₹1,400 ಕೋಟಿಗಾಗಿ ₹26,000 ಕೋಟಿಯ ಉದ್ಯಮ ನಾಶ- ಅಮೆಜಾನ್‌ ವಿರುದ್ಧ ಕೆಂಡಕಾರಿದ ಫ್ಯೂಚರ್‌ ಗ್ರೂಪ್‌

ಹೊಸದಿಲ್ಲಿ: "ಅಮೆಜಾನ್ ನಮ್ಮನ್ನು ನಾಶಪಡಿಸಲು ಬಯಸಿತ್ತು ಮತ್ತು ಅದು ಈ ವಿಚಾರದಲ್ಲಿ ಯಶಸ್ವಿಯಾಗಿದೆ,” ಎಂದು ಫ್ಯೂಚರ್ ರಿಟೇಲ್ ಸುಪ್ರೀಂ ಕೋರ್ಟ್‌ಗೆ ತಿಳಿಸಿದೆ. ಈ ಮೂಲಕ ಅಮೆರಿಕದ ಇ-ಕಾಮರ್ಸ್‌ ದೈತ್ಯನ ವಿರುದ್ಧ ಭಾರತೀಯ ಚಿಲ್ಲರೆ ಮಾರಾಟ ಕಂಪನಿ ಕೆಂಡಕಾರಿದೆ.

ಅಮೆಜಾನ್‌ ಮತ್ತು ಫ್ಯೂಚರ್‌ ಗ್ರೂಪ್ ನಡುವಿನ ಕಾನೂನು ಹೋರಾಟ ದೀರ್ಘಾವಧಿಗೆ ಮೂಂದೂಡುವುದು ನಿಶ್ಚಿತವಾಗಿದ್ದು ಮುಂದಿನ ವಿಚಾರಣೆಯನ್ನು ಸುಪ್ರೀಂ ಕೋರ್ಟ್‌ ಏಪ್ರಿಲ್ 4ಕ್ಕೆ ನಿಗದಿಪಡಿಸಿದೆ.

ವಿವಾದವನ್ನು ನ್ಯಾಯಾಲಯದ ಹೊರಗೆ ಇತ್ಯರ್ಥಪಡಿಸಿಕೊಳ್ಳಲು ಅಮೆಜಾನ್ ಐಎನ್‌ಸಿ. ಮತ್ತು ಫ್ಯೂಚರ್ ರೀಟೇಲ್ ಲಿಮಿಟೆಡ್ (ಎಫ್‌ಆರ್‌ಎಲ್) ವಿಫಲವಾಗಿದ್ದವು. ಇದಾದ ಬಳಿಕ ಮುಕೇಶ್‌ ಅಂಬಾನಿ ನೇತೃತ್ವದ ರಿಲಯನ್ಸ್ ಇಂಡಸ್ಟ್ರೀಸ್ ಲಿಮಿಟೆಡ್ (ಆರ್‌ಐಎಲ್) ಕಳೆದ ತಿಂಗಳು ಫ್ಯೂಚರ್‌ ಗ್ರೂಪ್‌ಗೆ ಸೇರಿದ ನೂರಾರು ಮಳಿಗೆಗಳನ್ನು ಬಾಡಿಗೆ ಪಾವತಿಸದ ಹಿನ್ನೆಲೆಯಲ್ಲಿ ಸ್ವಾಧೀನಪಡಿಸಿಕೊಂಡಿತ್ತು. ಈ ಬೆಳವಣಿಗೆ ಬಳಿಕ ಕಂಪನಿಗಳು ಪರಸ್ಪರ ಕೆಸರೆರೆಚಾಟದಲ್ಲಿ ತೊಡಗಿಸಿಕೊಂಡಿವೆ. 4,800 ಕೋಟಿ ರೂ. ಬಾಡಿಗೆ ಪಾವತಿಸಿಲ್ಲ ಎಂದು ಆರೋಪಿಸಿ ಫ್ಯೂಚರ್‌ ರಿಟೇಲ್‌ಗೆ ಸೇರಿದ ಸುಮಾರು 850 ಬೃಹತ್‌ ಮಳಿಗೆಗಳನ್ನು ರಿಲಯನ್ಸ್‌ ವಶಕ್ಕೆ ಪಡೆದಿದ್ದಲ್ಲದೆ, ಅಲ್ಲೆಲ್ಲಾ ತನ್ನ ಬೋರ್ಡ್‌ಗಳನ್ನು ತಗುಲಿ ಹಾಕಿ ಹೊಸ ಉದ್ಯಮ ಆರಂಭಿಸಿದೆ.

