ಫ್ಲಿಪ್‌ಕಾರ್ಟ್ ಡೀಲ್‌ನಿಂದ ಲಕ್ಷಾಂತರ ಉದ್ಯೋಗ: ವಾಲ್‌ಮಾರ್ಟ್

ಹೊಸದಿಲ್ಲಿ : ವಿಶ್ವದ ಅತಿ ದೊಡ್ಡ ರಿಟೇಲರ್‌ ವಾಲ್‌ಮಾರ್ಟ್‌ ಸುಮಾರು 1600 ಕೋಟಿ ಡಾಲರ್‌ಗಳ (ಅಂದಾಜು 1.04 ಲಕ್ಷ ಕೋಟಿ ರೂ.) ಭಾರಿ ಡೀಲ್‌ನಲ್ಲಿ ಬೆಂಗಳೂರು ಮೂಲದ ಇ-ಕಾಮರ್ಸ್‌ ಕಂಪನಿ ಫ್ಲಿಪ್‌ಕಾರ್ಟ್‌ ಅನ್ನು ಖರೀದಿಸಿದೆ. ಈ ಬೆಳವಣಿಗೆಯ ಬಗ್ಗೆ ಹೇಳಿಕೆ ನೀಡಿರುವ ವಾಲ್‌ಮಾರ್ಟ್‌ ಸಿಇಒ ಡ್ಯುಗ್‌ ಮೆಕ್‌ಮಿಲನ್‌, ಫ್ಲಿಪ್‌ಕಾರ್ಟ್‌ ಸ್ವಾಧೀನದಿಂದ ಭಾರತಕ್ಕೆ ಒಳ್ಳೆಯದಾಗಲಿದೆ ಎಂದರು.

ವಾಲ್‌ ಮಾರ್ಟ್‌ ದೊಡ್ಡ ಮೊತ್ತದ ಹೂಡಿಕೆ ಮಾಡಲಿದ್ದು, ಫ್ಲಿಪ್‌ ಕಾರ್ಟ್‌ನ ಮಾರುಕಟ್ಟೆ ವಿಸ್ತರಣೆಯಾಗಲಿದೆ. ಇದರಿಂದ ಲಕ್ಷಾಂತರ ಉದ್ಯೋಗಗಳು ಸೃಷ್ಟಿಯಾಗಲಿದೆ ಎಂದು ಮೆಕ್‌ ಮಿಲನ್‌ ತಿಳಿಸಿದರು.

ವಾಲ್‌ಮಾರ್ಟ್‌ ತನ್ನ ಉತ್ಪನ್ನಗಳಿಗೆ ಸ್ಥಳೀಯ ಸಂಪನ್ಮೂಲವನ್ನು ಹೆಚ್ಚು ಬಳಸಿಕೊಳ್ಳಲಿದೆ. ಹೀಗಾಗಿ ಆರ್ಥಿಕ ಚಟುವಟಿಕೆಗೂ ಇದು ಉತ್ತೇಜನ ನೀಡಲಿದೆ. ಗ್ರಾಹಕರಿಗೂ ಒಳಿತಾಗಲಿದೆ ಎಂದರು.

ವಿಶ್ವದ ಅತಿ ದೊಡ್ಡ ಇ-ಕಾಮರ್ಸ್‌ ಡೀಲ್‌ ಇದಾಗಿದ್ದು, ಇದನ್ನು ಪ್ರಧಾನಿ ಮೋದಿ ಅಥವಾ ಕೇಂದ್ರದ ಹಿರಿಯ ಸಚಿವರ ಜತೆಗೆ ಘೋಷಿಸಲು ಕಾರಣಾಂತರಗಳಿಂದ ಸಾಧ್ಯವಾಗಿಲ್ಲ. ಆದರೆ ಹಿರಿಯ ಅಧಿಕಾರಿಗಳ ಜತೆ ನಿಕಟ ಸಂಪರ್ಕದಲ್ಲಿದ್ದು, ಮುಂದೆಯೂ ಇರುವುದಾಗಿ ಅವರು ಹೇಳಿದರು.

ಫ್ಲಿಪ್‌ಕಾರ್ಟ್‌ನ ಶೇ.77 ಷೇರು ಖರೀದಿಸಲು ಕಾಂಪಿಟೇಶನ್‌ ಕಮಿಶನ್‌ ಆಫ್‌ ಇಂಡಿಯಾದಿಂದ ಯಾವ ಸಮಸ್ಯೆಯೂ ಆಗಿಲ್ಲ.

ವಾಲ್‌ ಮಾರ್ಟ್‌ ಭಾರತಕ್ಕೆ ಹೊಸತೇನಲ್ಲ. ಪ್ರಧಾನಿಯವರ ಜತೆಗೂ ಸಮಾಲೋಚನೆಗೆ ಕಾಲಾವಕಾಶ ನಿರೀಕ್ಷಿಸಲಾಗಿದೆ ಎಂದು ವಾಲ್‌ ಮಾರ್ಟ್‌ ಸಿಇಒ ಮೆಕ್‌ ಮಿಲನ್‌ ತಿಳಿಸಿದರು.

ವಾಲ್‌ ಮಾರ್ಟ್‌ ಹಿಂಬಾಗಿಲಿನ ಮೂಲಕ ಭಾರತ ಪ್ರವೇಶಿಸಲಿ ಯತ್ನಿಸಿದ್ದು, ಪ್ರಧಾನಿ ಮಧ್ಯಪ್ರವೇಶಿಸಬೇಕು ಎಂದು ಸ್ವದೇಶಿ ಜಾಗರಣ್‌ ಮಂಚ್‌ ಒತ್ತಾಯಿಸಿದೆ. ವಾಲ್‌ ಮಾರ್ಟ್‌ ಪ್ರವೇಶದಿಂದ ಸಣ್ಣ ಮತ್ತು ಮಧ್ಯಮ ಉದ್ದಿಮೆಗಳು, ಅಂಗಡಿ ಮಳಿಗೆಗಳ ವಹಿವಾಟಿಗೆ ಧಕ್ಕೆಯಾಗಲಿದೆ ಎಂದು ವೇದಿಕೆ ಆರೋಪಿಸಿದೆ. ಆದರೆ ಇಂಥ ಆರೋಪಗಳನ್ನು ವಾಲ್‌ ಮಾರ್ಟ್‌ ನಿರಾಕರಿಸಿದೆ.

ವಾಲ್‌ ಮಾರ್ಟ್‌ ತನ್ನ ವಹಿವಾಟಿಗೆ ಬೇಕಾದ ಶೇ.90ರಷ್ಟು ವಸ್ತುಗಳನ್ನು ಸ್ಥಳೀಯವಾಗಿ ಖರೀದಿಸಲಿದೆ ಎಂದು ಅವರು ಹೇಳಿದರು.