ರಾಜಕೀಯ ಪಕ್ಷಗಳಿಂದ ಅಭ್ಯರ್ಥಿಗಳ ವೆಚ್ಚ ನಿಯಂತ್ರಣ ಅಗತ್ಯ

ಹೊಸದಿಲ್ಲಿ : ರಾಜಕೀಯ ಪಕ್ಷಗಳು ಚುನಾವಣೆಗಳ ಸಂದರ್ಭ ಅಭ್ಯರ್ಥಿಗಳ ಸಲುವಾಗಿ ಮಾಡುವ ವೆಚ್ಚಗಳಿಗೆ ಕಡಿವಾಣ ಹಾಕಲೇಬೇಕು ಎಂದು ಚುನಾವಣಾ ಆಯೋಗ ತಿಳಿಸಿದೆ.

ಪಕ್ಷವೊಂದು ಅಭ್ಯರ್ಥಿಗೆ ಮಾಡುವ ವೆಚ್ಚವು, ಅಭ್ಯರ್ಥಿಯ ನಿಗದಿತ ವೆಚ್ಚದ ಶೇ.50ನ್ನು ಮೀರಕೂಡದು ಎಂದು ಚುನಾವಣಾ ಆಯೋಗ ತನ್ನ ನಿಲುವನ್ನು ಸ್ಪಷ್ಟಪಡಿಸಿದೆ. ಈ ಸಂಬಂಧ ಕಾನೂನು ಇಲಾಖೆಗೆ ಶಿಫಾರಸುಗಳನ್ನು ಸಲ್ಲಿಸಿದೆ.

ಚುನಾವಣಾ ಆಯೋಗದ ಶಿಫಾರಸುಗಳನ್ನು ಸರಕಾರ ಸ್ವೀಕರಿಸಿದರೆ, ರಾಜಕೀಯ ಪಕ್ಷಗಳು ಲೋಕಸಭಾ ಚುನಾವಣೆಯಲ್ಲಿ ಒಬ್ಬ ಅಭ್ಯರ್ಥಿಗೆ 25-35 ಲಕ್ಷ ರೂ.ಗಳಿಂದ ಹೆಚ್ಚು ಹಣ ವ್ಯಯಿಸಲು ಸಾಧ್ಯವಾಗದು. ವಿಧಾನ ಸಭಾ ಚುನಾವಣೆಯಲ್ಲಿ ಪ್ರತಿ ಅಭ್ಯರ್ಥಿಗೆ 10-14 ಲಕ್ಷ ರೂ.ಗಿಂತ ಹೆಚ್ಚು ಹಣ ಖರ್ಚು ಮಾಡಲು ಸಾಧ್ಯವಾಗದು.

ಪ್ರತಿ ಸಲ ಚುನಾವಣೆಗಳ ಸಂದರ್ಭ ಅಕ್ರಮ ಹಣದ ಬಳಕೆ ಹೆಚ್ಚುತ್ತಿರುವುದನ್ನು ಆಯೋಗ ಗಮನಿಸಿದೆ. ಇದನ್ನು ನಿಯಂತ್ರಿಸಬೇಕಾದರೆ, ಪಕ್ಷಗಳ ಚುನಾವಣಾ ವೆಚ್ಚಕ್ಕೆ ಮಿತಿ ಹಾಕಬೇಕಾದ ಅಗತ್ಯ ಇದೆ. ಆಯೋಗವು ಇತ್ತೀಚೆಗೆ ಸರ್ವ ಪಕ್ಷಗಳ ಸಭೆಯೊಂದನ್ನು ಕರೆದು, ಪಕ್ಷಗಳ ಚುನಾವಣಾ ವೆಚ್ಚ ನಿಯಂತ್ರಿಸುವ ಬಗ್ಗೆ ಚರ್ಚಿಸಿತ್ತು. ಇದಕ್ಕೆ ಉತ್ತಮ ಸ್ಪಂದನೆಯೂ ಲಭಿಸಿತ್ತು. ಹೀಗಾಗಿ ಕಾನೂನು ಇಲಾಖೆಗೆ ತನ್ನ ಶಿಫಾರಸುಗಳನ್ನು ಮತ್ತೊಮ್ಮೆ ಸಲ್ಲಿಸಿದೆ. ಆಯೋಗವು ಅಭ್ಯರ್ಥಿಯ ಚುನಾವಣಾ ವೆಚ್ಚಗಳಿಗೆ ಈಗಾಗಲೇ ಮಿತಿ ವಿಧಿಸಿದೆ. ಲೋಕಸಭೆ ಚುನಾವಣಾ ಅಭ್ಯರ್ಥಿಗೆ 50-70 ಲಕ್ಷ ರೂ. ಹಾಗೂ ವಿಧಾನ ಸಭೆಯ ಅಭ್ಯರ್ಥಿಗೆ 20-28 ಲಕ್ಷ ರೂ.ಗಳ ಮಿತಿ ಇದೆ.