ತಿರುಪತಿ ದೇವಾಲಯ ಸಿಬ್ಬಂದಿಗೆ ಪೂರ್ಣ ವೇತನ, ಸಂಬಳ ಕಡಿತ ಇಲ್ಲ

ತಿರುಪತಿ: ಜಗತ್ತಿನ ಅತ್ಯಂತ ಶ್ರೀಮಂತ ದೇವಸ್ಥಾನ ತಿರುಪತಿಯ ವೆಂಕಟೇಶ್ವರ ದೇವಾಲಯದ ಉಸ್ತುವಾರಿ ನೋಡಿಕೊಳ್ಳುತ್ತಿರುವ ತಿರುಮಲ ತಿರುಪತಿ ದೇವಸ್ಥಾನಮ್‌ (ಟಿಟಿಡಿ), ದೇಗುಲದ ಸಿಬ್ಬಂದಿಗೆ ವೇತನ ಕಡಿತ ಮಾಡುತ್ತಿಲ್ಲ ಎಂದಿದೆ. ಹಾಗೆಯೇ ಎಲ್ಲ23,000 ಸಿಬ್ಬಂದಿಗೆ ಮುಂದಿನ 2-3 ತಿಂಗಳವರೆಗೆ ಪೂರ್ಣ ವೇತನ ನೀಡುವ ವಿಶ್ವಾಸ ವ್ಯಕ್ತಪಡಿಸಿದೆ.

ತಿರುಪತಿ ದೇವಾಲಯದಲ್ಲಿ 8,000 ಕಾಯಂ ಉದ್ಯೋಗಿಗಳೂ, 15,000 ಹೊರಗುತ್ತಿಗೆಯ ಉದ್ಯೋಗಿಗಳೂ ಇದ್ದಾರೆ. ಲಾಕ್‌ಡೌನ್‌ ಪರಿಣಾಮ ತಿಂಗಳಿಗೆ 200 ಕೋಟಿ ರೂ. ನಷ್ಟವಾಗುತ್ತಿದ್ದು, ಇದುವರೆಗೆ 400 ಕೋಟಿ ರೂ. ಆದಾಯ ನಷ್ಟವಾಗಿದೆ ಎಂದು ಟಿಟಿಡಿ ಅಧ್ಯಕ್ಷ ವೈ ವಿ ಸುಬ್ಬಾ ರೆಡ್ಡಿ ತಿಳಿಸಿದ್ದಾರೆ.

ಈ ಹಿಂದೆ ಟಿಟಿಡಿ ತನ್ನ ಸಿಬ್ಬಂದಿ ವೇತನ ಪಾವತಿಸಲು ಮತ್ತು ದೈನಂದಿನ ವೆಚ್ಚ ಸರಿದೂಗಿಸಲು ಹಣದ ಕೊರತೆ ಎದುರಿಸುತ್ತಿರುವುದಾಗಿ ಹೇಳಿತ್ತು. ಆದರೆ ಟಿಟಿಡಿ ಮಂಡಳಿ ನಿಶ್ಚಿತ ಠೇವಣಿಗಳಿಂದ ಬಡ್ಡಿ ಆದಾಯವಾಗಿ ವಾರ್ಷಿಕ 700 ಕೋಟಿ ರೂ. ಗಳಿಸುತ್ತಿದೆ. ನಾನಾ ಸಾರ್ವಜನಿಕ ಬ್ಯಾಂಕ್‌ಗಳಲ್ಲಿ 12,000 ಕೋಟಿ ರೂ. ಫಿಕ್ಸೆಡ್‌ ಡಿಪಾಸಿಟ್‌ಗಳನ್ನು ಟಿಟಿಡಿ ಹೊಂದಿದೆ. ಜೊತೆಗೆ 8 ಟನ್‌ ಚಿನ್ನವೂ ದೇವಸ್ಥಾನದ ಬಳಿ ಇದೆ.

"ಆರ್ಥಿಕ ಅಡಚಣೆಗಳಿದ್ದರೂ ಟಿಟಿಡಿ ತನ್ನ ಸಿಬ್ಬಂದಿಗೆ ಮುಂದಿನ 2-3 ತಿಂಗಳು ಪೂರ್ಣ ವೇತನ ನೀಡುವ ಸಾಮರ್ಥ್ಯ‌ ಹೊಂದಿದೆ" ಎಂದು ಸುಬ್ಬಾ ರೆಡ್ಡಿ ಹೇಳಿದ್ದಾರೆ.