ಬ್ಯಾಂಕ್‌ ಆಫ್‌ ಇಂಗ್ಲೆಂಡ್‌ ಮುಖ್ಯಸ್ಥ ಸ್ಥಾನಕ್ಕೆ ರಾಜನ್‌?

ಹೊಸದಿಲ್ಲಿ : ಭಾರತೀಯ ರಿಸರ್ವ್‌ ಬ್ಯಾಂಕ್‌ ಮಾಜಿ ಗವರ್ನರ್‌ ರಘುರಾಮ್‌ ರಾಜನ್‌ ಅವರು ಬ್ಯಾಂಕ್‌ ಆಫ್‌ ಇಂಗ್ಲೆಂಡ್‌ ಮುಖ್ಯಸ್ಥ ಹುದ್ದೆಯ ಒಬ್ಬ ಅಭ್ಯರ್ಥಿಯಾಗಿದ್ದು, ಅವರಿಗೆ ಹುದ್ದೆ ಒಲಿಯುವ ಅವಕಾಶಗಳಿವೆ ಎಂದು ಲಂಡನ್‌ ಮೂಲದ ಫೈನಾನ್ಸಿಯಲ್‌ ಟೈಮ್ಸ್‌ ವರದಿ ಮಾಡಿದೆ.

ಪ್ರತಿಷ್ಠಿತ ಬ್ಯಾಂಕ್‌ ಆಫ್‌ ಇಂಗ್ಲೆಂಡ್‌ನ ಹಾಲಿ ಮುಖ್ಯಸ್ಥ ಮಾರ್ಕ್‌ ಕಾರ್ನಿ ಅವರ ಅಧಿಕಾರಾವಧಿ ಮುಂದಿನ ವರ್ಷ ಮುಕ್ತಾಯವಾಗಲಿದ್ದು, ಅವರ ಸ್ಥಾನಕ್ಕೆ ಈಗಾಗಲೇ ಹುಡುಕಾಟ ಆರಂಭವಾಗಿದೆ. ಅರ್ಹ ವ್ಯಕ್ತಿಗಳ ಆಯ್ಕೆ ಪ್ರಕ್ರಿಯೆ ನಡೆದಿದ್ದು, ರಾಜನ್‌ ಹೆಸರು ಮುಂಚೂಣಿಯಲ್ಲಿದೆ ಎಂದು ಯುಕೆ ಚಾನ್ಸಲರ್‌ ಫಿಲಿಪ್‌ ಹಮ್ಮಂಡ್‌ ಹೇಳಿದ್ದಾರೆ. ಕಾರ್ನೆ ಅವರು ಕೆನಡಾದವರಾಗಿದ್ದು, ಈಗ ರಾಜನ್‌ ಮೂಲಕ ಮತ್ತೊಬ್ಬ ಬ್ರಿಟನ್‌ಯೇತರ ವ್ಯಕ್ತಿಗೆ ಉನ್ನತ ಹುದ್ದೆ ಒಲಿಯುವ ಅವಕಾಶಗಳಿವೆ.

ಬ್ರೆಕ್ಸಿಟ್‌ನಿಂದ ಬ್ರಿಟನ್‌ ಮೇಲೆ ಆಗುವ ಪರಿಣಾಮಗಳು, ಇದೇ ಹೊತ್ತಿನಲ್ಲಿ ಬ್ಯಾಂಕ್‌ ಆಫ್‌ ಇಂಗ್ಲೆಂಡ್‌ ಮುಖ್ಯಸ್ಥರ ಬದಲಾವಣೆ ಮತ್ತಿತರ ಸಂಗತಿಗಳು ಪ್ರಾಮುಖ್ಯ ಗಳಿಸಿವೆ. ಯುವ ಮತ್ತು ಪ್ರತಿಭಾನ್ವಿತ ಅರ್ಥಶಾಸ್ತ್ರಜ್ಞ ರಾಜನ್‌, ತಮ್ಮ 40ನೇ ವಯಸ್ಸಿನಲ್ಲಿಯೇ ಯುನಿಸೆಫ್‌ನ ಮುಖ್ಯ ವಿತ್ತತಜ್ಞರಾಗಿದ್ದರು. ಜಾಗತಿಕ ಆರ್ಥಿಕ ಬಿಕ್ಕಟ್ಟನ್ನು ಮೊದಲೇ ಊಹಿಸಿದ್ದ ರಾಜನ್‌, ಈಗ ಬೋಧಕರಾಗಿ ಸೇವೆ ಸಲ್ಲಿಸುತ್ತಿದ್ದಾರೆ.

ಬ್ಯಾಂಕ್‌ ಆಫ್‌ ಇಂಗ್ಲೆಂಡ್‌ ಮುಖ್ಯಸ್ಥ ಸ್ಥಾನಕ್ಕೆ ರಾಜನ್‌ ಜತೆಗೆ ಶ್ರುತಿ ವಡೇರಾ ಹೆಸರನ್ನೂ ಫೈನಾನ್ಸಿಯಲ್‌ ಎಕ್ಸ್‌ಪ್ರೆಸ್‌ ಪಟ್ಟಿ ಮಾಡಿದೆ.