ರಕ್ಷಣಾ ಉತ್ಪನ್ನ ರಫ್ತು ಗುರಿ 35,000 ಕೋಟಿ ರೂ.ಗೆ ಏರಿಕೆ

ಹೊಸದಿಲ್ಲಿ: ರಕ್ಷಣಾ ವಲಯದಲ್ಲಿ ಮೇಕ್‌ ಇನ್‌ ಇಂಡಿಯಾ ಅಭಿಯಾನಕ್ಕೆ ಮಹತ್ವದ ಮುನ್ನಡೆ ಲಭಿಸಿದ್ದು, 2024-25ರ ವೇಳೆಗೆ ರಕ್ಷಣಾ ಉತ್ಪನ್ನಗಳ ರಫ್ತು ಮೌಲ್ಯ 35,000 ಕೋಟಿ ರೂ.ಗಳ ಗಡಿಯನ್ನು ದಾಟಲಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ಕಳೆದ 2018-19ರಲ್ಲಿ ಭಾರತ 10,700 ಕೋಟಿ ರೂ. ರಕ್ಷಣಾ ರಫ್ತು ಮಾಡಿದ್ದರೆ, 2019-20ರಲ್ಲಿ 20,000 ಕೋಟಿ ರೂ. ಗುರಿಯನ್ನು ನಿಗದಿಪಡಿಸಲಾಗಿದೆ.2024-25ರ ವೇಳೆಗೆ 35,000 ಕೋಟಿ ರೂ.ಗೂ ಅಧಿಕ ರಫ್ತು ನಿರೀಕ್ಷಿಸಲಾಗಿದೆ ಎಂದು ರಕ್ಷಣಾ ಉತ್ಪಾದನೆ ವಿಭಾಗದ ಕಾರ್ಯದರ್ಶಿ ಅಜಯ್‌ ಕುಮಾರ್‌ ತಿಳಿಸಿದ್ದಾರೆ.

'' ರಕ್ಷಣಾ ವಲಯದ ರಫ್ತು ಉಜ್ವಲ ಭವಿಷ್ಯವನ್ನು ಹೊಂದಿದೆ. ಇದು ದೊಡ್ಡ ಬಂಡೆ ಕಲ್ಲಿನಂತೆಯೇ. ಅಲುಗಾಡಿಸಲು ಕಷ್ಟಕರ. ಆದರೆ ಒಂದು ಸಲ ಉರುಳಲು ಆರಂಭಿಸಿದರೆ ಸುಲಭವಾಗುತ್ತದೆ. ಲಾಭದಾಯಕವಾಗಬಲ್ಲುದು'' ಎನ್ನುತ್ತಾರೆ ಅಜಯ್‌ ಕುಮಾರ್‌.

ಸರಕಾರ ಖಾಸಗಿ ವಲಯ, ಅದರದಲ್ಲೂ ಮುಖ್ಯವಾಗಿ ಸಣ್ಣ ಮತ್ತು ಮಧ್ಯಮ ಉದ್ದಿಮೆಗಳಿಗೆ ರಕ್ಷಣಾ ಕ್ಷೇತ್ರದ ರಫ್ತಿಗೆ ಉತ್ತೇಜನ ನೀಡುತ್ತಿದೆ ಎಂದರು.

ಕ್ಷಿಪಣಿ ಉತ್ಪಾದನೆಗೆ 25,000 ಕೋಟಿ ರೂ. ಆರ್ಡರ್‌

ಸಾರ್ವಜನಿಕ ವಲಯದ, ಹೈದರಾಬಾದ್‌ನಲ್ಲಿರುವ ಭಾರತ್‌ ಡೈನಾಮಿಕ್ಸ್‌ ಲಿಮಿಟೆಡ್‌ ಕ್ಷಿಪಣಿಗಳನ್ನು ಉತ್ಪಾದಿಸುತ್ತಿದೆ. ಈ ಕಂಪನಿ ಪ್ರಸ್ತುತ 8,084 ಕೋಟಿ ರೂ.ಗಳ ಕ್ಷಿಪಣಿ ಉತ್ಪಾದನೆಗೆ ಆರ್ಡರ್‌ಗಳನ್ನು ಪಡೆದಿದ್ದು, ಮುಂದಿನ 5 ವರ್ಷಗಳಲ್ಲಿ 25,000 ಕೋಟಿ ರೂ.ಗೆ ಏರಿಕೆಯಾಗಲಿದೆ ಎಂದು ಅಧ್ಯಕ್ಷ ಸಿದ್ಧಾರ್ಥ್‌ ಮಿಶ್ರಾ ತಿಳಿಸಿದ್ದಾರೆ.