ಜನ ಧನ ಖಾತೆಗಳಲ್ಲಿ 80 ಸಾವಿರ ರೂ.ಗೂ ಅಧಿಕ ಠೇವಣಿ

ಹೊಸದಿಲ್ಲಿ: ದೇಶದ ಜನ ಧನ್‌ ಖಾತೆಗಳಲ್ಲಿನ ಠೇವಣಿ ಮೊತ್ತ ಮಾ.31ರ ಹೊತ್ತಿಗೆ 80,545 ಕೋಟಿ ರೂ.ಗಳನ್ನು ದಾಟಿದೆ ಎಂದು ಕೇಂದ್ರ ಹಣಕಾಸು ಸಚಿವಾಲಯ ಹೇಳಿದೆ.

ಹೆಚ್ಚಿನ ಜನರನ್ನು ಬ್ಯಾಂಕಿಂಗ್‌ ವ್ಯವಸ್ಥೆಗೆ ತರುವ ನಿಟ್ಟಿನಲ್ಲಿ ಕೇಂದ್ರ ಸರಕಾರವು ಜನ ಧನ್‌ ಖಾತೆಗಳ ಯೋಜನೆಯನ್ನು ರೂಪಿಸಿದ್ದು, ಉತ್ತಮ ಪ್ರತಿಕ್ರಿಯೆ ವ್ಯಕ್ತವಾಗಿದೆ. ವಿಶ್ವ ಬ್ಯಾಂಕ್‌ ಕಳೆದ ವಾರ ಬಿಡುಗಡೆ ಮಾಡಿದ ವರದಿಯಲ್ಲೂ ಜನ ಧನ್‌ ಯೋಜನೆಯ ಯಶಸ್ಸನ್ನು ಪ್ರಶಂಸಿಸಲಾಗಿತ್ತು.

ನೋಟು ಅಮಾನ್ಯದ ಸಂದರ್ಭದಲ್ಲಿ ಜನ ಧನ್‌ ಖಾತೆಗಳ ಠೇವಣಿಗಳಿಗೆ ಹೆಚ್ಚಿನ ಹಣ ಜಮೆಯಾಗಿತ್ತು. ಈ ಖಾತೆಗಳ ದುರ್ಬಳಕೆ ಕುರಿದ ಸಂದೇಹಗಳೂ ವ್ಯಕ್ತವಾಗಿದ್ದವು. 2016ರ ನವೆಂಬರ್‌ ಆರಂಭದಲ್ಲಿ ಜನ ಧನ್‌ ಖಾತೆಗಳಲ್ಲಿ 45,300 ಕೋಟಿ ರೂ. ಠೇವಣಿಯಿತ್ತು. ಅದು ನೋಟು ಅಮಾನ್ಯತೆ ಘೋಷಣೆಯಾದ ಬಳಿಕ 74,000 ಕೋಟಿ ರೂ.ಗೆ ಏರಿತ್ತು. ನಂತರ ಠೇವಣಿ ಗಾತ್ರ ಕುಗ್ಗುತ್ತಾ ಬಂದಿತ್ತು. ಮಾರ್ಚ್‌ 2017ರಿಂದ ಖಾತೆಗಳ ಠೇವಣಿ ಸ್ಥಿರತೆ ಕಾಯ್ದುಕೊಂಡಿದೆ.