- ಕೇಶವ ಪ್ರಸಾದ್ ಬಿ.
ಹೀಗೆಂದು ಟ್ವೀಟ್ ಮಾಡಿರುವುದು ಬೇರೆ ಯಾರೂ ಅಲ್ಲ, ಮಾಜಿ ಸಚಿವ, ಕಾಂಗ್ರೆಸ್ ನಾಯಕ ಕೃಷ್ಣ ಬೈರೇಗೌಡ. ಕಾಂಗ್ರೆಸ್‌ನಲ್ಲಿ ಸಾಕಷ್ಟು ವಿಷಯಗಳ ಬಗ್ಗೆ ಅಧ್ಯಯನಶೀಲ ರಾಜಕಾರಣಿ ಎಂಬ ಮನ್ನಣೆಗೆ ಪಾತ್ರರಾಗಿರುವ ಅವರು ಹೀಗೇಕೆ ಜನ ಸಾಮಾನ್ಯರನ್ನು ದಿಕ್ಕು ತಪ್ಪಿಸುವ ಹೇಳಿಕೆ ನೀಡಿದ್ದಾರೆ? ಎಂಬುದು ಈಗ ಚರ್ಚೆಗೆ ಗ್ರಾಸವಾಗಿದೆ. ಜತೆಗೆ ಟ್ವಿಟ್ಟಿಗರು ಮಾಜಿ ಸಚಿವರನ್ನು ಇಂಥ ಸುಳ್ಳು ಸುದ್ದಿ ಹಬ್ಬಿಸಿರುವುದಕ್ಕೆ ಹಿಗ್ಗಾಮಗ್ಗಾ ತರಾಟೆಗೆ ತೆಗೆದುಕೊಂಡಿದ್ದಾರೆ.
ಕೃಷ್ಣ ಬೈರೇಗೌಡರು ಅವಿದ್ಯಾವಂತರೇನೂ ಅಲ್ಲ, ಬೆಂಗಳೂರಿನ ಕ್ರೈಸ್ಟ್ ಕಾಲೇಜು, ಅಮೆರಿಕದ ವಿಶ್ವವಿದ್ಯಾಲಯದಲ್ಲಿ ಉನ್ನತ ವ್ಯಾಸಂಗ ಮಾಡಿದವರು. ಅಂಥವರೂ ಇಂಥ ಹೇಳಿಕೆ ನೀಡಬಹುದೇ? ಎಂದು ಜನ ಜಾಲತಾಣಗಳಲ್ಲಿ ಪ್ರಶ್ನಿಸಿದ್ದಾರೆ.
ಪೆಟ್ರೋಲ್ ಫ್ರೀ ಆಗಿ ಸಿಗುತ್ತಾ..? ನಂಗೊಂದು 2 ಬ್ಯಾರಲ್‌..! ಟ್ವಿಟ್ಟರ್‌ ಕಂಡಂತೆ ಕಚ್ಚಾ ತೈಲ ದರ ಕುಸಿತ
ಹಾಗಾದರೆ ವಾಸ್ತವವೇನು?
ಅಮೆರಿಕದಲ್ಲಿ ಉತ್ಪಾದನೆಯಾಗುವ ವೆಸ್ಟ್ ಟೆಕ್ಸಾಸ್ ಇಂಟರ್ ಮೀಡಿಯೇಟ್ ಎಂಬ ದರ್ಜೆಯ ಕಚ್ಚಾ ತೈಲದ ದರ ಕುಸಿದಿರುವುದು ಹೌದು. ಆದರೆ ಅದು ವಾಯಿದಾ ಮಾರುಕಟ್ಟೆಯಲ್ಲಿ ಮಾತ್ರ. ಇಂಗ್ಲಿಷ್‌ನಲ್ಲಿ ಫ್ಯೂಚರ್ ಟ್ರೇಡಿಂಗ್ ಎನ್ನುತ್ತಾರೆ. ಇದು ವಹಿವಾಟು ನಡೆಸುವ ಲೆಕ್ಕಾಚಾರದ ಉದ್ದೇಶಕ್ಕಾಗಿಯೇ ಹೊರತು, ಇದರಲ್ಲಿ ಯಾರೊಬ್ಬರೂ ಉಚಿತವಾಗಿ ಒಂದು ಚಮಚಾ ಕಚ್ಚಾ ತೈಲವನ್ನೂ ಕೊಡುವುದಿಲ್ಲ.
