ನೀರವ್‌, ಚೋಕ್ಸಿಗೆ ಸೇರಿದ 1,350 ಕೋಟಿ ಮೌಲ್ಯದ ವಜ್ರ, ಮುತ್ತುಗಳು ಭಾರತಕ್ಕೆ

ಹೊಸದಿಲ್ಲಿ: ಭಾರಿ ಕಾರ್ಯಾಚರಣೆ ನಡೆಸಿರುವ ಜಾರಿ ನಿರ್ದೇಶನಾಲಯ (ಇ.ಡಿ) ಅಧಿಕಾರಿಗಳು ಹಾಂಕಾಂಗ್‌ನಲ್ಲಿದ್ದ ನೀರವ್‌ ಮೋದಿ ಮತ್ತು ಮೆಹುಲ್‌ ಚೋಕ್ಸಿ ಮಾಲೀಕತ್ವದ ಕಂಪನಿಗಳಿಂದ 1,350 ಕೋಟಿ ರೂಪಾಯಿ ಮೌಲ್ಯದ ವಜ್ರ ಮತ್ತು ಮುತ್ತುಗಳನ್ನು ವಶಕ್ಕೆ ಪಡೆದು ಭಾರತಕ್ಕೆ ತಂದಿದ್ದಾರೆ.

ಬೆಲೆ ಬಾಳುವ ವಸ್ತುಗಳನ್ನು ಒಟ್ಟು 108 ಬಾಕ್ಸ್‌ಗಳಲ್ಲಿ ಮುಂಬಯಿ ವಿಮಾನ ನಿಲ್ದಾಣಕ್ಕೆ ಬುಧವಾರ ರಾತ್ರಿ ಅಧಿಕಾರಿಗಳು ತಂದಿದ್ದಾರೆ. ಹಾಂಕಾಂಗ್‌ ಸರಕಾರದ ಜತೆಗೆ ಅಧಿಕೃತ ಮಾತುಕತೆ ನಡೆಸಿ ಅನುಮತಿ ಪಡೆದ ಬಳಿಕವೇ ಈ ಕಾರ್ಯಾಚರಣೆ ನಡೆಸಲಾಗಿದೆ.

ಅಕ್ರಮ ಹಣ ವರ್ಗಾವಣೆ ನಿಯಂತ್ರಣ ಕಾಯಿದೆ ಅನ್ವಯ ಈ ವಸ್ತುಗಳನ್ನು ಜಾರಿ ನಿರ್ದೇಶನಾಲಯ ತನ್ನ ವಶದಲ್ಲಿರಿಸಿಕೊಳ್ಳಲಿದೆ. ಈ ಪೈಕಿ ಹಲವು ಬೆಳ್ಳಿ ಆಭರಣಗಳು ಕೂಡ ಇವೆ ಎನ್ನಲಾಗಿದೆ.

ಮುಂಬಯಿಯ ಪಂಜಾಬ್‌ ನ್ಯಾಷನಲ್‌ ಬ್ಯಾಂಕ್‌ಗೆ (ಪಿಎನ್‌ಬಿ) ಸಾವಿರಾರು ಕೋಟಿ ರೂಪಾಯಿ ಸಾಲ ಮರುಪಾವತಿಸದೆ ವಂಚಿಸಿ ನೀರವ್‌ ಮತ್ತು ಆತನ ಮಾವ ಮೆಹುಲ್‌ ಚೋಕ್ಸಿ ದೇಶ ಬಿಟ್ಟು ಪರಾರಿಯಾಗಿದ್ದಾರೆ. ಸದ್ಯ ನೀರವ್‌ ಮೋದಿ ಲಂಡನ್‌ನಲ್ಲಿದ್ದು, ಅವರ ಹಸ್ತಾಂತರ ಪ್ರಕ್ರಿಯೆ ನಡೆಯುತ್ತಿದೆ.