ಪಿಎಫ್‌ ಬಡ್ಡಿದರಕ್ಕೆ ಕತ್ತರಿ ಇಲ್ಲ! ಎರಡು ಕಂತಿನಲ್ಲಿ ಶೇ.8.5 ಬಡ್ಡಿ ಜಮೆ

ಹೊಸದಿಲ್ಲಿ: ನೌಕರರ ಭವಿಷ್ಯ ನಿಧಿಯ (ಇಪಿಎಫ್‌) ಬಡ್ಡಿಗೆ ಕೊನೆಗೂ ಕತ್ತರಿ ಹಾಕದಿರಲು ಸರಕಾರ ನಿರ್ಧರಿಸಿದೆ. ಉದ್ಯೋಗಿಗಳ ಭವಿಷ್ಯ ನಿಧಿ ಸಂಘಟನೆ (ಇಪಿಎಫ್‌ಒ)ಯ ಕೇಂದ್ರೀಯ ಮಂಡಳಿಯು ಈ ಕುರಿತು ಬುಧವಾರ ಹೇಳಿಕೆ ನೀಡಿದೆ. 2019-20 ಸಾಲಿಗೆ ಶೇ.8.5ರ ಬಡ್ಡಿದರದಲ್ಲಿ ದೇಶದ ಸಮಸ್ತ ಪಿಎಫ್‌ ಖಾತೆದಾರರಿಗೆ ಜಮೆ ಮಾಡಲಾಗುವುದು ಎಂದು ತಿಳಿಸಿದೆ.

ಆದರೆ, ಬಡ್ಡಿ ಹಣವನ್ನು ಎರಡು ಕಂತುಗಳನ್ನು ಜಮೆ ಮಾಡಲಾಗುತ್ತದೆ. ನಿವೃತ್ತಿ ನಿಧಿ ನಿಕಾಯವು ಈ ಕುರಿತು ನಿರ್ಧರಿಸಿದ್ದು, ಮೊದಲಿಗೆ ಶೇ.8.15ರಷ್ಟು ಬಡ್ಡಿ ಹಣವನ್ನು ಪಾವತಿ ಮಾಡಲಾಗುತ್ತದೆ. ಉಳಿದ ಶೇ. 0.35 ಬಡ್ಡಿ ಹಣವನ್ನು ಡಿಸೆಂಬರ್‌ನಲ್ಲಿ ಪಾವತಿಸಲಾಗುವುದು ಎಂದು ತಿಳಿಸಿದೆ.

2020ರ ಆರ್ಥಿಕ ವರ್ಷಕ್ಕೆ ಪಿಎಫ್‌ ಬಡ್ಡಿದರವನ್ನು ಶೇ.8.5ಕ್ಕಿಂತ ಕೆಳಗಿಳಿಸಲು ಆಗದು. ಆದರೆ, ಸದ್ಯದ ಪರಿಸ್ಥಿತಿಯಲ್ಲಿ ಕೆಲವು ಹೂಡಿಕೆಗಳನ್ನು ನಗದೀಕರಿಸಲು ಸಾಧ್ಯವಿಲ್ಲ. ಹೀಗಾಗಿ ಬಡ್ಡಿಯನ್ನು ಎರಡು ಕಂತುಗಳಲ್ಲಿ ಪಾವತಿಸಲಾಗುತ್ತಿದೆ ಎಂದು ಉದ್ಯೋಗಿಗಳ ಭವಿಷ್ಯ ನಿಧಿ ಸಂಘಟನೆ (ಇಪಿಎಫ್‌ಒ)ಯ ಕೇಂದ್ರೀಯ ಮಂಡಳಿಯ ಟ್ರಸ್ಟಿ ವಿರ್ಜೇಶ್ ಉಪಾಧ್ಯಾಯ ( Virjesh Upadhyay) ತಿಳಿಸಿದ್ದಾರೆ.

ಆರು ಕೋಟಿ ಚಂದಾದಾರರ ಪಿಎಫ್‌ ಬಡ್ಡಿ ದರ ಕಡಿತ ಸಂಭವ!

ಕೊರೊನಾ ಲಾಕ್‌ಡೌನ್‌ ನಂತರ ಪಿಎಫ್‌ ಬಡ್ಡಿಗೆ ಕತ್ತರಿ ಹಾಕಲಾಗುತ್ತದೆ ಎನ್ನಲಾಗಿತ್ತು. ಆದರೆ, ಕಳೆದ ಮಾರ್ಚ್ನಲ್ಲಿ ಘೋಷಿಸಿದಂತೆ ಶೇಕಡಾ 8.5ರ ಬಡ್ಡಿದರ ಸಿಗುತ್ತಿರುವುದು ಪಿಎಫ್‌ ಖಾತೆದಾರರಿಗೆ ಸಂತಸದ ವಿಚಾರ.

ಅಮೆರಿಕದ ಆಗರ್ಭ ಶ್ರೀಮಂತರ ಪಟ್ಟಿಯಲ್ಲಿ ಸ್ಥಾನ ಗಿಟ್ಟಿಸಿದ ಭಾರತ ಮೂಲದ 7 ಮಂದಿ! ಯಾರಿವರು?

ಆದರೆ, ಶೇ.8.5ರ ಬಡ್ಡಿದರ 7 ವರ್ಷದ ಕನಿಷ್ಠ ಬಡ್ಡಿದರವಾಗಿದೆ. ಕಳೆದ ಮಾರ್ಚ್‌ನ ಮೊದಲ ವಾರದಲ್ಲಿ ಶೇ.8.5ರ ಬಡ್ಡಿ ದರವನ್ನು ಇಪಿಎಫ್‌ಒ ಘೋಷಿಸಿತ್ತು. ಆ ಮೊದಲು ಶೇ.8.65ರ ಬಡ್ಡಿದರವಿತ್ತು. ಬದಲಾದ ಪರಿಸ್ಥಿತಿಯಲ್ಲಿ ಬಡ್ಡಿ ದರವನ್ನು ಶೇ.8.1ಕ್ಕೆ ಇಳಿಸುವ ಬಗ್ಗೆ ಇಪಿಎಫ್‌ಒ ಚಿಂತನೆ ನಡೆಸಿದೆ. 2015-16ರಲ್ಲಿ ಶೇ.8.8ರಷ್ಟಿದ್ದ ಬಡ್ಡಿದರ ಇಳಿಕೆಯ ಹಾದಿಯಲ್ಲಿ ಸಾಗಿದೆ.