ಗುಜರಾತ್‌ನಲ್ಲಿ ಎಲೆಕ್ಷನ್‌ ಟೂರಿಸಂ

ಅಹಮದಾಬಾದ್‌: ಭಾರತದ ಪ್ರಜಾಪ್ರಭುತ್ವದ ದೊಡ್ಡ ಉತ್ಸವವಾದ ಲೋಕಸಭೆ ಚುನಾವಣೆಯ ಅನುಭವವನ್ನು ವಿದೇಶಿಯರಿಗೆ ಒದಗಿಸಲು ಗುಜರಾತ್‌ ರಾಜ್ಯದಲ್ಲಿ 'ಚುನಾವಣಾ ಪ್ರವಾಸೋದ್ಯಮ'(ಎಲೆಕ್ಷನ್‌ ಟೂರಿಸಂ) ಆರಂಭಗೊಂಡಿದೆ. ವಿಶೇಷ ಪ್ಯಾಕೇಜ್‌ಗಳನ್ನು ವಿದೇಶಿ ಪ್ರವಾಸಿಗಳಿಗೆ ನೀಡಿದ್ದು, ರಾಜ್ಯದ ವಿವಿಧೆಡೆ ನಡೆಯುವ ಅಭ್ಯರ್ಥಿಗಳ ಚುನಾವಣಾ ಪ್ರಚಾರ ಸಭೆಗಳಿಂದ ಬೈಕ್‌ ರಾರ‍ಯಲಿ ತನಕ ನಾನಾ ಅನುಭವ ಪಡೆಯಲು ಅವಕಾಶ ಕಲ್ಪಿಸಲಾಗುತ್ತದೆ.

20 ಸಂಸ್ಥೆಗಳು ಪ್ರವಾಸದ ಸ್ಪೆಷಲ್‌ ಪ್ಯಾಕೇಜ್‌ಗಳನ್ನು ರೂಪಿಸಿವೆ. ಗೈಡ್‌ಗಳನ್ನು ಒದಗಿಸಿ ಪ್ರವಾಸಿಗಳಿಗೆ ಮಾಹಿತಿ ನೀಡಲಾಗುತ್ತದೆ. 2014ರ ಚುನಾವಣೆಯಲ್ಲಿ ವಿದೇಶಗಳಿಂದ 1,800 ಪ್ರವಾಸಿಗಳು ಬಂದಿದ್ದರು. ಈ ಸಲ 2,500 ದಾಟುವ ನಿರೀಕ್ಷೆ ಇದೆ ಎಂದು ಉದ್ಯಮ ತಜ್ಞರು ಅಂದಾಜು ಮಾಡಿದ್ದಾರೆ.

''ವಿದ್ಯಾರ್ಥಿಗಳು, ಅಧ್ಯಯನಕಾರರು, ಮಾಧ್ಯಮ ವೃತ್ತಿಪರರು, ರಾಜಕೀಯ ವಿಶ್ಲೇಷಕರು, ಭಾರತದಲ್ಲಿ ಚುನಾವಣೆ ಹೇಗೆ ನಡೆಯುತ್ತದೆ ಎಂದು ಕುತೂಹಲವುಳ್ಳವರು ಎಲೆಕ್ಷನ್‌ ಟೂರಿಸಂನ ಪ್ರಯೋಜನ ಪಡೆಯುತ್ತಾರೆ,'' ಎಂದು ಗುಜರಾತ್‌ ಪ್ರವಾಸೋದ್ಯಮ ಅಭಿವೃದ್ಧಿ ಸಮಾಜ(ಜಿಟಿಡಿಎಸ್‌) ಅಧ್ಯಕ್ಷ ಮನಿಶ್‌ ಶರ್ಮಾ ತಿಳಿಸಿದ್ದಾರೆ.

2014ರ ಲೋಕಸಭೆ ಚುನಾವಣೆ ಸಂದರ್ಭದಲ್ಲಿ ಜಪಾನ್‌, ಯುಎಇ, ಅಮೆರಿಕ ಮತ್ತು ಇತರೆ ಯುರೋಪ್‌ ದೇಶಗಳಿಂದ ಹೆಚ್ಚಿನ ಪ್ರವಾಸಿಗಳು ಬಂದಿದ್ದರು. ಈ ಸಲ ಇನ್ನೂ ಹೆಚ್ಚಿನ ಪ್ರವಾಸಿಗಳ ನಿರೀಕ್ಷಿಸಿದ್ದೇವೆ ಎಂದು ಅಕ್ಷರ್‌ ಟ್ರಾವೆಲ್ಸ್‌ನ ಮಾಲೀಕ ಶರ್ಮಾ ಹೇಳಿದ್ದಾರೆ.

2017ರ ವಿಧಾನಸಭೆ ಚುನಾವಣೆಯಲ್ಲಿ ಕೆಲವು ಪ್ರವಾಸಿಗಳು ಓಪನ್‌ ಕಾರ್‌ನಲ್ಲಿ ಪ್ರಯಾಣಿಸಿದ್ದರು. ರಾರ‍ಯಲಿಗಳನ್ನು ವೀಕ್ಷಿಸಿದ್ದರು.

ಭಾರತದ ಚುನಾವಣೆಗಳನ್ನು ಅರಿಯಲು ವಿದೇಶಗಳಿಂದ ಪ್ರವಾಸಿಗಳ ಆಗಮನ. ಗುಜರಾತ್‌ನಲ್ಲಿ ಎಲೆಕ್ಷನ್‌ ಟೂರಿಸಂ ವಿಸ್ತಾರಗೊಳ್ಳುತ್ತಿದೆ. ಆರು ದಿನಗಳ ಟೂರ್‌ ಪ್ಯಾಕೇಜ್‌ಗೆ 40,000 ರೂ. ನಿಗದಿ ಮಾಡಲಾಗಿದೆ. ಎರಡು ವಾರಗಳ ಸುದೀರ್ಘ ಪ್ಯಾಕೇಜ್‌ಗಳಿಗೆ 1.50 ಲಕ್ಷ ರೂ. ಶುಲ್ಕವಿದೆ. 2012ರ ಗುಜರಾತ್‌ ವಿಧಾನಸಭೆ ಚುನಾವಣೆ ವೇಳೆ ಆರಂಭಗೊಂಡಿದ್ದ ಎಲೆಕ್ಷನ್‌ ಟೂರಿಸಂ, 2014ರ ಲೋಕಸಭೆ ಮತ್ತು ಈಗಿನ ಲೋಕಸಭೆ ಚುನಾವಣೆ ತನಕ ಬೆಳೆದಿದೆ.