ಯೋಜನೆಗಳ ವಿಳಂಬ: 3.2 ಲಕ್ಷ ಕೋಟಿ ರೂ. ಹೆಚ್ಚುವರಿ ವೆಚ್ಚ

ಹೊಸದಿಲ್ಲಿ: ತಲಾ 150 ಕೋಟಿ ರೂ. ಮೌಲ್ಯದ ಸುಮಾರು 342 ಮೂಲಸೌಕರ್ಯ ಯೋಜನೆಗಳ ಅನುಷ್ಠಾನ ವಿಳಂಬವಾಗಿದ್ದು, ಇದರಿಂದಾಗಿ ಯೋಜನೆಗಳ ಮೂಲ ವೆಚ್ಚ ಗಣನೀಯವಾಗಿ ಏರಿಕೆಯಾಗಿದೆ. ಇವೂ ಸೇರಿದಂತೆ ಸುಮಾರು 1,443 ಯೋಜನೆಗಳ ಮೂಲ ವೆಚ್ಚವು 3.2 ಲಕ್ಷ ಕೋಟಿ ರೂ. ಹೆಚ್ಚಾಗಿದೆ. ಅಂಕಿಅಂಶಗಳು ಮತ್ತು ಯೋಜನೆ ಅನುಷ್ಠಾನ ಸಚಿವಾಲಯದ ದಾಖಲೆಗಳಿಂದ ಈ ವಿಷಯವು ದೃಢಪಟ್ಟಿದೆ. ಅಂದರೆ, ವೆಚ್ಚವು ಶೇ.17.53ರಷ್ಟು ಏರಿಕೆಯಾಗಿದೆ.

ಭೂಸ್ವಾಧೀನ, ಅರಣ್ಯ ಇಲಾಖೆ ಕ್ಲಿಯರೆನ್ಸ್‌, ಸಲಕರಣೆಗಳ ಪೂರೈಕೆಯಲ್ಲಿ ವ್ಯತ್ಯಯ ಮತ್ತಿತರ ಕಾರಣಗಳಿಂದ ಯೋಜನೆಗಳು ತಡವಾಗಿವೆ. 150 ಕೋಟಿ ರೂ. ಮತ್ತು ಅದಕ್ಕೂ ಹೆಚ್ಚಿನ ಮೊತ್ತದ ಯೋಜನೆಗಳ ಮೇಲೆ ಈ ಸಚಿವಾಲಯ ನಿಗಾ ಇಡುತ್ತದೆ. ''1,443 ಯೋಜನೆಗಳ ಮೂಲ ವೆಚ್ಚವನ್ನು 18.3 ಲಕ್ಷ ‡ ಕೋಟಿ ರೂ. ಎಂದು ಮೊದಲು ಅಂದಾಜು ಮಾಡಲಾಗಿತ್ತು. ಈಗ ಈ ವೆಚ್ಚವು 21.51 ಲಕ್ಷ ಕೋಟಿ ರೂ.ಗೆ ಏರಿದೆ. ಇದರಿಂದಾಗಿ ಒಟ್ಟು ವೆಚ್ಚದ ಪ್ರಮಾಣವು 3.20 ಲಕ್ಷ ಕೋಟಿ ರೂ. ಅನ್ನು ದಾಟಿದೆ,'' ಎಂದು ಸಚಿವಾಲಯದ ಹೊಸ ವರದಿಯಲ್ಲಿ ಹೇಳಲಾಗಿದೆ.

ಸುಮಾರು 360 ಯೋಜನೆಗಳ ಪೈಕಿ 106 ಯೋಜನೆಗಳ ಜಾರಿಯು 1ರಿಂದ 12 ತಿಂಗಳು ತಡವಾಗಿವೆ. 60 ಯೋಜನೆಗಳ ಅನುಷ್ಠಾನವು 13ರಿಂದ 24 ತಿಂಗಳು ತಡವಾಗಿವೆ. 93 ಯೋಜನೆಗಳ ಜಾರಿಯು 25ರಿಂದ 60 ತಿಂಗಳು ತಡವಾಗಿದ್ದರೆ, 101 ಯೋಜನೆಗಳು 61 ತಿಂಗಳು ವಿಳಂಬವಾಗಿವೆ.

ಕೋರ್ಟ್‌ ತಕರಾರುಗಳು, ಭೌಗೋಳಿಕ ವಾತಾವರಣ, ಕಾರ್ಮಿಕರ ಕೊರತೆ, ಗುತ್ತಿಗೆದಾರರ ಬಂಡವಾಳದ ಕೊರತೆ, ನಕ್ಸಲರ ಸಮಸ್ಯೆ, ಭೂಸ್ವಾಧೀನ ವಿಳಂಬ, ಅರಣ್ಯ ಇಲಾಖೆ ಕ್ಲಿಯರೆನ್ಸ್‌ ಮತ್ತಿತರ ಅಂಶಗಳಿಂದ ಯೋಜನೆಗಳು ವಿಳಂಬವಾಗುವುದುಂಟು.