₹2,888 ಕೋಟಿ ಸಾಲ ಪಾವತಿಸಲು ವಿಫಲವಾದ ಫ್ಯೂಚರ್‌ ಗ್ರೂಪ್‌, ರಿಟೇಲ್‌ ಕಂಪನಿಯನ್ನೇ ತೊರೆದ ಸಿಇಒ!

ಇದೇ ವೇಳೆ ಅಮೆಜಾನ್ ಫ್ಯೂಚರ್ ರೀಟೇಲ್ ಮತ್ತು ಆರ್‌ಎಲ್‌ಐ ನಡುವಿನ ವ್ಯವಹಾರವನ್ನು ‘ವಂಚನೆ’ ಎಂದು ಆರೋಪಿಸಿದ್ದರೆ, ಫ್ಯೂಚರ್ ಗ್ರೂಪ್ ಗುರುವಾರ, "1,400 ಕೋಟಿ ರೂ. (ಅಮೆಜಾನ್-ಫ್ಯೂಚರ್ ವಿವಾದಿತ ಒಪ್ಪಂದದ ಮೌಲ್ಯ)ಗಳಿಗಾಗಿ 26,000 ಕೋಟಿ ರೂ. ಕಂಪನಿಯನ್ನು ಅಮೆಜಾನ್ ನಾಶಪಡಿಸಿದೆ. ಅಮೆಜಾನ್ ತಾನು ಏನು ಮಾಡಲು ಬಯಸಿತ್ತೋ ಅದರಲ್ಲಿ ಯಶಸ್ವಿಯಾಗಿದೆ,” ಎಂದು ಕಿಡಿಕಾರಿದೆ.

"ನಾವು ಈಗ ದಾರದಲ್ಲಿ ನೇತಾಡುತ್ತಿದ್ದೇವೆ. ಈಗ ಯಾರೂ ನಮ್ಮೊಂದಿಗೆ ವ್ಯಾಪಾರ ಮಾಡಲು ಬಯಸುತ್ತಿಲ್ಲ. ಭೂಮಾಲೀಕರು ತೆರವು ನೋಟಿಸ್ ನೀಡಿದಾಗ ನಾವು ಏನು ಮಾಡಬಹುದು?,” ಎಂದು ಫ್ಯೂಚರ್‌ ರಿಟೇಲ್‌ ಪ್ರಶ್ನಿಸಿದೆ. ಈ ಮೂಲಕ ಆರ್‌ಐಎಲ್‌ ತನ್ನ ಮಳಿಗೆಗಳನ್ನು ಸ್ವಾಧೀನಪಡಿಸಿಕೊಂಡಾಗ ಏನೂ ಮಾಡಲು ಸಾಧ್ಯವಾಗಿಲ್ಲ ಎಂದು ಅಸಹಾಯಕತೆ ವ್ಯಕ್ತಪಡಿಸಿದೆ.

ಪಿಎನ್‌ಬಿ ಮತ್ತು ಕೆನರಾ ಬ್ಯಾಂಕ್‌ಗೆ 93.99 ಕೋಟಿ ರೂ ಬಾಕಿ ಉಳಿಸಿಕೊಂಡ ಫ್ಯೂಚರ್ ಎಂಟರ್‌ಪ್ರೈಸಸ್
835ಕ್ಕೂ ಹೆಚ್ಚು ಮಳಿಗೆಗಳ ನಿಯಂತ್ರಣವನ್ನು ಕಳೆದುಕೊಂಡಿದ್ದೇವೆ, ಉಳಿದ 374 ಮಳಿಗೆಗಳನ್ನು ಹೇಗೋ ನಡೆಸುತ್ತಿದ್ದೇವೆ ಎಂದು ಫ್ಯೂಚರ್ ರೀಟೇಲ್ ಹೇಳಿದೆ.

