ಹಬ್ಬದ ಅವಧಿಯ ಸೇಲ್ಸ್‌ನಲ್ಲಿ ದಾಖಲೆ ಸೃಷ್ಟಿಸಿದ ಅಮೆಜಾನ್‌, ಫ್ಲಿಪ್‌ಕಾರ್ಟ್‌

ಹೊಸದಿಲ್ಲಿ: ಅಮೆಜಾನ್‌ ಮತ್ತು ಫ್ಲಿಪ್‌ಕಾರ್ಟ್‌ಗಳು ಹಬ್ಬದ ಅವಧಿಯ ಕೇವಲ 4 ದಿನಗಳ ಮಾರಾಟದಲ್ಲಿ ಹೊಸ ದಾಖಲೆ ಸೃಷ್ಟಿಸಿವೆ. 3.5 ಬಿಲಿಯನ್‌ ಡಾಲರ್‌ (26,000 ಕೋಟಿ ರೂ.) ಹಬ್ಬದ ಮಾರಾಟ ವಹಿವಾಟು ನಡೆದಿದ್ದು, ಇದು 4.7 ಬಿಲಿಯನ್‌ ಡಾಲರ್‌ ಮುಟ್ಟುವ ಸಾಧ್ಯತೆ ಇದೆ ಎಂದು ಉದ್ಯಮ ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ.

ಇ-ಕಾಮರ್ಸ್‌ ವಲಯದ ಎರಡು ಬೃಹತ್‌ ಕಂಪನಿಗಳಾದ ಅಮೆಜಾನ್‌ ಇಂಡಿಯಾ ಮತ್ತು ಫ್ಲಿಪ್‌ಕಾರ್ಟ್‌, ವಾರದ ಅವಧಿಯ ಮಾರಾಟ (ಅ.15ರಿಂದ ಅ.22) ಹಳೆಯ ದಾಖಲೆಗಳನ್ನು ಮುರಿದಿದೆ ಎಂದು ‘ಪೋರೆಸ್ಟರ್‌ ರೀಸರ್ಚ್‌ ಆ್ಯಂಡ್‌ ರೆಡ್‌ಸೀರ್‌ ಕನ್ಸಲ್ಟೆಂಗ್ಸ್‌ ಹೇಳಿದೆ.

"ಹಬ್ಬದ ಸೇಲ್ಸ್‌ನ ಮೊದಲ 2-3 ದಿನಗಳಲ್ಲಿಯೇ ದೊಡ್ಡ ಮಟ್ಟದ ಖರೀದಿ ವಹಿವಾಟುಗಳು ನಡೆದಿವೆ. ಹೊಸ ಗ್ರಾಹಕರು ದೊಡ್ಡ ಪ್ರಮಾಣದಲ್ಲಿದ್ದಾರೆ," ಎಂದು ಅಮೆಜಾನ್‌ ಇಂಡಿಯಾ ಉಪಾಧ್ಯಕ್ಷ ಮನೀಶ್‌ ತಿವಾರಿ ಹೇಳಿದ್ದಾರೆ.

ಈ ವರ್ಷ 1,100 ಹೊಸ ಉತ್ಪನ್ನಗಳನ್ನು ಮಾರುಕಟ್ಟೆಗೆ ಅಮೆಜಾನ್‌ ಮೂಲಕ ಬಿಡುಗಡೆ ಮಾಡಲಾಗಿದೆ. ಸ್ಯಾಮ್‌ಸಂಗ್‌, ಆ್ಯಪಲ್‌, ಶಿಯೋಮಿ, ಒನ್‌ ಪ್ಲಸ್‌, ಆಸಸ್‌, ಲೆನೊವೊ, ಎಚ್‌ಪಿ, ಎಲ್‌ಜಿ, ವರ್ಲ್‌ಪೂಲ್‌, ಬಜಾಜ್‌ ಅಪ್ಲೈನ್ಸಸ್‌ ಮತ್ತಿತರ ಪ್ರಮುಖ ಬ್ರ್ಯಾಂಡ್‌ಗಳು ದೊಡ್ಡ ವಹಿವಾಟು ನಡೆಸಿವೆ.

ವಾಲ್‌ಮಾರ್ಟ್‌ ಒಡೆತನದ ಫ್ಲಿಪ್‌ಕಾರ್ಟ್‌ನ ವಕ್ತಾರರು ಹೇಳುವ ಪ್ರಕಾರ, ದೊಡ್ಡ ಟಿ.ವಿಗಳು, ಲ್ಯಾಪ್‌ಟಾಪ್‌ಗಳು, ಐಟಿ ಸಲಕರಣೆಗಳು ಹೆಚ್ಚಿನ ಪ್ರಮಾಣದಲ್ಲಿ ಮಾರಾಟವಾಗಿವೆ. ಎಲೆಕ್ಟ್ರಾನಿಕ್ಸ್‌ ವಸ್ತುಗಳ ಮಾರಾಟದಲ್ಲಿ ವರ್ಕ್‌ ಫ್ರಮ್‌ಗೆ ಪೂರಕವಾದ ಉತ್ಪನ್ನಗಳ ಪಾಲು ಶೇ.50ರಷ್ಟಿದೆ.

ತಮ್ಮ ಬಿಸಿನೆಸ್‌ನಲ್ಲಿ ಶೇ.100ರಷ್ಟು ಬೆಳವಣಿಗೆ ಕಂಡು ಬಂದಿದೆ ಎಂದು ಎಲ್‌ಜಿ ಕಂಪನಿಯ ಭಾರತದ ಆನ್‌ಲೈನ್‌ ಬಿಸಿನೆಸ್‌ ಮುಖ್ಯಸ್ಥ ದೀಪಕ್‌ ತನೇಜಾ ಹೇಳಿದ್ದಾರೆ.

