಾಲರ್‌ಗೆ ಬುಧವಾರ ಇಳಿಕೆಯಾಗಿದೆ.

ಅಕ್ಟೋಬರ್‌ 3ರಿಂದ ಕಚ್ಚಾ ತೈಲ ದರದಲ್ಲಿ 20 ಡಾಲರ್‌ ಕಡಿಮೆಯಾಗಿದೆ. ಭಾರತ ಆಮದು ಮಾಡುವ ಬಹುಪಾಲು ತೈಲ ಬ್ರೆಂಟ್‌ ಮಾದರಿಯದ್ದಾಗಿದೆ. ಇದೇ ಟ್ರೆಂಡ್‌ ಮುಂದುವರಿದರೆ, ಭಾರತದ 2018-19ರ ತೈಲ ಆಮದು ಬಿಲ್‌ 8,81,000 ಕೋಟಿ ರೂ.ಗಿಂತ ಕೆಳಕ್ಕಿಳಿಯಲಿದೆ ಎಂದು ಅಂದಾಜಿಸಲಾಗಿದೆ.

ಕಳೆದ ಒಂದು ತಿಂಗಳಿನ ಅವಧಿಯಲ್ಲಿ ನಾಟಕೀಯ ಬೆಳವಣಿಗೆಯಲ್ಲಿ ತೈಲ ದರ ಇಳಿಕೆಯಾಗಿರುವುದು ಭಾರತಕ್ಕೆ ಅನುಕೂಲಕರವಾಗಿದೆ. ಪ್ರತಿ ಬ್ಯಾರೆಲ್‌ಗೆ 100 ಡಾಲರ್‌ಗೆ ದರ ಏರಿಕೆಯಾಗುವ ಎಚ್ಚರಿಕೆಯನ್ನು ಮಾರುಕಟೆ ತಜ್ಞರು ಕೊಟ್ಟಿದ್ದರು. ಆದರೆ ಈಗ ಆತಂಕ ಬಗೆಹರಿದಿದೆ.

ಅಮೆರಿಕ ಅಧ್ಯಕ್ಷ ಡೊನಾಲ್ಡ್‌ ಟ್ರಂಪ್‌ ಆರಂಭದಲ್ಲಿ ಇರಾನ್‌ ವಿರುದ್ಧ ಕಠಿಣ ಆರ್ಥಿಕ ನಿರ್ಬಂಧ ಜಾರಿಗೊಳಿಸುವುದಾಗಿ ಎಚ್ಚರಿಸಿದ್ದರೂ, ಇದು ಎಲ್ಲ ರಾಷ್ಟ್ರಗಳಿಗೂ ಅನ್ವಯಿಸುತ್ತದೆ ಎಂದು ಹೇಳಿದ್ದರೂ, ಕೊನೆಗೆ ಭಾರತ ಸೇರಿದಂತೆ 8 ರಾಷ್ಟ್ರಗಳಿಗೆ ವಿನಾಯಿತಿ ಘೋಷಿಸಿದ್ದರು. ನಂತರ ದರ ಇಳಿಮುಖವಾಗಿತ್ತು.