ಜಿಎಸ್‌ಟಿ ವಾರ್ಷಿಕ ರಿಟರ್ನ್‌ ಸಲ್ಲಿಕೆ ವಿಸ್ತರಣೆ

ಹೊಸದಿಲ್ಲಿ : ಜಿಎಸ್‌ಟಿಗೆ ಸಂಬಂಧಿಸಿದ ವಾರ್ಷಿಕ ಐಟಿಆರ್‌ ಸಲ್ಲಿಕೆ ಗಡುವನ್ನು ಮುಂದಿನ ವರ್ಷದ ಮಾ.31ರ ತನಕ ಕೇಂದ್ರ ಸರಕಾರವು ವಿಸ್ತರಿಸಿದೆ. ತೀವ್ರ ಒತ್ತಡದಲ್ಲಿದ್ದ ತೆರಿಗೆ ಪಾವತಿದಾರರಿಗೆ ಇದು ನೆಮ್ಮದಿಯ ಸಂಗತಿ.

ಐಟಿಆರ್‌ ಸಲ್ಲಿಕೆ ಸಂದರ್ಭದಲ್ಲಿ ಅಡಚಣೆ ಉಂಟಾಗಿತ್ತು. ಇದೀಗ ರಿಟರ್ನ್‌ ಸಲ್ಲಿಕೆ ಅವಧಿ ವಿಸ್ತರಣೆಯಾಗಿರುವ ಕಾರಣ ತೆರಿಗೆ ಪಾವತಿದಾರರಿಗೆ ಅನುಕೂಲವಾಗಲಿದೆ. ತೆರಿಗೆದಾರರ ಬೇಡಿಕೆಗಳ ಹಿನ್ನೆಲೆಯಲ್ಲಿ ಡಿ.31ಕ್ಕೆ ಅಂತ್ಯವಾಗಲಿದ್ದ ಜಿಎಸ್‌ಟಿ ವಾರ್ಷಿಕ ರಿಟರ್ನ್‌ ಸಲ್ಲಿಕೆ ಅವಧಿಯನ್ನು ಮೂರು ತಿಂಗಳು ವಿಸ್ತರಿಸಲಾಗಿದ್ದು, ಈ ಸಂಬಂಧ ಕೇಂದ್ರೀಯ ಪರೋಕ್ಷ ತೆರಿಗೆ ಹಾಗೂ ಕಸ್ಟಮ್ಸ್‌ ಇಲಾಖೆ(ಸಿಬಿಐಸಿ) ಅಧಿಸೂಚನೆ ಹೊರಡಿಸಿದೆ.

ಪರಿಷ್ಕೃತ ಅರ್ಜಿಗಳು ಜಿಎಸ್‌ಟಿ ಪೋರ್ಟಲ್‌ನಲ್ಲಿ ಸದ್ಯದಲ್ಲಿಯೇ ಲಭ್ಯವಾಗಲಿವೆ. ಜಿಎಸ್‌ಟಿಆರ್‌-9, ಜಿಎಸ್‌ಟಿಆರ್‌-9ಎ ಮತ್ತು ಜಿಎಸ್‌ಟಿಆರ್‌-9ಸಿ ಅನ್ನು 2019 ರ ಮಾ.31ರೊಳಗೆ ಸಲ್ಲಿಸಬಹುದಾಗಿದೆ.

ಜಿಎಸ್‌ಟಿ ವಾರ್ಷಿಕ ರಿಟರ್ನ್‌ ಸಲ್ಲಿಕೆಯ ಅವಧಿ ವಿಸ್ತರಣೆಗೆ ಅಖಿಲ ಭಾರತ ವರ್ತಕರ ಒಕ್ಕೂಟವು(ಸಿಎಐಟಿ) ಇತ್ತೀಚೆಗಷ್ಟೇ ವಿತ್ತ ಸಚಿವ ಅರುಣ್‌ ಜೇಟ್ಲಿ ಅವರನ್ನು ಒತ್ತಾಯಿಸಿತ್ತು.