ದೀಪಾವಳಿ ವೇಳೆಗೆ ಪಿಎಫ್‌ ಬಡ್ಡಿಯ ಮೊದಲ ಕಂತು ಖಾತೆಗೆ ಜಮೆ

ಹೊಸದಿಲ್ಲಿ: ನೌಕರರ ಭವಿಷ್ಯ ನಿಧಿ (ಪಿಎಫ್) ಚಂದಾದಾರರಿಗೆ ಖುಷಿಯ ಸಮಾಚಾರವಿದು. ದೀಪಾವಳಿ ಹಬ್ಬದ ವೇಳೆಗೆ ಪಿಎಫ್ ಮೊತ್ತದ ಬಡ್ಡಿಯನ್ನು ಗ್ರಾಹಕರ ಖಾತೆಗೆ ಜಮೆಯಾಗಲಿದೆ ಎಂದು ಟೈಮ್ಸ್‌ ನೌ ವರದಿ ಮಾಡಿದೆ.

2019-20 ಸಾಲಿಗೆ ಪಿಎಫ್‌ ಹಣಕ್ಕೆ ಶೇ.8.5ರ ಬಡ್ಡಿ ಪಾವತಿಸುವುದಾಗಿ ಕೇಂದ್ರ ಸರಕಾರ ಘೋಷಿಸಿತ್ತು. ಆದರೆ, ಈ ಎರಡು ಕಂತುಗಳಲ್ಲಿ ಪಾವತಿಸುವುದಾಗಿಯೂ ತಿಳಿಸಿತ್ತು. ಅದರಂತೆ ಮೊದಲ ಕಂತಿನಲ್ಲಿ ಶೇ. 8.15ರಷ್ಟು ಬಡ್ಡಿಯನ್ನು ಜಮೆ ಮಾಡಲಿದೆ. ಉಳಿದ ಶೇ. 0.35 ಬಡ್ಡಿ ಹಣವನ್ನು ಡಿಸೆಂಬರ್‌ನಲ್ಲಿ ಪಾವತಿಸಲಾಗುವುದು ಎಂದು ತಿಳಿಸಿದೆ.

ಕೊರೊನಾ ಲಾಕ್‌ಡೌನ್‌ ನಂತರ ಪಿಎಫ್‌ ಬಡ್ಡಿಗೆ ಕತ್ತರಿ ಹಾಕಲಾಗುತ್ತದೆ ಎನ್ನಲಾಗಿತ್ತು. ಆದರೆ, ಕಳೆದ ಮಾರ್ಚ್‌ನಲ್ಲಿ ಘೋಷಿಸಿದಂತೆ ಶೇಕಡಾ 8.5ರ ಬಡ್ಡಿದರ ಸಿಗುತ್ತಿರುವುದು ಪಿಎಫ್‌ ಖಾತೆದಾರರಿಗೆ ಸಂತಸದ ವಿಚಾರ.

7ನೇ ಸರಣಿಯ 'ಸಾವರಿನ್‌ ಗೋಲ್ಡ್‌ ಬಾಂಡ್‌ ಬಿಡುಗಡೆ: ಬಡ್ಡಿ ಎಷ್ಟು? ಖರೀದಿ ಹೇಗೆ?

ಆದರೆ, ಶೇ.8.5ರ ಬಡ್ಡಿದರ 7 ವರ್ಷದ ಕನಿಷ್ಠ ಬಡ್ಡಿದರವಾಗಿದೆ. ಕಳೆದ ಮಾರ್ಚ್‌ನ ಮೊದಲ ವಾರದಲ್ಲಿ ಶೇ.8.5ರ ಬಡ್ಡಿ ದರವನ್ನು ಇಪಿಎಫ್‌ಒ ಘೋಷಿಸಿತ್ತು. ಆ ಮೊದಲು ಶೇ.8.65ರ ಬಡ್ಡಿದರವಿತ್ತು. ಬದಲಾದ ಪರಿಸ್ಥಿತಿಯಲ್ಲಿ ಬಡ್ಡಿ ದರವನ್ನು ಶೇ.8.1ಕ್ಕೆ ಇಳಿಸುವ ಬಗ್ಗೆ ಇಪಿಎಫ್‌ಒ ಚಿಂತನೆ ನಡೆಸಿದೆ. 2015-16ರಲ್ಲಿ ಶೇ.8.8ರಷ್ಟಿದ್ದ ಬಡ್ಡಿದರ ಇಳಿಕೆಯ ಹಾದಿಯಲ್ಲಿ ಸಾಗಿದೆ.