ಬೋಯಿಂಗ್‌ 737 ವಿಮಾನಗಳಲ್ಲಿ ಹೆಚ್ಚುವರಿ ಸುರಕ್ಷತೆಗೆ ಸೂಚನೆ

ಹೊಸದಿಲ್ಲಿ: ಬೋಯಿಂಗ್‌ 737 ಮ್ಯಾಕ್ಸ್‌ ವಿಮಾನಗಳಲ್ಲಿ ಹೆಚ್ಚುವರಿ ಸುರಕ್ಷತಾ ಕ್ರಮಗಳನ್ನು ಅಳವಡಿಸಿಕೊಳ್ಳುವ ಬಗ್ಗೆ ಏರ್‌ಲೈನ್ಸ್‌ಗಳಿಗೆ ಡಿಜಿಸಿಎ ಶೀಘ್ರ ಸೂಚಿಸಲಿದೆ.

ಇಥಿಯೋಪಿಯಾದಲ್ಲಿ ವಿಮಾನ ಅಪಘಾತದ ಹಿನ್ನೆಲೆಯಲ್ಲಿ ಡಿಜಿಸಿಎ ಈ ಕ್ರಮ ತೆಗೆದುಕೊಳ್ಳಲಿದೆ. ಜೆಟ್‌ ಏರ್‌ವೇಸ್‌ ಮತ್ತು ಸ್ಪೈಸ್‌ಜೆಟ್‌ , 737 ಮ್ಯಾಕ್ಸ್‌ ವಿಮಾನಗಳನ್ನು ಬಳಸುತ್ತಿವೆ. ವಿಮಾನಕ್ಕೆ ಸಂಬಂಧಿಸಿ ಈ ಏರ್‌ ಲೈನ್‌ ಹಾಗೂ ಬೋಯಿಂಗ್‌ನಿಂದ ಡಿಜಿಸಿಎ ಮಾಹಿತಿ ಪಡೆದುಕೊಳ್ಳಲಿದೆ.

5 ತಿಂಗಳಿನ ಅವಧಿಯಲ್ಲಿ ಎರಡನೇ ಬಾರಿಗೆ 737 ಮ್ಯಾಕ್ಸ್‌ ವಿಮಾನ ಅಪಘಾತಕ್ಕೀಡಾಗಿದೆ. 2018ರ ಅಕ್ಟೋಬರ್‌ನಲ್ಲಿ ಇಮಡೊನೇಷ್ಯಾದಲ್ಲಿ ಬೋಯಿಂಗ್‌ 737 ಮ್ಯಾಕ್ಸ್‌ ವಿಮಾನ ಅಪಘಾತಕ್ಕೀಡಾಗಿ 180 ಮಂದಿ ಮೃತಪಟ್ಟಿದ್ದರು.

ಇಥಿಯೋಪಿಯಾದಲ್ಲಿ ನಡೆದ ಅವಘಡದಲ್ಲಿ 157 ಮಂದಿ ಸಾವಿಗೀಡಾಗಿದ್ದಾರೆ. ಬೋಯಿಂಗ್‌ನ ವಿಮಾನಗಳ ಪೈಕಿ 737 ಮ್ಯಾಕ್ಸ್‌ ಹೆಚ್ಚು ಮಾರಾಟವಾಗುತ್ತಿರುವ ವಿಮಾನವಾಗಿದ್ದು, ವಿಶ್ವಾದ್ಯಂತ 100 ಗ್ರಾಹಕರಿಂದ 4,700 ಆರ್ಡರ್‌ಗಳನ್ನು ಪಡೆದಿದೆ.