ಬಜೆಟ್‍ನಲ್ಲಿ ಡಿಜಿಟಲ್ ಇಂಡಿಯಾಗೆ ದುಪ್ಪಟ್ಟು ನಿಗದಿ

ಹೊಸದಿಲ್ಲಿ: ಈ ಸಲದ ಬಜೆಟ್‌ನಲ್ಲಿ ಡಿಜಿಟಲ್ ಇಂಡಿಯಾ ಚಳವಳಿಗೆ ಸಾಕಷ್ಟು ಪ್ರಾಮುಖ್ಯತೆ ನೀಡಿದ್ದಾರೆ ಹಣಕಾಸು ಸಚಿವ ಅರುಣ್ ಜೇಟ್ಲಿ. 2018-19ನೇ ಸಾಲಿನ ಬಜೆಟ್‍ನಲ್ಲಿ ಡಿಜಿಟಲ್ ಇಂಡಿಯಾ ಕಾರ್ಯಕ್ರಮಕ್ಕೆ 3073 ಕೋಟಿ ರೂ. ನಿಗದಿಪಡಿಸಲಾಗಿದೆ. ಈ ಸಲದ ಬಜೆಟ್‌ನಲ್ಲಿ ಇದು ದುಪ್ಪಟ್ಟು ಎಂಬುದು ವಿಶೇಷ.

ರೋಬೋಟಿಕ್ಸ್, ಕೃತಕ ಬುದ್ಧಿಮತ್ತೆ, ಡಿಜಿಟಲ್ ತಯಾರಿಕೆ, ಬಿಗ್ ಡಾಟಾ ವಿಶ್ಲೇಷಣೆ, ಕ್ವಾಂಟಮ್ ಸಂವಹನ ಮತ್ತು ಇಂಟರ್‌ನೆಟ್‌ಗೆ ಸಂಬಂಧಿಸಿದಂತೆ ವಿಜ್ಞಾನ ಮತ್ತು ತಂತ್ರಜ್ಞಾನ ಇಲಾಖೆಯ ಮಿಷನ್ ಆನ್ ಸೈಬರ್ ಫಿಸಿಕಲ್ ಸಿಸ್ಟಮ್ಸ್ ಸ್ಥಾಪಿಸಲಿರುವ ಸಂಶೋಧನೆ, ತರಬೇತಿ ಮತ್ತು ಪರಿಣತಿಗಾಗಿ ಶ್ರೇಷ್ಠ ಕೇಂದ್ರಗಳ ಸ್ಥಾಪನೆ ಒತ್ತು ನೀಡಲಾಗಿದೆ.

ಕಳೆದ ವರ್ಷ ಡಿಜಿಟಲ್ ಇಂಡಿಯಾಗಾಗಿ 1672.76 ಕೋಟಿ ರೂ. ನಿಗದಿಪಡಿಸಲಾಗಿತ್ತು. ಈ ವರ್ಷ ಡಿಜಿಟಲ್ ಇಂಡಿಯಾ ಬಜೆಟ್ ಮೊತ್ತ ದುಪ್ಪಟ್ಟಾಗಿದೆ ಎಂದು ಜೇಟ್ಲಿ ತಿಳಿಸಿದ್ದಾರೆ. ಇದರ ಜತೆಗೆ ಜಾಗತಿಕ ಅರ್ಥ ವ್ಯವಸ್ಥೆ ಡಿಜಿಟಲೈಸ್ ಆಗುತ್ತಿದ್ದು ಹೈಸ್ಪೀಡ್ ಆಪ್ಟಿಕಲ್ ಫೈಬರ್‌ನಿಂದ ಗ್ರಾಮಗಳನ್ನು ಜೋಡಿಸಲಾಗುತ್ತದೆ. ದೇಶದ 5 ಲಕ್ಷ ಗ್ರಾಮಗಳನ್ನು ವೈಫೈ ಮೂಲಕ ಜೋಡಣೆ ಮಾಡಲಾಗುತ್ತದೆ ಎಂದಿದ್ದಾರೆ.

ಐಐಟಿ ಚೆನ್ನೈನಲ್ಲಿ 5ಜಿ ತಂತ್ರಜ್ಞಾನ ಕೇಂದ್ರ ಸ್ಥಾಪನೆ ಮಾಡಲಿದ್ದಾರೆ. ರೋಡ್ ಪ್ಲಾಜಾಗಳನ್ನು ಡಿಜಿಟಲೈಸ್ ಮಾಡಲು ನಿರ್ಧರಿಸಲಾಗಿದೆ. ದೇಶದಲ್ಲಿ ಬಿಟ್ ಕಾಯಿನ್ ಚಲಾವಣೆಗೆ ನಿಷೇಧ ಜಾರಿ ಮಾಡಲಾಗಿದೆ. ಆಧಾರ್ ಜಾರಿಯಿಂದಾಗಿ ಹಲವಾರು ಅನುಕೂಲಗಳಾಗಿವೆ ಎಂದಿರುವ ಅವರು, ಈ ಮೂಲಕ ಎಲ್ಲಾ ವಿಮಾ ಕಂಪೆನಿಗಳನ್ನೂ ಒಗ್ಗೂಡಿಸಲಾಗುವುದು ಎಂದಿದ್ದಾರೆ ಜೇಟ್ಲಿ.