ನಕಲಿ ಕಾಲ್‌ಸೆಂಟರ್‌ ದಂಧೆ, ಉದ್ಯೋಗ ನೀಡುವುದಾಗಿ ನಂಬಿಸಿ ವಂಚನೆ, 11 ಮಂದಿ ಸೆರೆ

ಹೊಸದಿಲ್ಲಿ: ಉದ್ಯೋಗ ನೀಡುವುದಾಗಿ ನಂಬಿಸಿ ನಕಲಿ ಕಾಲ್‌ಸೆಂಟರ್‌ ನಡೆಸುತ್ತಿದ್ದ 11 ವಂಚಕರನ್ನು ದಿಲ್ಲಿ ಪೊಲೀಸರು ಬಂಧಿಸಿದ್ದಾರೆ. ಬಂಧಿತರಲ್ಲಿ ನಾಲ್ವರು ಮಹಿಳೆಯರೂ ಇದ್ದು, ದಕ್ಷಿಣ ದಿಲ್ಲಿಯ ಮೆಹ್ರೌಲಿ ಪ್ರದೇಶದಲ್ಲಿ ಮಂಗಳವಾರ ಇವರನ್ನು ಬಂಧಿಸಲಾಗಿದೆ.

ಅಲ್ಟ್ರಾಟೆಕ್‌, ವಿಸ್ತಾರಾ ಏರ್‌ಲೈನ್ಸ್‌, ಇಂಡಿಗೊ ಏರ್‌ಲೈನ್ಸ್‌ ಸೇರಿದಂತೆ ಪ್ರತಿಷ್ಠಿತ ಕಂಪನಿಗಳಲ್ಲಿ ಉದ್ಯೋಗ ಕೊಡಿಸುವುದಾಗಿ ನಂಬಿಸಿದ್ದ ಬಂಧಿತರು, ನೋಂದಣಿ ಶುಲ್ಕವಾಗಿ ಅಭ್ಯರ್ಥಿಗಳಿಂದ ತಲಾ 2,200 ರೂ. ವಸೂಲಿ ಮಾಡುತ್ತಿದ್ದರು.

ನಂತರ ನಕಲಿ ಅಪಾಯಿಂಟ್‌ಮೆಂಟ್‌ ಪತ್ರಗಳನ್ನು ಕಳುಹಿಸಿ, ಅಭ್ಯರ್ಥಿಯ ಶಕ್ತಿಗೆ ಅನುಸಾರವಾಗಿ 10 ಸಾವಿರ ರೂ.ನಿಂದ 40 ಸಾವಿರ ರೂ.ವರೆಗೆ ಹೆಚ್ಚುವರಿ ಹಣ ಪಡೆಯುತ್ತಿದ್ದರು. ಇವರಿಂದ ವಂಚನೆಗೊಳಗಾದ ಅಭ್ಯರ್ಥಿಯೊಬ್ಬರ ದೂರಿನ ಮೇರೆಗೆ ನಕಲಿ ಕಾಲ್‌ಸೆಂಟರ್‌ ಮೇಲೆ ಪೊಲೀಸರು ದಾಳಿ ನಡೆಸಿದ್ದಾರೆ. ಅಭ್ಯರ್ಥಿಗಳನ್ನು ಸೆಳೆಯಲು ಬಳಸಲಾಗುತ್ತಿದ್ದ ಲ್ಯಾಪ್‌ಟಾಪ್‌, ಮೊಬೈಲ್‌ ಫೋನ್‌ಗಳನ್ನು ಪೊಲೀಸರು ವಶಕ್ಕೆ ಪಡೆದಿದ್ದಾರೆ.

ಇನ್ನೂ ಮೂವರು ಆರೋಪಿಗಳು ತಲೆಮರೆಸಿಕೊಂಡಿದ್ದು, ಅವರಿಗಾಗಿ ಶೋಧ ನಡೆಸಲಾಗುತ್ತಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.