ಫೇಸ್‌ಬುಕ್‌ನಲ್ಲಿ ವಿದಾಯದ ಸಂದೇಶ ಪೋಸ್ಟ್‌ ಮಾಡಿದ ಸಚಿನ್‌ ಬನ್ಸಾಲ್

ಹೊಸದಿಲ್ಲಿ: ದೇಶದ ಅತಿ ದೊಡ್ಡ ಇ ಕಾಮರ್ಸ್‌ ತಾಣ ಫ್ಲಿಪ್‌ಕಾರ್ಟ್‌ ಅನ್ನು ಅಮೆರಿಕದ ರಿಟೇಲ್ ದೈತ್ಯ ವಾಲ್‌ಮಾರ್ಟ್ ಖರೀದಿಸಿದ ಬೆನ್ನಲ್ಲೇ ಫ್ಲಿಪ್‌ಕಾರ್ಟ್‌ ಸಹಸಂಸ್ಥಾಪಕ ಸಚಿನ್ ಬನ್ಸಾಲ್ ಫೇಸ್‌ಬುಕ್‌ನಲ್ಲಿ ವಿದಾಯದ ಸಂದೇಶ ಪೋಸ್ಟ್ ಮಾಡಿದ್ದಾರೆ.

ಕಂಪನಿ ಸ್ಥಾಪಿಸಿದ 10 ವರ್ಷಗಳ ಬಳಿಕ ಫ್ಲಿಪ್‌ಕಾರ್ಟ್‌ ತೊರೆಯುತ್ತಿದ್ದೇನೆ. ನನಗಾಗಿ ಒಂದಷ್ಟು ಸಮಯ ಮೀಸಲಿಡಲಿದ್ದು, ಬಾಕಿ ಉಳಿದಿರುವ ಕೆಲವೊಂದು ವೈಯಕ್ತಿಕ ಕೆಲಸಗಳನ್ನು ಮುಗಿಸಿಕೊಳ್ಳಬೇಕಿದೆ. ಗೇಮಿಂಗ್‌ನಲ್ಲಿ ಸ್ವಲ್ಪ ಸಮಯ ಕಳೆಯಬೇಕಿದೆ. ಅಲ್ಲದೆ ಕೋಡಿಂಗ್‌ನಲ್ಲಿ ಮತ್ತಷ್ಟು ತೊಡಗಿಸಿಕೊಳ್ಳಬೇಕಿದೆ ಎಂದು ಸಚಿನ್ ಹೇಳಿದ್ದಾರೆ.

ಫ್ಲಿಪ್‌ಕಾರ್ಟ್‌ನಲ್ಲಿ ಕಳೆದ ಸಮಯ ನಿಜಕ್ಕೂ ಒಂದು ಅಭೂತಪೂರ್ವ ಅನುಭವ, ಸಹೋದ್ಯೋಗಿಗಳೊಂದಿಗಿನ ಕ್ಷಣಗಳು ನಿಜಕ್ಕೂ ಚೆನ್ನಾಗಿದ್ದವು. ಗ್ರಾಹಕರಿಗಾಗಿ ಫ್ಲಿಪ್‌ಕಾರ್ಟ್‌ ಬಹಳಷ್ಟು ಕೆಲಸ ಮಾಡಿದೆ. ಮುಂದೆಯೂ ಅದನ್ನು ಮಾಡಲಿದೆ. ನಾನು ಫ್ಲಿಪ್‌ಕಾರ್ಟ್‌ನಲ್ಲಿರುವುದಿಲ್ಲ, ಆದರೆ ಹೊರಗಿನಿಂದ ನಿಮ್ಮನ್ನು ಹುರಿದುಂಬಿಸುತ್ತೇನೆ. ಜತೆಗೆ ದೇಶದ ಇ ಕಾಮರ್ಸ್‌ ಕ್ಷೇತ್ರದಲ್ಲಿನ ಬಹಳಷ್ಟು ಸವಾಲನ್ನು ಫ್ಲಿಪ್‌ಕಾರ್ಟ್‌ ಎದುರಿಸಿದ್ದು, ಸಮಸ್ಯೆಗಳನ್ನು ಸರಿಪಡಿಸಿದೆ ಎಂದು ಸಚಿನ್ ಬನ್ಸಾಲ್ ಹೇಳಿಕೊಂಡಿದ್ದಾರೆ.

ಫ್ಲಿಪ್‌ಕಾರ್ಟ್ ಅನ್ನು ವಾಲ್‌ಮಾರ್ಟ್ ಖರೀದಿಸಿರುವುದರಿಂದ ಸಚಿನ್ ಕಂಪನಿ ತೊರೆಯುತ್ತಿದ್ದು, ಬಿನ್ನಿ ಬನ್ಸಾಲ್ ಅದರಲ್ಲೇ ಮುಂದುವರಿಯಲಿದ್ದಾರೆ.