ಅದಾನಿಗೆ ಪ್ರತಿಭಟನೆ ಬಿಸಿ, ತಿರುವನಂತಪುರಂ ಏರ್‌ಪೋರ್ಟ್‌ ವಶಕ್ಕೆ ಪಡೆದ ಮೊದಲ ದಿನವೇ ಭಾರಿ ವಿರೋಧ

ತಿರುವನಂತಪುರ: ತಿರುವನಂತಪುರದ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದ ಉದ್ಯೋಗಿಗಳು ಅದಾನಿ ಗ್ರೂಪ್‌ ವಿರುದ್ಧ ಪ್ರತಿಭಟನೆ ನಡೆಸಿದರು.

ವಿಮಾನ ನಿಲ್ದಾಣದ ನಿರ್ವಹಣೆಯು ಅದಾನಿ ಗ್ರೂಪ್‌ ಪಾಲಾಗಿದ್ದು, ಈ ಹಿನ್ನೆಲೆಯಲ್ಲಿ ಸಿಬ್ಬಂದಿಯು ನಿರ್ದೇಶನಾಲಯದ ಎದುರು ಪ್ರತಿಭಟನೆ ನಡೆಸಿ, ಅದಾನಿ ಗ್ರೂಪ್‌ ವಿರುದ್ಧ ಘೋಷಣೆಗಳನ್ನು ಕೂಗಿದರು. ಮಂಗಳವಾರವಷ್ಟೇ ಭಾರತೀಯ ವಿಮಾನ ನಿಲ್ದಾಣ ಪ್ರಾಧಿಕಾರದ ಜೊತೆ ಅದಾನಿ ಗ್ರೂಪ್‌ ಒಪ್ಪಂದಕ್ಕೆ ಸಹಿ ಹಾಕಿದೆ. ಅದರನ್ವಯ ತಿರುವನಂತಪುರ, ಗುವಾಹಟಿ, ಜೈಪುರ ವಿಮಾನ ನಿಲ್ದಾಣಗಳ ನಿರ್ವಹಣೆ, ಅಭಿವೃದ್ಧಿಯ ಹೊಣೆ ಅದಾನಿ ಗ್ರೂಪ್‌ಗೆ ಸೇರಲಿದೆ.

‘‘ಅದಾನಿಗೆ ವಿಮಾನ ನಿಲ್ದಾಣ ಹಸ್ತಾಂತರಿಸುವುದನ್ನು ವಿರೋಧಿಸುವ ನಮ್ಮ ಅರ್ಜಿಯು ಸುಪ್ರೀಂ ಕೋರ್ಟ್‌ನಲ್ಲಿದೆ. ಏತನ್ಮಧ್ಯೆ, ಸರಕಾರವು ಒಪ್ಪಂದ ಮಾಡಿಕೊಂಡಿದೆ. ಅಂಥ ತುರ್ತು ಏನಿತ್ತು?" ಎಂದು ಸಿಬ್ಬಂದಿ ಪ್ರಶ್ನಿಸಿದ್ದಾರೆ.

ಅದಾನಿಗೆ ತಿರುವನಂತಪುರಂ ಏರ್‌ಪೋರ್ಟ್‌ ಹಸ್ತಾಂತರಕ್ಕೆ ಭಾರಿ ವಿರೋಧ, ಪ್ರಧಾನಿಗೆ ಸಿಎಂ ಪತ್ರ
2019ರ ಫೆಬ್ರವರಿಯಲ್ಲಷ್ಟೇ ಕೇಂದ್ರ ಸರಕಾರವು ಲಖನೌ, ಅಹಮದಾಬಾದ್‌, ಮಂಗಳೂರು ವಿಮಾನ ನಿಲ್ದಾಣಗಳನ್ನು ಖಾಸಗೀಕರಣ ಮಾಡಿ, ಅದಾನಿ ಗ್ರೂಪ್‌ಗೆ ಹಸ್ತಾಂತರಿಸಿತ್ತು. ಈಗ ಇನ್ನಷ್ಟು ಏರ್‌ಪೋರ್ಟ್‌ಗಳು ಅದಾನಿ ವಶಕ್ಕೆ ಹೋಗಿವೆ.