ಹೊಸದಿಲ್ಲಿ : ದೇಶದ ಪಂಚ ತಾರಾ ಹೋಟೆಲ್ಗಳಲ್ಲಿ ಐಷಾರಾಮಿ ವಿವಾಹ ಕಾರ್ಯಕ್ರಮಗಳು ನಡೆಯುತ್ತಿರುತ್ತವೆ. ಜಿಎಸ್ಟಿ ಜಾರಿಯಾದ ನಂತರ ಲಕ್ಸುರಿ ಹೋಟೆಲ್ ರೂಮ್ಗಳಿಗೆ ಶೇ.28ರ ಜಿಎಸ್ಟಿ ಅನ್ವಯವಾಗುತ್ತದೆ. ಇದು ತುಟ್ಟಿ ಎಂದು ಅನ್ನಿಸಬಹುದು. ಹೀಗಿದ್ದರೂ, ಈ ಹಿಂದೆ ಚಾಲ್ತಿಯಲ್ಲಿದ್ದ ಹಲವಾರು ತೆರಿಗೆಗಳು ರದ್ದಾಗಿರುವ ಪರಿಣಾಮ, ಈಗ ಅನುಕೂಲಗಳಾಗಿದೆ ಎನ್ನುತ್ತವೆ ಉದ್ಯಮದ ಮೂಲಗಳು.
'' ಮುಂಬರುವ ಮದುವೆ ಸೀಸನ್ಗೆ ಭಾರಿ ಬೇಡಿಕೆ ಬಂದಿದೆ. ಮುಂಗಡ ಕಾಯ್ದಿರಿಸುವಿಕೆ ಬಹುತೇಕ ಪೂರ್ಣವಾಗಿದೆ. ಜಿಎಸ್ಟಿ ದರ ಅನುಕೂಲಕರವಾಗಿಯೇ ಇದೆ'' ಎಂದು ದಿಲ್ಲಿಯ ಲಿ ಮೆರಿಡಿಯನ್ ಹೋಟೆಲ್ನ ಮುಖ್ಯ ನಿರ್ವಹಣಾಧಿಕಾರಿ ತರುಣ್ ಥಕ್ರಾಲ್ ತಿಳಿಸಿದ್ದಾರೆ.
ಈ ಹಿಂದೆ ಹಲವಾರು ತೆರಿಗೆಗಳಿದ್ದವು. ಹಲವು ಲೆವಿಗಳಿದ್ದವು. ಹೀಗಾಗಿ ಪಂಚ ತಾರಾ ಹೋಟೆಲ್ಗಳಲ್ಲಿ ಮದುವೆ ವೆಚ್ಚದಲ್ಲಿ ತೆರಿಗೆಯ ಪಾಲು ಶೇ.30-35ರಷ್ಟು ಇತ್ತು. ಆದರೆ ಜಿಎಸ್ಟಿ ಬಂದ ಮೇಲೆ ತೆರಿಗೆ ದರ ತಗ್ಗಿದೆ ಎನ್ನುತ್ತಾರೆ ಅವರು.
''ವೈವಾಹಿಕ ಬುಕಿಂಗ್ಗಳು ಉತ್ತೇಜನಕಾರಿಯಾಗಿದೆ. ಈ ವರ್ಷ ಶೇ.18-20ರಷ್ಟು ಹೆಚ್ಚಳವಾಗಿದೆ'' ಎಂದು ತಾಜ್ ಹೋಟೆಲ್ಸ್ನ ಅಧಿಕಾರಿ ಚಿನ್ಮಯಿ ಶರ್ಮಾ ತಿಳಿಸಿದ್ದಾರೆ. ಮ್ಯಾರಿಯೇಟ್ ಇಂಟರ್ನ್ಯಾಶನಲ್ ಹೋಟೆಲ್ನ ಬಿಸಿನೆಸ್ ಕೂಡ ವೃದ್ಧಿಸಿದೆ ಎಂದು ಹೋಟೆಲ್ನ ವ್ಯವಸ್ಥಾಪಕರು ತಿಳಿಸಿದ್ದಾರೆ.
ಬೆಂಗಳೂರು, ದಿಲ್ಲಿ, ಚೆನ್ನೈನಲ್ಲಿರುವ ಲೀಲಾ ಪ್ಯಾಲೇಸ್ ಹೋಟೆಲ್ಗಳಲ್ಲಿಯೂ ಮದುವೆ ಸೀಸನ್ನ ಬುಕಿಂಗ್ನಲ್ಲಿ ಏರಿಕೆಯಾಗಿದೆ.
ನೋಟು ಅಮಾನ್ಯತೆಯ ನಂತರ ಶ್ರೀಮಂತರು ಫಾರ್ಮ್ ಹೌಸ್ಗಳಲ್ಲಿ ಮದುವೆ ಮಾಡುವುದರ ಬದಲಿಗೆ ಪಂಚ ತಾರಾ ಹೋಟೆಲ್ಗಳಿಗೆ ಸ್ಥಳಾಂತರವಾಗಿದ್ದಾರೆ. ಇಂಥ ಐಷಾರಾಮಿ ಹೋಟೆಲ್ಗಳಲ್ಲಿ ಮದುವೆ ವೆಚ್ಚ ಸಾಮಾನ್ಯವಾಗಿ ಸರಾಸರಿ 25-30 ಲಕ್ಷ ರೂ.ಗಳಿರುತ್ತವೆ. ಅಂದರೆ ಇದು ಬರುವ ಅತಿಥಿಗಳ ಸಂಖ್ಯೆ, ಅಲಂಕಾರ, ಊಟೋಪಚಾರ ಇತ್ಯಾದಿಯನ್ನು ಅವಲಂಬಿಸಿದೆ ಎನ್ನುತ್ತಾರೆ ತಜ್ಞರು.