ಗೂಗಲ್‌ ವಿರುದ್ಧ ತುಳಸಿ ಖಟ್ಲೆ

ವಾಷಿಂಗ್ಟನ್‌ : ಅಮೆರಿಕದಲ್ಲಿ ಟೆಮಾಕ್ರಟಿಕ್‌ ಪಕ್ಷದ ಅಧ್ಯಕ್ಷೀಯ ಅಭ್ಯರ್ಥಿ ತುಳಸಿ ಗಬ್ಬಾರ್ಡ್‌ ಅವರು ಗೂಗಲ್‌ ವಿರುದ್ಧ 50 ದಶಲಕ್ಷ ಡಾಲರ್‌ ಮೊತ್ತದ (350 ಕೋಟಿ ರೂ.) ಮೊಕದ್ದಮೆ ದಾಖಲಿಸಿದ್ದಾರೆ.

ತಂತ್ರಜ್ಞಾನ ದಿಗ್ಗಜ ಗೂಗಲ್‌ ತಮ್ಮ ವಿರುದ್ಧ ಪಕ್ಷಪಾತಿ ಧೋರಣೆ ಅನುಸರಿಸುತ್ತಿದೆ. 2020ರ ಚುನಾವಣಾ ಪ್ರಚಾರಕ್ಕೆ ಪ್ರತಿಕೂಲ ಪರಿಣಾಮ ಬೀರುವಂತೆ ಅಡ್ಡಿಪಡಿಸುತ್ತಿದೆ ಎಂದು ತುಳಸಿ ಗಬ್ಬಾರ್ಡ್‌ ಆರೋಪಿಸಿದ್ದಾರೆ.

ಅಮೆರಿಕ ಸಂಸತ್ತಿನಲ್ಲಿ ಹಿಂದೂ ಸಂಸದೆಯಾಗಿರುವ ತುಳಸಿ ಗಬ್ಬಾರ್ಡ್‌ ಅವರು ಮುಂದಿನ ವರ್ಷ ನಡೆಯಲಿರುವ ಅಧ್ಯಕ್ಷೀಯ ಚುನಾವಣೆಯಲ್ಲಿ ಡೆಮಾಕ್ರಟಿಕ್‌ ಪಕ್ಷದ ಅಭ್ಯರ್ಥಿಗಳಲ್ಲಿ ಒಬ್ಬರಾಗಿದ್ದಾರೆ. ಗೂಗಲ್‌ ಕಳೆದ ಜೂನ್‌ನಲ್ಲಿ ತುಳಸಿ ಅವರ ಪ್ರಚಾರ ಕುರಿತ ಜಾಹೀರಾತು ಖಾತೆಯನ್ನು ತಾತ್ಕಾಲಿಕವಾಗಿ ಅಮಾನತುಗೊಳಿಸಿತ್ತು. ಜೂನ್‌ 27 ಮತ್ತು 28ರಂದು 6 ಗಂಟೆಗಳ ಕಾಲ ಖಾತೆಯನ್ನು ಅಮಾನತಿನಲ್ಲಿ ಇಡಲಾಗಿತ್ತು ಎಂದು ತುಳಸಿ ಅವರು ಆರೋಪಿಸಿದ್ದಾರೆ. ಹೀಗಿದ್ದರೂ ಗೂಗಲ್‌ ಈ ಎಲ್ಲ ಆರೋಪಗಳನ್ನು ನಿರಾಕರಿಸಿದ್ದು, ಕಂಪನಿಯು ಆಟೊಮ್ಯಾಟಿಕ್‌ ವ್ಯವಸ್ಥೆಯನ್ನು ಹೊಂದಿದ್ದು, ಯಾವುದೇ ಜಾಹೀರಾತು ಖಾತೆಯಲ್ಲಿ ಅನುಮಾನಾಸ್ಪದ ಬದಲಾವಣೆ ಕಂಡುಬಂದಾಗ ತನ್ನಿಂತಾನೆ ಖಾತೆ ತಾತ್ಕಾಲಿಕವಾಗಿ ಅಮಾನತಾಗುತ್ತದೆ ಎಂದು ಹೇಳಿದೆ.