ತಿಂಗಳಿಗೆ 20% ಬಡ್ಡಿ ಆಮಿಷ ಒಡ್ಡಿ 30 ಕೋಟಿ ರೂ. ವಂಚನೆ, ಅಜ್ಮೇರಾ ಗ್ರೂಪ್‌ನ 8.41 ಕೋಟಿ ರೂ. ಆಸ್ತಿ ಜಪ್ತಿ

ಬೆಂಗಳೂರು: ಹೂಡಿಕೆ ಮೇಲೆ ತಿಂಗಳಿಗೆ ಶೇ.20ರಷ್ಟು ಬಡ್ಡಿ ನೀಡುವುದಾಗಿ ನಂಬಿಸಿ 1,148 ಜನರಿಂದ 29.17 ಕೋಟಿ ರೂ. ವಂಚಿಸಿದ್ದ ಅಜ್ಮೇರಾ ಗ್ರೂಪ್‌ಗೆ ಸೇರಿದ 8.41 ಕೋಟಿ ರೂ. ಮೌಲ್ಯದ ಆಸ್ತಿಯನ್ನು ಜಾರಿ ನಿರ್ದೇಶನಾಲಯ ಮುಟ್ಟುಗೋಲು ಹಾಕಿಕೊಂಡಿದೆ.

ಅಜ್ಮೇರಾ ಗ್ರೂಪ್‌ ಮತ್ತು ಅದರ ಪಾಲುದಾರರಾದ ತಬ್ರೇಜ್‌ ಪಾಷ, ಅಬ್ದುಲ್‌ ದಸ್ತಗೀರ್‌, ತಬ್ರೇಜ್‌ ಉಲ್ಲಾ ಶರೀಫ್‌, ಸೈಯದ್‌ ಮುದಾಸೀರ್‌, ಸೈಯದ್‌ ಮುತಹೀರ್‌ ಮತ್ತು ಫೈರೋಜ್‌ ಖಾನ್‌ ಮತ್ತು ಇತರರಿಗೆ ಸೇರಿದ ಒಟ್ಟು 13 ಬ್ಯಾಂಕ್‌ ಖಾತೆಗಳು, ಒಂದು ಡಿಮ್ಯಾಟ್‌ ಖಾತೆ, ಕೃಷಿ ಮತ್ತು ಫ್ಟ್ಯಾಟ್‌ ರೂಪದಲ್ಲಿದ್ದ ಆಸ್ತಿ ಜಪ್ತಿ ಮಾಡಲಾಗಿದೆ ಎಂದು ಇ.ಡಿ. ತಿಳಿಸಿದೆ.

1,148 ಜನರಿಂದ 34.66 ಕೋಟಿ ರೂ. ಸಂಗ್ರಹಿಸಿ 29.17 ಕೋಟಿ ರೂ. ಮರಳಿಸದೆ ವಂಚನೆ ಮಾಡಿರುವ ಕುರಿತು ಅಜ್ಮೇರಾ ಗ್ರೂಪ್‌ ವಿರುದ್ಧ 2019ರ ಜನವರಿಯಲ್ಲಿ ಜಯನಗರ ಠಾಣೆಯಲ್ಲಿ ದಾಖಲಾಗಿದ್ದ ವಂಚನೆ ಕೇಸ್‌ ಆಧರಿಸಿ ಪಿಎಂಎಲ್‌ಎ ಕಾಯಿದೆಯಡಿ ಕೇಸ್‌ ದಾಖಲಿಸಿಕೊಂಡು ಇ.ಡಿ. ಪ್ರಕರಣ ಕೈಗೆತ್ತಿಕೊಂಡಿತ್ತು.


ತನಿಖೆ ವೇಳೆ ತಿಂಗಳಿಗೆ ಶೇ.20ರಷ್ಟು ಬಡ್ಡಿ ನೀಡುವುದಾಗಿ ಅಜ್ಮೇರಾ ಗ್ರೂಪ್‌ ಒಟ್ಟು ಹತ್ತಾರಯ ಕೋಟಿ ರೂ.ಗಳನ್ನು ಸಾರ್ವಜನಿಕರಿಂದ ಸಂಗ್ರಹಿಸಿತ್ತು. ಆದರೆ, ನ್ಯಾಯಯುತವಾದ ಯಾವುದೇ ಮಾರ್ಗದಲ್ಲಿ ತಿಂಗಳಿಗೆ ಶೇ.20ರಷ್ಟು ಬಡ್ಡಿ ಮರಳಿಸಲು ಸಾಧ್ಯವಿರಲಿಲ್ಲ ಎಂದು ಇ.ಡಿ. ತಿಳಿಸಿದೆ.

ಸಾವಿರಕ್ಕೂ ಹೆಚ್ಚು ಹೂಡಿಕೆದಾರರಿಗೆ 29.17 ಕೋಟಿ ರೂ. ಮರಳಿಸದೆ ವಂಚಿಸಲಾಗಿದೆ. ಜನರ ಹಣವನ್ನು ಅಜ್ಮೇರಾ ಗ್ರೂಪ್‌ಗೆ ಸಂಬಂಧಪಡದ ವೈಯಕ್ತಿಕ ಖಾತೆಗಳಿಗೆ ಅಕ್ರಮವಾಗಿ ಜಮಾ ಮಾಡಲಾಗಿತ್ತು. ಅಲ್ಲದೆ, ಸ್ಥಿರಾಸ್ತಿ ಮತ್ತು ಚರಾಸ್ತಿಗಳ ಮೇಲೆ ಹೂಡಿಕೆ ಮಾಡಲಾಗಿತ್ತು ಎಂದು ಇ.ಡಿ. ತಿಳಿಸಿದೆ.