ಕೋಡಕ್‌, ಥಾಮ್‌ಸನ್‌ ಟಿವಿ ಬ್ರ್ಯಾಂಡ್‌ಗಳನ್ನು ಆನ್‌ಲೈನ್‌ನಲ್ಲಿ ಮಾರಾಟ ಮಾಡುವ ಎಸ್‌ಪಿಪಿಎಲ್‌ ಕಂಪನಿಯ ಸಿಇಒ ಅವನೀತ್‌ ಸಿಂಗ್‌ ಮಾರ್ವಾ ಪ್ರಕಾರ, ನಾಲ್ಕು ದಿನಗಳಲ್ಲಿ ಅವರ ಬಿಸಿನೆಸ್‌ ದ್ವಿಗುಣವಾಗಿದೆ.

2019ರ ಅಕ್ಟೋಬರ್‌ನಲ್ಲಿ ನಡೆದಿದ್ದ ಆರು ದಿನಗಳ ಹಬ್ಬದ ಸೇಲ್ಸ್‌ನಲ್ಲಿಅಮೆಜಾನ್‌ ಮತ್ತು ಫ್ಲಿಪ್‌ಕಾರ್ಟ್‌ಗಳ ಮಾರಾಟ ವಹಿವಾಟು 2.70 ಬಿಲಿಯನ್‌ ಡಾಲರ್‌ಗೆ (20,000 ಕೋಟಿ ರೂ.) ತಲುಪಿತ್ತು. 2018ಕ್ಕೆ ಹೋಲಿಸಿದರೆ 30% ಏರಿಕೆಯಾಗಿತ್ತು.

ಈ ವರ್ಷದ ವಿಶೇಷ

* ದೇಶದ ಆರ್ಥಿಕತೆ ಕುಸಿದಿದ್ದರೂ, ಇ-ಕಾಮರ್ಸ್‌ ಮಾರಾಟ ವಹಿವಾಟಿನಲ್ಲಿ ದಾಖಲೆಯ ಏರಿಕೆ.
* ಹೆಚ್ಚಿನ ಗ್ರಾಹಕರು ಉತ್ಪನ್ನಗಳ ಖರೀದಿಗೆ ಕ್ರೆಡಿಟ್‌ ಕಾರ್ಡ್‌ ಮತ್ತು ಇಎಂಐ ಆಯ್ಕೆಗಳನ್ನು ಬಳಸಿದ್ದಾರೆ.
* ಸ್ಮಾರ್ಟ್‌ಫೋನ್‌ಗಳ ಮಾರಾಟ ಕಳೆದ ವರ್ಷಕ್ಕಿಂತ 60% ಹೆಚ್ಚಳ
* ಫ್ಯಾಷನ್‌, ಫರ್ನೀಚರ್‌, ಹೈ-ಎಂಡ್‌ ಸ್ಮಾರ್ಟ್‌ಫೋನ್‌ಗಳಿಗೆ ಗರಿಷ್ಠ ಆಫರ್‌ಗಳನ್ನು ನೀಡಿದ್ದು, ಗ್ರಾಹಕರು ಖರೀದಿಗೆ ಮುಗಿಬಿದ್ದಿದ್ದಾರೆ.
* ಟೆಲಿವಿಷನ್‌ ಮತ್ತು ಗೃಹೋಪಯೋಗಿ ವಸ್ತುಗಳಿಗೆ ಹೆಚ್ಚಿನ ಬೇಡಿಕೆ ವ್ಯಕ್ತವಾಗಿದ್ದು, ದಾಸ್ತಾನು ಕೊರತೆ ಕಂಡು ಬಂದಿದೆ.
* ನವರಾತ್ರಿ, ದಸರಾ, ದೀಪಾವಳಿ ಸೇರಿದಂತೆ ಹಬ್ಬದ ಸೀಸನ್‌ ಆರಂಭವಾಗಿದ್ದು, 30 ದಿನಗಳಲ್ಲಿಇ-ಕಾಮರ್ಸ್‌ ಕಂಪನಿಗಳ ಮಾರಾಟ ವಹಿವಾಟು 6.5-7.5 ಬಿಲಿಯನ್‌ ಡಾಲರ್‌ (48,000 ಕೋಟಿ ರೂ.ನಿಂದ 51,800 ಕೋಟಿ ರೂ.) ಮುಟ್ಟಬಹುದು ಎಂದು ರೆಸ್‌ಸೀರ್‌ ಮತ್ತು ಫೋರೆಸ್ಟರ್‌ ರೀಸರ್ಚ್‌ ಅಂದಾಜು ಮಾಡಿದೆ.

ಸ್ನ್ಯಾಪ್‌ಡೀಲ್‌ ಇತ್ತೀಚೆಗೆ ದೀಪಾವಳಿ ಸೇಲ್‌ ಅನ್ನು ನಡೆಸಿತ್ತು. ಇದರಲ್ಲಿ ಶೇ. 80 ರಷ್ಟು ಗ್ರಾಹಕರು ಸ್ಥಳೀಯ ಬ್ರ್ಯಾಂಡ್‌ಗಳಿಗೆ ಒತ್ತು ಕೊಟ್ಟಿದ್ದಾರೆ. ಉಳಿದ ಶೇ. 20ರಷ್ಟು ಗ್ರಾಹಕರು ರಾಷ್ಟ್ರೀಯ ಮತ್ತು ಅಂತಾರಾಷ್ಟ್ರೀಯ ಬ್ರ್ಯಾಂಡ್‌ಗಳ ಉತ್ಪನ್ನಗಳನ್ನು ಖರೀದಿಸಿದ್ದಾರೆ.