ಫ್ಯೂಚರ್ ಗ್ರೂಪ್‌ನ ಕಂಪನಿಯೊಂದಿಗಿನ ತನ್ನ 2019ರ ಒಪ್ಪಂದದಲ್ಲಿ, ರಿಲಯನ್ಸ್ ಸೇರಿದಂತೆ ನಿರ್ಬಂಧಿತ ವ್ಯಕ್ತಿಗಳ ಪಟ್ಟಿಯಲ್ಲಿರುವ ಯಾರಿಗೇ ಆದರೂ ರಿಟೇಲ್‌ ಆಸ್ತಿಗಳನ್ನು ಮಾರಾಟ ಮಾಡದಂತೆ ಫ್ಯೂಚರ್ ಗ್ರೂಪ್ ಅನ್ನು ನಿಷೇಧಿಸುವ ಷರತ್ತುಗಳಿವೆ ಎಂದು ಅಮೆಜಾನ್‌ ವಾದಿಸಿದೆ. ಫ್ಯೂಚರ್ ರೀಟೇಲ್‌ನ ಆಸ್ತಿಗಳನ್ನು ರಿಲಯನ್ಸ್‌ಗೆ ಒಪ್ಪಿಸಿದ್ದಕ್ಕೂ ಕಂಪನಿ ಆಕ್ಷೇಪ ವ್ಯಕ್ತಪಡಿಸಿದೆ.

ನೀವು ನಂಬಿ ಅಥವಾ ಬಿಡಿ ಫ್ಯೂಚರ್‌ ರಿಟೇಲ್‌ ಯಾವುದೇ ಪ್ರತಿರೋಧವನ್ನೂ ಒಡ್ಡದೆ ತನ್ನ 800ಕ್ಕೂ ಹೆಚ್ಚು ಮಳಿಗೆಗಳನ್ನು ಬಿಟ್ಟುಕೊಟ್ಟಂತೆ ತೋರುತ್ತಿದೆ ಎಂದು ಅಮೆಜಾನ್ ಹೇಳಿದೆ.

ಆದರೆ ಬಾಡಿಗೆಯನ್ನು ಪಾವತಿಸಲು ಸಾಧ್ಯವಾಗಲಿಲ್ಲ. ಹೀಗಾಗಿ ಅಂತಿಮವಾಗಿ ತನ್ನ ಮಳಿಗೆಗಳನ್ನು ಒಪ್ಪಿಸಬೇಕಾಯಿತು ಫ್ಯೂಚರ್ ರಿಟೇಲ್ ತನ್ನ ನಡೆಯನ್ನು ಸಮರ್ಥಿಸಿಕೊಂಡಿದೆ. ನಮ್ಮ ಖಾತೆಗಳನ್ನು ಎನ್‌ಪಿಎ ಎಂದು ವರ್ಗೀಕರಿಸಿ ಸ್ಥಗಿತಗೊಳಿಸಿದ್ದರಿಂದ ಯಾವುದೇ ಪಾವತಿಗಳನ್ನು ಮಾಡಲು ಸಾಧ್ಯವಾಗಲಿಲ್ಲ ಎಂದು ಕಂಪನಿ ಹೇಳಿದೆ.

ಆದಾಗ್ಯೂ, ಹಣದ ಕೊರತೆಯಿದೆ ಮತ್ತು ಬಾಡಿಗೆಯನ್ನು ಪಾವತಿಸಲು ಸಾಧ್ಯವಾಗುತ್ತಿಲ್ಲ ಎಂಬ ಫ್ಯೂಚರ್‌ ಗ್ರೂಪ್‌ನ ಹೇಳಿಕೆ ಅದರ ತಂತ್ರ ಮತ್ತು ನೆಪ ಮಾತ್ರ ಎಂದು ಅಮೆಜಾನ್‌ ದೂರಿದ್ದು, ಆರ್ಬಿಟ್ರಲ್ ಟ್ರಿಬ್ಯೂನಲ್ ಪ್ರಕರಣವನ್ನು ನಿರ್ಧರಿಸುವವರೆಗೆ ಸುಪ್ರೀಂ ಕೋರ್ಟ್ ಫ್ಯೂಚರ್‌ ಗ್ರೂಪ್‌ ಆಸ್ತಿಗಳ ವರ್ಗಾವಣೆಯನ್ನು ನಿರ್ಬಂಧಿಸಬೇಕು ಎಂದು ಆಗ್ರಹಿಸಿದೆ.