ಬರಿ ಕಾಫಿ ಲೋಟದಷ್ಟು ಎತ್ತರವಿರುವ ಭಾರತದ ಮೊದಲ ಖಾಸಗಿ ವಾಣಿಜ್ಯ ಸಂಸ್ಥೆ ನಿರ್ಮಿತ ಉಪಗ್ರಹ

ಮುಂಬಯಿ/ಹೊಸದಲ್ಲಿ: ಸೋಮವಾರ ಮಧ್ಯರಾತ್ರಿಯಂದು ಎಲನ್ ಮಸ್ಕ್ ನೇತೃತ್ವದ ಅಮೆರಿಕ ಬಾಹ್ಯಾಕಾಶ ಸಂಸ್ಥೆ ಸ್ಪೇಸ್‌ಎಕ್ಸ್ (SpaceX), ಭಾರತ ಮೊದಲ ಖಾಸಗಿ ನಿರ್ಮಿತ ಎಕ್ಸೀಡ್ ಸ್ಯಾಟ್-1 (Exceed Sat I) ಉಪಗ್ರಹವನ್ನು ಉಡ್ಡಯನಗೊಳಿಸಿತ್ತು. ಇದೇ ಸಂದರ್ಭದಲ್ಲಿ 17 ದೇಶಗಳ ಒಟ್ಟು 63 ಉಪಗ್ರಹಗಳನ್ನು ಬಾಹ್ಯಾಕಾಶಕ್ಕೆ ರವಾನಿಸಿತ್ತು.

ತಾಂತ್ರಿಕ ಹಾಗೂ ಹವಾಮಾನ ವೈಪರೀತ್ಯದಿಂದಾಗಿ 10 ದಿನಗಳಷ್ಟು ವಿಳಂಬಗೊಂಡ ಉಡ್ಡಯನ ಕೊನೆಗೂ ಸ್ಪೇಸ್‌ ಎಕ್ಸ್‌ನ ಫಾಲ್ಕನ್ 9 ರಾಕೆಟ್ ವಾಹಕವು ಭಾರತೀಯ ಕಾಲಮಾನ ಸೋಮವಾರ ಮಧ್ಯ ರಾತ್ರಿ ಕ್ಯಾಲಿಫೋರ್ನಿಯಾದ ವ್ಯಾಂಡನ್‌ಬರ್ಗ್ ವಾಯುಪಡೆ ನೆಲೆಯಿಂದ ಬಾಹ್ಯಾಕಾಶಕ್ಕೆ ಪ್ರಯಾಣ ಬೆಳೆಸಿತ್ತು. ತದಾ ಬಳಿಕ 43 ನಿಮಿಷಗಳ ಬಳಿಕ ಎಕ್ಸೀಡ್ ಸ್ಯಾಟ್-1 ಉಪಗ್ರಹವು ಯಶಸ್ವಿಯಾಗಿ ಕಕ್ಷೆಗೆ ಸೇರಿತ್ತು.

ಇದರೊಂದಿಗೆ ಮುಂಬಯಿ ತಳಹದಿಯ ಎಕ್ಸೀಡ್ ಸಂಸ್ಥೆಯು, ಬಾಹ್ಯಾಕಾಶಕ್ಕೆ ಉಪಗ್ರಹವನ್ನು ರವಾನಿಸಿದ ಭಾರತದ ಮೊದಲ ಖಾಸಗಿ ವಾಣಿಜ್ಯ ಸಂಸ್ಥೆ ಎಂಬ ಕೀರ್ತಿಗೆ ಪಾತ್ರವಾಗಿದೆ.

ಸಣ್ಣದಾದ ಸಂವಹನ ಉಪಗ್ರಹವಾಗಿರುವ ಎಕ್ಸೀಡ್ ಸ್ಯಾಟ್ 1, ಕೇವಲ ಒಂದು ಕೆ.ಜಿ ಭಾರ ಹಾಗೂ ಕಾಫಿ ಲೋಟದಷ್ಟು ಎತ್ತರವನ್ನು ಮಾತ್ರ ಪಡೆದಿದೆ.


ಇದೊಂದು ಓಪನ್ ರೆಡಿಯೋ ಟ್ರಾನ್ಸ್‌ಪಾಂಡರ್ ಆಗಿದ್ದು, ಮುಖ್ಯ ಉದ್ದೇಶ ಹವ್ಯಾಸಿ ರೆಡಿಯೋ ಸಮುದಾಯಕ್ಕೆ ನೆರವಾಗುವುದಾಗಿದೆ. ಪ್ರಮುಖವಾಗಿಯೂ ದುರಂತದ ಸಮಯದಲ್ಲಿ ದೇಶಕ್ಕೆ ನೆರವಾಗಲಿದೆ.

ಹೆಚ್ಚು ಖರ್ಚು ವೆಚ್ಚ ಮಾಡದೆ ವಾಣಿಜ್ಯ ಉಪಗ್ರಹ ಸಿದ್ಧ ಮಾಡಬಹುದು ಎಂಬುದನ್ನು ಎಕ್ಸೀಡ್ ನಿರೂಪಿಸಿದೆ. 18 ತಿಂಗಳುಗಳ ಅವಧಿಯಲ್ಲಿ ನಿರ್ಮಿತವಾಗಿರುವ ಉಪಗ್ರಹದ ನೆರವನ್ನು ಜನರು ಟಿವಿ ಟ್ಯೂನರ್ ಸಹಾಯದಿಂದ 145.9 ಮೆಗಾಹರ್ಟ್ಸ್ ತರಂಗಾರತರದ ಸಿಗ್ನಲ್‌ಗಳಲ್ಲಿ ಪಡೆಯಬಹುದಾಗಿದೆ.

ಒಟ್ಟಿನಲ್ಲಿ ಎಕ್ಸೀಡ್ ಉಪಗ್ರಹ ಕಕ್ಷೆ ಸೇರುವುದರೊಂದಿಗೆ ಬಾಹ್ಯಾಕಾಶ ಕ್ಷೇತ್ರದಲ್ಲಿ ಭಾರತದ ಅಂತರಿಕ್ಷ ಸಂಶೋಧನಾ ಸಂಸ್ಥೆಯ (ಇಸ್ರೋ) ಸರ್ವಾಧಿಕಾರವು ಕೊನೆಗೊಂಡಿದೆ.