ಜುಲೈನಲ್ಲಿ ನರೇಗಾ ಉದ್ಯೋಗಗಳಿಗೆ ಭಾರಿ ಬೇಡಿಕೆ ಕುಸಿತ, ಕಾರಣವೇನು?

ಹೊಸದಿಲ್ಲಿ: ಗ್ರಾಮೀಣ ಭಾಗದಲ್ಲಿ ಉದ್ಯೋಗಾವಕಾಶ ಕಲ್ಪಿಸುವ ನರೇಗಾಕ್ಕೆ ಜುಲೈನಲ್ಲಿ ಬೇಡಿಕೆ ಕಡಿಮೆಯಾಗಿದೆ. ಇದು, ಹಳ್ಳಿಗರು ಹಳೆಯ ಕೆಲಸಗಳನ್ನು ಅರಸಿ ನಗರಗಳಿಗೆ ಮರಳುತ್ತಿರುವುದರ ಸೂಚಕದಂತಿದೆ ಎಂದು ತಜ್ಞರು ವ್ಯಾಖ್ಯಾನಿಸಿದ್ದಾರೆ.

ಕೋವಿಡ್‌-19 ಬಿಕ್ಕಟ್ಟಿನ ತರುವಾಯ ಬಹುತೇಕ ಪಟ್ಟಣಿಗರು ತಮ್ಮ ಹಳ್ಳಿಗಳನ್ನು ಸೇರಿದ್ದರು. ಹೀಗಾಗಿ, ಏಪ್ರಿಲ್‌ನಿಂದ ನರೇಗಾ ಕೆಲಸಗಳಿಗೆ ಹೆಚ್ಚಿನ ಬೇಡಿಕೆ ಕಂಡು ಬಂದಿತ್ತು. ಜೂನ್‌ನಲ್ಲಂತೂ 6.2 ಕೋಟಿ ಜನರು ಗ್ರಾಮೀಣ ಭಾಗದಲ್ಲಿ ನರೇಗಾ ಕೆಲಸಗಳಲ್ಲಿ ತೊಡಗಿದ್ದರು. ಆದರೆ, ಜುಲೈನಲ್ಲಿ ಬೇಡಿಕೆಯು 31% ಇಳಿಕೆಯಾಗಿದೆ.

ಮುಚ್ಚಿದ್ದ ಕೈಗಾರಿಕೆಗಳು ಮರು ಆರಂಭವಾಗಿದ್ದು, ಜನ ಪಟ್ಟಣಗಳಿಗೆ ಮರಳಿದ್ದು ಗ್ರಾಮೀಣ ಭಾಗದಲ್ಲಿ ನರೇಗಾ ಕೆಲಸಗಳಿಗೆ ಬೇಡಿಕೆ ಕುಸಿದಿದೆ ಎಂದು ಕಾರ್ಮಿಕ ಅರ್ಥಶಾಸ್ತ್ರಜ್ಞ ಕೆ.ಆರ್‌. ಶ್ಯಾಮ್‌ ಸುಂದರ್‌ ವ್ಯಾಖ್ಯಾನಿಸಿದ್ದಾರೆ.

ನರೇಗಾ ಕೆಲಸಗಳಿಗೆ ಬೇಡಿಕೆ

ಮೇ - 5.21 ಕೋಟಿ
ಜೂನ್ -‌ 6.20 ಕೋಟಿ
ಜುಲೈ - 4.25 ಕೋಟಿ

ಭಾರತೀಯ ಆರ್ಥಿಕತೆ ನಿಗಾ ಕೇಂದ್ರದ ನಿರುದ್ಯೋಗ ಡೇಟಾ ಪ್ರಕಾರ, ಲಾಕ್‌ಡೌನ್‌ನ ಮೊದಲ ತಿಂಗಳಾದ ಏಪ್ರಿಲ್‌ನಲ್ಲಿ ದೇಶದಲ್ಲಿ 12.2 ಕೋಟಿ ಮಂದಿ ಕೆಲಸ ಕಳೆದುಕೊಂಡಿದ್ದರು. ಜೂನ್‌ನಲ್ಲಿ ಪರಿಸ್ಥಿತಿ ಸುಧಾರಿಸಿ, ಕೆಲಸ ಕಳೆದುಕೊಂಡವರ ಸಂಖ್ಯೆ 9.1 ಕೋಟಿಗೆ ಇಳಿದಿದೆ.

ಹಳ್ಳಿಗಳಲ್ಲಿ ನರೇಗಾಕ್ಕೆ ಬೇಡಿಕೆ ಕಡಿಮೆಯಾಗಿದೆ ಎಂದರೆ, ಕೆಲವರು ಪಟ್ಟಣಕ್ಕೆ ಮರಳಿರಬಹುದು. ಜೊತೆಗೆ ಇದು ಬಿತ್ತನೆ ಕಾಲವಾಗಿದ್ದು, ಜನ ಕೃಷಿ ಚಟುವಟಿಕೆಗಳಲ್ಲಿ ತೊಡಗಿರಬಹುದು ಎಂದು ಜೆಎನ್‌ಯು ಪ್ರಧ್ಯಾಪಕ ಪ್ರೊ. ಹಿಮಾಂಶು ಅಭಿಪ್ರಾಯಪಟ್ಟಿದ್ದಾರೆ.