ಆಹಾರ ಧಾನ್ಯ ಉತ್ಪಾದನೆ 27.95 ಕೋಟಿ ಟನ್‌

ಹೊಸದಿಲ್ಲಿ : ಭಾರತದಲ್ಲಿ 2017-18ರ ಸಾಲಿನಲ್ಲಿ ದಾಖಲೆಯ 27.95 ಕೋಟಿ ಟನ್‌ ಆಹಾರ ಧಾನ್ಯವನ್ನು ಉತ್ಪಾದಿಸಲಾಗಿದೆ.

2016-17ರ ಸಾಲಿಗೆ ಹೋಲಿಸಿದರೆ ಶೇ.1.6ರಷ್ಟು ಹೆಚ್ಚಳವಾಗಿದೆ. ಉತ್ತಮ ಮುಂಗಾರು ಹಾಗೂ ಅಧಿಕ ಬೆಂಬಲ ಬೆಲೆಯ ಪರಿಣಾಮ ಬಂಪರ್‌ ಆಹಾರ ಧಾನ್ಯ ಉತ್ಪಾದನೆಯಾಗಿದೆ.

ದೇಶ 2017-18ರ ಸಾಲಿನಲ್ಲಿ ಎಲ್ಲ ನಾಲ್ಕು ಬಗೆಯ ಆಹಾರ ಧಾನ್ಯಗಳ ಉತ್ಪಾದನೆಯಲ್ಲಿ ಸಾರ್ವಕಾಲಿಕ ದಾಖಲೆ ಸ್ಥಾಪಿಸಿದೆ. ಅಕ್ಕಿ, ಗೋಧಿ, ಸಿರಿ ಧಾನ್ಯ ಹಾಗೂ ಬೇಳೆ ಕಾಳು ಉತ್ಪಾದನೆಯಲ್ಲಿ ದಾಖಲೆಯ ಉತ್ಪಾದನೆ ಮಾಡಿದೆ ಎಂದು ಕೃಷಿ ಸಚಿವಾಲಯದ ಮೂರನೇ ಅಂದಾಜು ತಿಳಿಸಿದೆ.

2016-17ರ ಸಾಲಿಗೆ ಹೋಲಿಸಿದರೆ ದೇಶದ ಆಹಾರ ಧಾನ್ಯೋತ್ಪಾದನೆಯಲ್ಲಿ 44 ಲಕ್ಷ ಟನ್‌ ಏರಿಕೆಯಾಗಿದೆ. ಆ ಸಾಲಿನಲ್ಲಿ 27.51 ಕೋಟಿ ಟನ್‌ ಉತ್ಪಾದನೆಯಾಗಿತ್ತು ಎಂದು ಅಧಿಕೃತ ಪ್ರಕಟಣೆ ತಿಳಿಸಿದೆ.

ಬಂಪರ್‌ ಬೆಳೆಯ ಪರಿಣಾಮ ಒಟ್ಟಾರೆಯಾಗಿ ಆಹಾರ ಧಾನ್ಯಗಳ ಬೆಲೆ ಇಳಿದಿದೆ. ಜತೆಗೆ ಕೆಲವು ಬೆಳೆಗಳ ಬೆಲೆ ಗಣನೀಯ ಕುಸಿದಿದೆ. ಸರಕಾರ ರೈತರಿಗೆ ಸೂಕ್ತ ಬೆಂಬಲ ಬೆಲೆ ನೀಡುವ ಮೂಲಕ ನಷ್ಟವಾಗದಂತೆ ನೋಡಿಕೊಳ್ಳಲು ಯತ್ನಿಸುತ್ತಿದೆ ಎಂದು ವಿಶ್ಲೇಷಕರು ತಿಳಿಸಿದ್ದಾರೆ.

2017-18ರ ಸಾಲಿನಲ್ಲಿ 11.15 ಕೋಟಿ ಟನ್‌ ಅಕ್ಕಿ, 9.86 ಕೋಟಿ ಗೋಧಿ, 4.4 ಕೋಟಿ ಟನ್‌ ಸಿರಿ ಧಾನ್ಯ ಹಾಗೂ 2.45 ಕೋಟಿ ಟನ್‌ ಬೇಳೆ ಕಾಳು ಉತ್ಪಾದನೆಯಾಗಿದೆ ಎಂದು ಅಂಕಿ ಅಂಶಗಳು ತಿಳಿಸಿವೆ.