ಹೊಸದಿಲ್ಲಿ: ಸರಕಾರ ಉದ್ಯೋಗಿಗಳ ಭವಿಷ್ಯನಿಧಿಯ (ಇಪಿಎಫ್) ಕಡ್ಡಾಯಕ್ಕೆ ಮಾಸಿಕ ವೇತನದ ಮಿತಿಯನ್ನು ಈಗಿನ 15,000 ರೂ.ಗಳಿಂದ 21,000 ರೂ.ಗೆ ಏರಿಸಿದೆ. ಇದರಿಂದ ಉದ್ಯೋಗಿಗಳಿಗೆ ಅನುಕೂಲವಾಗಲಿದೆ.
ಸರಕಾರದ ಈ ನಿಲುವಿನಿಂದ ಮಾಸಿಕ 21,000 ರೂ. ತನಕದ ವೇತನಕ್ಕೆ ಇಪಿಎಫ್ ಕಡ್ಡಾಯವಾಗಲಿದೆ. ಇಪಿಎಫ್ ಚಂದಾದಾರರ ಸಂಖ್ಯೆಯೂ ಇದರಿಂದ ಹೆಚ್ಚುವ ಸಂಭವ ಇದೆ. ಇಪಿಎಫ್ ಚಂದಾದಾರರ ಸಂಖ್ಯೆ ಸುಮಾರು 50 ಲಕ್ಷ ಅಂದರೆ 4.25 ಕೋಟಿಗೆ ವೃದ್ಧಿಸುವ ಸಂಭವ ಇದೆ.
ಕಡ್ಡಾಯ ಇಪಿಎಫ್ಗೆ ವೇತನ ಮಿತಿಯನ್ನು 15 ಸಾವಿರ ರೂ.ಗಳಿಂದ 21 ಸಾವಿರ ರೂ.ಗೆ ಏರಿಸುವ ಪ್ರಸ್ತಾಪ ಬಹುಕಾಲದಿಂದ ನನೆಗುದಿಯಲ್ಲಿತ್ತು. ಇದರಿಂದ ಸರಕಾರಕ್ಕೆ ಆಗಬಹುದಾದ ಹಣಕಾಸು ವೆಚ್ಚವನ್ನು ಅಂದಾಜು ಮಾಡುವಂತೆ ಹಣಕಾಸು ಸಚಿವಾಲಯವು ಕಾರ್ಮಿಕ ಸಚಿವಾಲಯಕ್ಕೆ ಸೂಚಿಸಿತ್ತು. ಈ ಮಿತಿ ಏರಿಕೆಯಿಂದ ಸರಕಾರದ ಬೊಕ್ಕಸಕ್ಕೆ ವಾರ್ಷಿಕ 3,000 ಕೋಟಿ ರೂ. ಹೊರೆಯಾಗಲಿದೆ. ಸರಕಾರವು ಮಾಸಿಕ 15,000 ರೂ.ಗಿಂತ ಕಡಿಮೆ ವೇತನ ಪಡೆಯುವವರಿಗೆ ಇಪಿಎಸ್ ಬಾಬ್ತು ವೇತನದ ಶೇ.1.16ರಷ್ಟು ಮೊತ್ತವನ್ನು ನೀಡುತ್ತದೆ. 20 ಅಥವಾ ಹೆಚ್ಚು ಉದ್ಯೋಗಿಗಳಿರುವ ಸಂಸ್ಥೆ/ಕಂಪನಿಯಲ್ಲಿ ಇಪಿಎಫ್ ಕಡ್ಡಾಯವಾಗಿರುತ್ತದೆ. ಉದ್ಯೋಗಿ ತನ್ನ ಮೂಲ ವೇತನದ ಶೇ.12ರಷ್ಟು ಮೊತ್ತವನ್ನು ಇಪಿಎಫ್ಗೆ ನೀಡುತ್ತಾನೆ. ಉದ್ಯೋಗದಾತರು ಶೇ.8.33ರಷ್ಟು ಮೊತ್ತವನ್ನು ಇಪಿಎಸ್ ಹಾಗೂ ಶೇ.3.67ರಷ್ಟು ಮೊತ್ತವನ್ನು ಇಪಿಎಫ್ಗೆ ನೀಡುತ್ತಾರೆ. (ಮೂಲ ವೇತನದ 15,000 ರೂ. ತನಕ)