ಪೆಪ್ಸಿಕೊ ಮಾಜಿ ಮುಖ್ಯಸ್ಥೆ ಇಂದ್ರಾ ನೂಯಿ ಅಮೆಜಾನ್‌ ನಿರ್ದೇಶಕಿಯಾಗಿ ಆಯ್ಕೆ

ವಾಷಿಂಗ್ಟನ್‌: ಪೆಪ್ಸಿಕೊ ಕಂಪನಿಯ ಮಾಜಿ ಸಿಇಒ ಇಂದ್ರಾ ನೂಯಿ ಅವರು ಈಗ ಆನ್‌ಲೈನ್‌ ರೀಟೇಲ್‌ ದಿಗ್ಗಜ ಅಮೆಜಾನ್‌ ಕಂಪನಿಯ ಆಡಳಿತ ಮಂಡಳಿ ಪ್ರವೇಶಿಸಿದ್ದಾರೆ. ನಿರ್ದೇಶಕಿಯಾಗಿ ಅವರು ಮುಂದಿನ ದಿನಗಳಲ್ಲಿ ಸೇವೆ ಸಲ್ಲಿಸಲಿದ್ದಾರೆ. ಅಮೆಜಾನ್‌ ಆಡಳಿತ ಮಂಡಳಿ ಪ್ರವೇಶಿಸಿದ ಎರಡನೇ ಮಹಿಳೆ ಇವರಾಗಿದ್ದಾರೆ.

ಕಳೆದ ವರ್ಷದ ಅಕ್ಟೋಬರ್‌ನಲ್ಲಿ ಭಾರತೀಯ ಮೂಲದ ನೂಯಿ ಅವರು, ಪೆಪ್ಸಿಕೊ ಕಂಪನಿಯ ಸಿಇಒ ಸ್ಥಾನದಿಂದ ಕೆಳಗಿಳಿದಿದ್ದರು. ''ನೂಯಿ ಮತ್ತು ರೋಜ್‌ ಬ್ರೆವರ್‌ ಅವರು ನಮ್ಮ ಆಡಳಿತ ಮಂಡಳಿ ಪ್ರವೇಶಿಸಿರುವುದು ಹರ್ಷದಾಯಕ ಸಂಗತಿ,'' ಎಂದು ಪ್ರಕಟಣೆಯಲ್ಲಿ ಅಮೆಜಾನ್‌ ಹೇಳಿದೆ.

2006ರ ಅಕ್ಟೋಬರ್‌ನಿಂದ 2018ರ ಅಕ್ಟೋಬರ್‌ ತನಕ ನೂಯಿ ಅವರು ಪೆಪ್ಸಿಕೊದ ಸಿಇಒ ಆಗಿದ್ದರು. 2001ರಲ್ಲಿ ಸಿಎಫ್‌ಒ ಆಗಿ ಕಾರ್ಯನಿರ್ವಹಿಸಿದ್ದರು. ಹಣಕಾಸು, ಕಾರ್ಪೊರೇಟ್‌ ಸ್ಟ್ರ್ಯಾಟಜಿ, ಡೆವಲಪ್‌ಮೆಂಟ್‌, ಸ್ಟ್ರ್ಯಾಟಜಿ ಪ್ಲಾನಿಂಗ್‌ ಸೇರಿದಂತೆ ನಾನಾ ಜವಾಬ್ದಾರಿಗಳನ್ನು ಅವರು ನಿಭಾಯಿಸಿದ್ದಾರೆ.