ಭಾರತ ಖರೀದಿಸುವ ತೈಲವೇ ಬೇರೆ
ಭಾರತ ಹೆಚ್ಚಾಗಿ ಒಪೆಕ್ ಸದಸ್ಯತ್ವ ರಾಷ್ಟ್ರಗಳಿಂದ ಬ್ರೆಂಟ್ ದರ್ಜೆಯ ಕಚ್ಚಾ ತೈಲವನ್ನು ಪಡೆಯುತ್ತದೆ. ಇದರ ಬೆಲೆ ಬ್ಯಾರೆಲ್‌ಗೆ 25 ಡಾಲರ್ ಆಸುಪಾಸಿನಲ್ಲಿದೆ. ಭಾರತದ ಸಂಸ್ಕರಣಾ ಘಟಕಗಳು ವೆಸ್ಟ್ ಟೆಕ್ಸಾಸ್ ಇಂಟರ್ ಮೀಡಿಯೇಟ್ ದರ್ಜೆಯ ತೈಲವನ್ನು ಖರೀದಿಸುವುದಿಲ್ಲ. ಹೀಗಾಗಿ ಅಮೆರಿಕದಲ್ಲಿ ಕಚ್ಚಾ ತೈಲ ಕುಸಿದರೆ ಭಾರತಕ್ಕೆ ಅಂಥ ಪ್ರಯೋಜನ ಸಿಗುವುದಿಲ್ಲ. ಬ್ರೆಂಟ್ ಕಚ್ಚಾ ತೈಲ ದರ ಇಳಿದರೆ ಮಾತ್ರ ಭಾರತಕ್ಕೆ ಪ್ರಯೋಜನವಾಗುತ್ತದೆ. ಭಾರತ ಅತಿ ಹೆಚ್ಚು ಕಚ್ಚಾ ತೈಲವನ್ನು ಪಡೆಯುವುದು ಮಧ್ಯಪ್ರಾಚ್ಯ ವಲಯದ ರಾಷ್ಟ್ರಗಳಿಂದ. ಮುಖ್ಯವಾಗಿ ಸೌದಿ ಅರೇಬಿಯಾ, ಇರಾಕ್ ಇತ್ಯಾದಿ ಒಪೆಕ್ ಸದಸ್ಯತ್ವದ ರಾಷ್ಟ್ರಗಳಿಂದ ಆಮದು ಮಾಡಿಕೊಳ್ಳುತ್ತದೆ.
ಕೊರೊನಾ ಎಫೆಕ್ಟ್‌: ಇತಿಹಾಸದಲ್ಲಿಯೇ ಪ್ರಪ್ರಥಮ ಬಾರಿಗೆ 0.01 ಡಾಲರ್‌ಗೆ ಕುಸಿದ ಕಚ್ಚಾ ತೈಲ ದರ..!
ಟೊಮೆಟೊ ದರ ಮಾರುಕಟ್ಟೆಯಲ್ಲಿ ಕೆಜಿಗೆ 50 ಪೈಸೆಗೆ ಬಿತ್ತು ಎಂದಿಟ್ಟುಕೊಳ್ಳೋಣ. 50 ಪೈಸೆಗೆ ಎಷ್ಟು ಜನರಿಗೆ ಕೊಡುತ್ತಾರೆ? ಪಪ್ಪಾಯ ಹಣ್ಣಿನ ದರ 2 ರೂ.ಗೆ ಬಿದ್ದರೆ ಎಷ್ಟು ಜನರಿಗೆ ಕೊಡುತ್ತಾರೆ? ಇಲ್ವಲ್ಲಾ. ಅದೇ ರೀತಿ ವಾಯಿದಾ ವಹಿವಾಟಿನಲ್ಲಿ ಅಮೆರಿಕದ ಕಚ್ಚಾ ತೈಲ ಮೈನಸ್ 37 ಡಾಲರಿಗೆ ಬಿತ್ತು ಎಂದರೆ, ತೈಲವನ್ನು ಪುಕ್ಕಟೆಯಾಗಿ ಅಥವಾ ಜತೆಗೆ ಹೆಚ್ಚುವರಿ ದುಡ್ಡು ಕೊಟ್ಟು ಯಾರೂ ಮಾರಾಟ ಮಾಡುವುದಿಲ್ಲ.
ಭಾರತದಲ್ಲಿ ವಾಯಿದಾ ಮಾರುಕಟ್ಟೆ
ಭಾರತದಲ್ಲಿ ಮಲ್ಟಿ ಕಮಾಡಿಟಿ ಎಕ್ಸ್‌ಚೇಂಜ್ (ಎಂಸಿಎಕ್ಸ್) ಕಚ್ಚಾ ತೈಲ ಸೇರಿದಂತೆ ನಾನಾ ಸರಕುಗಳ ವಾಯಿದಾ ವಹಿವಾಟಿಗೆ ವ್ಯವಸ್ಥೆ ಕಲ್ಪಿಸಿದೆ. ಆದರೆ ಇದೇ ಮೊದಲ ಬಾರಿಗೆ ಏಪ್ರಿಲ್ ತಿಂಗಳಿನ ಕಚ್ಚಾ ತೈಲ ವಾಯಿದಾ ವಹಿವಾಟಿನ ಒಪ್ಪಂದದ ದರ ಮೈನಸ್ 2,884 ರೂ.ಗೆ ಕುಸಿದಿದೆ. ಇದರ ಪರಿಣಾಮ ಬ್ರೋಕರ್‌ಗಳಿಗೆ 400 ಕೋಟಿ ರೂ.ಗೂ ಹೆಚ್ಚು ನಷ್ಟವಾಗಿದೆ ಎಂದು ವರದಿಯಾಗಿದೆ. ಆದರೆ ಇಲ್ಲೂ ಯಾರೂ ಉಚಿತವಾಗಿ ತೈಲ ಕೊಡುವುದಿಲ್ಲ.