ಇಪಿಎಫ್‌ಒಗೆ ಆಗಸ್ಟ್‌ನಲ್ಲಿ ದಾಖಲೆಯ 10.5 ಲಕ್ಷ ಸದಸ್ಯರ ಸೇರ್ಪಡೆ

ಹೊಸದಿಲ್ಲಿ: ಕೋವಿಡ್‌-19 ಬಿಕ್ಕಟ್ಟಿನ ನಡುವೆಯೂ ದೇಶದ ಸಂಘಟಿತ ವಲಯದಲ್ಲಿಕಳೆದ ಆಗಸ್ಟ್‌ನಲ್ಲಿ ಉದ್ಯೋಗಾವಕಾಶಗಳು ವೃದ್ಧಿಸಿರುವುದನ್ನು ಅಂಕಿ ಅಂಶಗಳು ಬಿಂಬಿಸಿವೆ. ಉದ್ಯೋಗಿಗಳ ಭವಿಷ್ಯನಿಧಿ ಇಪಿಎಫ್‌ಒದಲ್ಲಿ ಹೊಸತಾಗಿ ಸೇರ್ಪಡೆಯಾಗಿರುವ ಸದಸ್ಯರ ಸಂಖ್ಯೆಯಲ್ಲಿ 10.05 ಲಕ್ಷ ಹೆಚ್ಚಳವಾಗಿದೆ.

2020ರ ಜುಲೈನಲ್ಲಿ 7.48 ಲಕ್ಷ ಹೆಚ್ಚಳವಾಗಿತ್ತು. ಈ ವರ್ಷ ಮಾರ್ಚ್ನಲ್ಲಿ ಹೊಸ ಸೇರ್ಪಡೆಯ ಸಂಖ್ಯೆ 5.72 ಲಕ್ಷಕ್ಕೆ ಕುಸಿದಿತ್ತು. ಫೆಬ್ರವರಿಯಲ್ಲಿ 10.21 ಲಕ್ಷವಿತ್ತು.

ಲಾಕ್‌ಡೌನ್‌ ಪರಿಣಾಮ ಆರ್ಥಿಕ ಚಟುವಟಿಕೆಗಳು ಅಸ್ತವ್ಯಸ್ತವಾಗಿದ್ದ ಏಪ್ರಿಲ್‌ನಲ್ಲಿ ಪಿಎಫ್‌ ಸೇರ್ಪಡೆಯ ಅಂಕಿ ಅಂಶಗಳು ಋುಣಾತ್ಮಕವಾಗಿತ್ತು. ಅಂದರೆ 1,04,608 ಮಂದಿ ಇಪಿಎಫ್‌ಒದಿಂದ ನಿರ್ಗಮಿಸಿದ್ದರು. ಮೇನಲ್ಲಿ 35,336 ಮಂದಿ ನಿರ್ಗಮಿಸಿದ್ದರು.

ಸಾಮಾನ್ಯ ಪರಿಸ್ಥಿತಿಯಲ್ಲಿ ಇಪಿಎಫ್‌ಒಗೆ ಪ್ರತಿ ತಿಂಗಳು ಸರಾಸರಿ 7 ಲಕ್ಷ ಹೊಸ ಸೇರ್ಪಡೆಯಯಾಗುತ್ತಿತ್ತು. 2019-20ರಲ್ಲಿ ಹೊಸತಾಗಿ 78.58 ಲಕ್ಷ ಮಂದಿ ಸೇರ್ಪಡೆಯಾಗಿದ್ದರು. ಇದಕ್ಕೂ ಹಿಂದಿನ 2018-19ರ ಸಾಲಿನಲ್ಲಿ 61.12 ಲಕ್ಷ ಮಂದಿ ಸೇರಿದ್ದರು.

ತಾತ್ಕಾಲಿಕ ಉದ್ಯೋಗಗಳಿಗೆ ಸೇರಿದವರೂ ಇಪಿಎಫ್‌ಒದಲ್ಲಿ ಸೇರ್ಪಡೆಯಾಗುತ್ತಾರೆ. ಆದ್ದರಿಂದ ಸೇರ್ಪಡೆಯಾದ ಎಲ್ಲರೂ ಕಾಯಂ ಉದ್ಯೋಗಿಗಳಾಗಿರುವುದಿಲ್ಲ. ಹೀಗಿದ್ದರೂ ಉದ್ಯೋಗಾವಕಾಶಗಳ ಸುಧಾರಣೆಯನ್ನು ಇದು ಬಿಂಬಿಸಿದೆ. ಇಪಿಎಫ್‌ಒ 6 ಕೋಟಿಗೂ ಹೆಚ್ಚು ಸಕ್ರಿಯ ಸದಸ್ಯರನ್ನು ಒಳಗೊಂಡಿದೆ.

24 ಗಂಟೆಗಳಲ್ಲಿ ಕ್ಲೇಮ್‌ ಇತ್ಯರ್ಥ:
ಕೋವಿಡ್‌ ಬಿಕ್ಕಟ್ಟಿನ ಸಂದರ್ಭದಲ್ಲಿ ಇಪಿಎಫ್‌ಒ ತನ್ನ ಸದಸ್ಯರ ಶೇ.90ರಷ್ಟು ಕ್ಲೇಮ್‌ಗಳನ್ನು 24 ಗಂಟೆಗಳೊಳಗೆ ಇತ್ಯರ್ಥಪಡಿಸಿದೆ ಎಂದು ಕಾರ್ಮಿಕ ಸಚಿವ ಸಂತೋಷ್‌ ಗಂಗ್ವಾರ್‌ ತಿಳಿಸಿದ್ದಾರೆ.

ಸುಮಾರು 750 ಕೋಟಿ ರೂ. ಮೊತ್ತದ ಕ್ಲೇಮ್‌ಗಳಿಗೆ ಸಂಬಂಧಿಸಿ 3.25 ಲಕ್ಷ ಅರ್ಜಿಗಳನ್ನು 24 ಗಂಟೆಗಳೊಳಗೆ ಇತ್ಯರ್ಥಪಡಿಸಲಾಗಿದೆ ಎಂದರು.