ಬ್ಯಾಂಕಿಂಗ್‌ ವಲಯವೇ ಸೈಬರ್‌ ಕ್ರಿಮಿನಲ್‌ಗಳ ಬಿಗ್‌ ಟಾರ್ಗೆಟ್‌

ಹೊಸದಿಲ್ಲಿ : 2018-19ನೇ ಸಾಲಿನಲ್ಲಿ ಬ್ಯಾಂಕಿಂಗ್‌ ಮತ್ತು ಫೈನಾನ್ಸ್‌, ಸರಕಾರ ಮತ್ತು ಮೂಲಸೌಕರ್ಯ ವಲಯಗಳನ್ನು ಸೈಬರ್‌ ಕ್ರಿಮಿನಲ್‌ಗಳು ಪ್ರಮುಖವಾಗಿ ಗುರಿಯಾಗಿಸಿಕೊಂಡು, ಕೋಟ್ಯಂತರ ರೂಪಾಯಿ ವಂಚನೆ ಮಾಡಿದ್ದಾರೆ.

ಟೆಕ್‌ ವಲಯದ ಪ್ರಮುಖ ಕಂಪನಿ ಸಿಸ್ಕೊ ಪ್ರಕಾರ, ಒಟ್ಟು ಸೈಬರ್‌ದಾಳಿಗಳಲ್ಲಿ ಶೇ.26ರಷ್ಟು ಸಂಸ್ಥೆಗಳು ತಲಾ 50 ಲಕ್ಷ ಡಾಲರ್‌ನಷ್ಟು ನಷ್ಟ ಅನುಭವಿಸಿವೆ. ಬ್ಯಾಂಕಿಂಗ್‌ ಮತ್ತು ಫೈನಾನ್ಸ್‌ಗಳು(ಶೇ.20.1), ಸರಕಾರದ ವಿವಿಧ ಇಲಾಖೆಗಳಿಗೆ(ಶೇ.19.6) ಸೈಬರ್‌ ದಾಳಿಯ ದೊಡ್ಡ ಆತಂಕ ಮುಂದುವರಿದಿದೆ.

''ರಕ್ಷಣೆ, ಮಾಹಿತಿ ತಂತ್ರಜ್ಞಾನ(ಐಟಿ), ಟೆಲಿಕಾಂ ಮತ್ತು ಹೆಲ್ತ್‌ಕೇರ್‌ ವಲಯಗಳನ್ನೂ ಹೆಚ್ಚಿನದಾಗಿ ಸೈಬರ್‌ ಕ್ರಿಮಿನಲ್‌ಗಳು ಗುರಿಯಾಗಿಸಿಕೊಳ್ಳುತ್ತಿದ್ದಾರೆ. ಕಳೆದ ವರ್ಷ ತಮ್ಮ ದಾಳಿಗೆ ರಕ್ಷಣೆ ವಲಯವನ್ನು ಶೇ.15.1ರಷ್ಟು ಗುರಿಯಾಗಿಸಿಕೊಂಡಿರುವುದು ತಿಳಿದು ಬಂದಿದೆ ಎಂದು ಸಿಸ್ಕೊ ಇಂಡಿಯಾ ಮತ್ತು ಸಾರ್ಕ್‌ ನಿರ್ದೇಶಕ(ಸೆಕ್ಯೂರಿಟಿ ಬಿಸಿನೆಸ್‌) ವಿಶಾಖ್‌ ರಮಣ್‌ ಹೇಳಿದ್ದಾರೆ.

ರಿಟೇಲ್‌, ಹಾಸ್ಪಿಟಾಲಿಟಿ, ಮನರಂಜನೆ, ಇ-ಕಾಮರ್ಸ್‌ನಂಥ ನಿರ್ದಿಷ್ಟ ವಲಯಗಳಲ್ಲಿ ಪಾಯಿಂಟ್‌ ಆಫ್‌ ಸೇಲ್‌ನಂಥ(ಕಾರ್ಡ್‌ ಸ್ವೈಪಿಂಗ್‌ ಮೆಷಿನ್‌) ವ್ಯವಸ್ಥೆಗಳನ್ನು ತಮ್ಮ ವಂಚನೆಗೆ ಸೈಬರ್‌ ಕ್ರಿಮಿನಲ್‌ಗಳು ಬಳಸಿಕೊಳ್ಳುತ್ತಿದ್ದಾರೆ. ಸರಕಾರಿ ಸ್ವಾಮ್ಯದ ಘಟಕಗಳು, ಸಾರಿಗೆ, ಬ್ಯಾಂಕಿಂಗ್‌ ಮತ್ತು ಫೈನಾನ್ಸ್‌ ಸಂಸ್ಥೆಗಳ ಮೇಲೆ ದಾಳಿಗೆ ರಾರ‍ಯನ್‌ಸಮ್‌ವೇರ್‌ನಂಥ ಮಾಲ್‌ವೇರ್‌ಗಳನ್ನು ಬಳಸಿಕೊಂಡಿದ್ದಾರೆ.

ಏಷ್ಯಾ-ಪೆಸಿಫಿಕ್‌ ವಲಯದಲ್ಲಿನ ಭದ್ರತಾ ಸಾಮರ್ಥ್ಯ‌ದ ಅಧ್ಯಯನವನ್ನು ಸಿಸ್ಕೊ ನಡೆಸಿದ್ದು, ಸೈಬರ್‌ ಕ್ರಿಮಿನಲ್‌ಗಳಿಂದಾಗಿ 50 ಲಕ್ಷದಿಂದ 99 ಲಕ್ಷ ಡಾಲರ್‌ ತನಕ ವಂಚನೆಗೆ ಒಳಗಾಗಿರುವುದಾಗಿ ಶೇ.21ರಷ್ಟು ಮಂದಿ ಹೇಳಿದ್ದಾರೆ. ಇತರೆ ಶೇ.5ರಷ್ಟು ಮಂದಿ 1 ಕೋಟಿ ಡಾಲರ್‌ಗೂ ಅಧಿಕ ಮೊತ್ತದ ವಂಚನೆಗೆ ಸಿಲುಕಿದ್ದಾಗಿ ಪ್ರತಿಕ್ರಿಯಿಸಿದ್ದಾರೆ.

ಸೈಬರ್‌ ದಾಳಿಯಿಂದ ಕಂಪನಿಗಳಿಗೆ ಆದಾಯ ಮಾತ್ರವಲ್ಲ ಗ್ರಾಹಕರ ನಷ್ಟವೂ ಆಗುತ್ತದೆ.