ಫ್ಲಿಪ್‌ಕಾರ್ಟ್‌, ಅಮೆಜಾನ್‌ನಿಂದ ಲಕ್ಷಾಂತರ ಉದ್ಯೋಗ ಸೃಷ್ಟಿ

ಹೊಸದಿಲ್ಲಿ: ಭಾರತದ ಅತಿ ದೊಡ್ಡ ಹಬ್ಬದ ಸೀಸನ್‌ನಲ್ಲಿ ಉದ್ಯೋಗಾವಕಾಶಗಳನ್ನು ಅರಸುತ್ತಿರುವವರಿಗೆ ಸಿಹಿ ಸುದ್ದಿಯಿದು. ಕಳೆದ ಕೆಲವು ತಿಂಗಳಿನಿಂದ ಇ-ಕಾಮರ್ಸ್‌ ದಿಗ್ಗಜ ಕಂಪನಿಗಳಾದ ಫ್ಲಿಪ್‌ಕಾರ್ಟ್‌ ಮತ್ತು ಅಮೆಜಾನ್‌ ನೇರವಾಗಿ 80,000 ಮಂದಿಯನ್ನು ನೇಮಕ ಮಾಡಿಕೊಂಡಿವೆ! ತಾತ್ಕಾಲಿಕ ಸಿಬ್ಬಂದಿ ಹಾಗೂ ಇತರರ ನೇಮಕಾತಿ ನಡೆದಿದ್ದು, ಪರೋಕ್ಷವಾಗಿ ಸೃಷ್ಟಿಯಾಗಿರುವ ಉದ್ಯೋಗಗಳನ್ನೂ ಪರಿಗಣಿಸಿದರೆ ಹೊಸ ಉದ್ಯೋಗಗಳ ಸಂಖ್ಯೆ ಕೆಲವು ಲಕ್ಷಗಳಷ್ಟು ದಾಟಿದೆ.

ದುರ್ಗಾ ಪೂಜೆ, ನವರಾತ್ರಿ, ದೀಪಾವಳಿ ಮತ್ತು ದಸರಾ ಹಬ್ಬಗಳು ಸಮೀಪಿಸುತ್ತಿರುವಂತೆ, ಇ-ಕಾಮರ್ಸ್‌ ಕಂಪನಿಗಳು ವಿಶೇಷ ಮಾರಾಟವನ್ನು ಹಮ್ಮಿಕೊಂಡಿದ್ದು, ಗ್ರಾಹಕರ ಮನಸೂರೆಗೊಳ್ಳಲು ಸಜ್ಜಾಗಿವೆ. ಇದು ಲಕ್ಷಾಂತರ ಉದ್ಯೋಗಗಳನ್ನೂ ಸೃಷ್ಟಿಸಿದ್ದು, ಆರ್ಥಿಕ ಚಟುವಟಿಕೆಗಳಿಗೆ ಚೇತೋಹಾರಿಯಾಗಿ ಪರಿಣಮಿಸಿದೆ.

ಫ್ಲಿಪ್‌ಕಾರ್ಟ್‌ ತನ್ನ ವಾರ್ಷಿಕ ಫೆಸ್ಟಿವ್‌ ಬಿಗ್‌ ಬಿಲಿಯನ್‌ ಡೇಸ್‌ ವ್ಯಾಪಾರವನ್ನು ಅಕ್ಟೋಬರ್‌ 10ರಿಂದ 14ರ ತನಕ ಆಯೋಜಿಸಿದೆ. ಅಮೆಜಾನ್‌ ಅಕ್ಟೋಬರ್‌ 10-15ರಂದು ಗ್ರೇಟ್‌ ಇಂಡಿಯನ್‌ ಫೆಸ್ಟಿವಲ್‌ ಸೇಲ್‌ ಹಮ್ಮಿಕೊಂಡಿದೆ. ಹಬ್ಬದ ಸಂದರ್ಭ ಉಭಯ ಕಂಪನಿಗಳಿಗೆ ಆರ್ಡರ್‌ಗಳ ಸಂಖ್ಯೆಯೂ ಹೆಚ್ಚು ಇರುವುದರಿಂದ ನಿಭಾಯಿಸಲು ಸಿಬ್ಬಂದಿಯ ಅಗತ್ಯ ಉಂಟಾಗಿದೆ. ಬಹುತೇಕ ಉದ್ಯೋಗಗಳು ಡೆಲಿವರಿ ಬಾಯ್ಸ್‌ ಆಗಿದ್ದು, ದಾಸ್ತಾನು ಕೇಂದ್ರ ಹಾಗೂ ವಿತರಣೆ ವಿಭಾಗದಿಂದ ಉತ್ಪನ್ನಗಳನ್ನು ಗ್ರಾಹಕರಿಗೆ ತಲುಪಿಸುವ ಜವಾಬ್ದಾರಿ ನಿರ್ವಹಿಸುತ್ತಾರೆ.

ಫ್ಲಿಪ್‌ಕಾರ್ಟ್‌ 30,000 ಮಂದಿಯನ್ನು ನೇಮಕ ಮಾಡಿಕೊಂಡಿದೆ. '' ಸರಕಾರದ ರಾಷ್ಟ್ರೀಯ ಕೌಶಲ್ಯ ಅಭಿವೃದ್ಧಿ ಯೋಜನೆಯ ನೀತಿಗೆ ಅನುಗುಣವಾಗಿ ನೇಮಕ ಪ್ರಕ್ರಿಯೆ ಮತ್ತು ತರಬೇತಿ ನೀಡಲಾಗಿದೆ. ಇದು ಸ್ಥಳೀಯವಾಗಿ ಹೆಚ್ಚು ಉದ್ಯೋಗಾವಕಾಶ ಸೃಷ್ಟಿಸಿದೆ. ಆಯ್ಕೆಯಾಗಿರುವ ಎಲ್ಲ ಸಿಬ್ಬಂದಿಗೆ ಪಿಒಎಸ್‌ ಮೆಶೀನ್‌, ಸ್ಕ್ಯಾ‌ನರ್‌, ನಾನಾ ಮೊಬೈಲ್‌ ಅಪ್ಲಿಕೇಶನ್‌ಗಳನ್ನು ಬಳಸುವ ಬಗ್ಗೆ ತರಬೇತಿ ನೀಡಲಾಗುತ್ತಿದೆ'' ಎಂದು ಫ್ಲಿಪ್‌ಕಾರ್ಟ್‌ ತಿಳಿಸಿದೆ.

ಅಮೆಜಾನ್‌ 50,000 ತಾತ್ಕಾಲಿಕ ಸಿಬ್ಬಂದಿಯನ್ನು ನೇಮಕ ಮಾಡಿಕೊಂಡಿದ್ದು, 16 ನಗರಗಳಲ್ಲಿ ತನ್ನ ಕಾಲ್‌ ಸೆಂಟರ್‌ಗಳಿಗೂ ನೇಮಕ ಮಾಡಿದೆ. ಕನ್ನಡ, ತಮಿಳು, ತೆಲುಗು ಇತ್ಯಾದಿ ಸ್ಥಳೀಯ ಭಾಷೆ ಬಲ್ಲವರಿಗೂ ಉದ್ಯೋಗ ಸಿಕ್ಕಿದೆ.